-
Mintizro 13
1 Kutani le Antiyokiya afa ku ni vaprofeta ni vadondzrisi abandleni dzra kone, vanga Barnaba, Simiyoni, lwavitaniwaka Mulandi, Lusyu wa le Sireni, Manayeni (lweyi angadondzrisiwa kun’we na Heroda lwewa muzrangeli wa xifundzra), na Sawlu.
2 Ankama lowu afaka vatizrela Yehovha na vatitsrona svakuda, moya lowa kuxwenga wuti: “Ndzribekelani hi tlhelo Barnaba na Sawlu akuva vayenca ntizro lowu ndzrivavitaneliki wone.”
3 Kutani antsrhaku ka loko vatitsroni svakuda ni kukhongota vavatlhanteki mavoko, vavazrumela.
4 Kutani vavanuna lava, lesvi kunene vazrumiwiki hi moya lowa kuxwenga, vafulameli Selewsa, vagama vasuka kone vawela lwandle, vaya Xipre.
5 Loko va tlhasa le Salami, vasungula kuzrezra zritu dzra Xikwembu Nkulukumba amasinagogeni ya vayuda. Kutani afa vali na Yohani akuva avapfunisa.
6 Kutiloko vatsremakanyi xihlale hinkwaxu vayatlhasa ni le Pafu, vatlhangana ni wanuna mun’we wa muyuda lwavitaniwaka Bariyesu, lweyi afaka ali noyi ni muprofeta wa madzrimi.
7 Afa atsrhami na Serxju Pawlu, xiyandla xa hosi, lweyi afaka ali wanuna wa kutiva ngopfu. Avitana Barnaba na Sawlu, hi kunavela kuyingela zritu dzra Xikwembu Nkulukumba.
8 Kambe Elima, lwewa noyi (hikusa svosvo hi lesvi vito dzrakwe dzritlhamuxelaka svone) avasivela, na ajula kuhambukisa lwewa xiyandla xa hosi alipfumelweni.
9 Kutani Sawlu, lweyi nangweso avitaniwaka Pawlu, lesvi afaka atali hi moya lowa kuxwenga, amulangutisisa,
10 aku: “Wene, mhunu wa kutala hi vukanganyisi hinkwabzu ni vusomboloki, n’wana Diyavulosi, nala wa hinkwasvu sva kululama, xana ungatitsrhika kusoholotela tindlela ta kululama ta Yehovha?
11 Kutani, lavisa! Voko dzra Yehovha dzritakuba, kutani utafa mahlo, utaheta nkama wa kukazri na ungavoni dambu.” Kolahu liphume ni munyama svimuwela, asungula kuyingayinga na ajuletela mhunu wa kumukhungisa hi voko.
12 Kutani lwewa xiyandla xa hosi, loko avoni lesviyencekiki, andzruluka mupfumeli, hikusa afa ahlamalisiwi hi dondzro ya Yehovha.
13 Kutani Pawlu ni vanghanu vakwe vayendzra hi lwandle, va vasuka Pafu vayatlhasa Perga le Pamfilya. Kambe Yohani asuka avasiya atlhelela Yerusalema.
14 Kambe loko vahundzri hi le Perga, vanhingeni Antiyokiya wa Pizidiya. Kutani vatlhasa vanhingena asinagogeni hi siku dzra Savata, vatsrhamisa abankwini.
15 Kutiloko kugama kudondzriwa buku dzra Nawu ni mabuku ya vaprofeta, vafambisi va sinagoga vazrumela vhanu vayakanela navu, vaku: “Vavanuna, vamakwezru, loko n’wi ni zritu dzra kutiyisa nhlana xitsrhungu, hlayani.”
16 Kutani Pawlu asekeleka, akombisa hi voko lesvaku ajula kukanela, aku: “Vavanuna va Yisrayele, na n’wine lava n’wichavaka Xikwembu Nkulukumba, yingisetani.
17 Xikwembu Nkulukumba wa tiko ledzri dzra Yisrayele ahlawuli vatatana vezru, atlakuxa vhanu lava afaka valuvelile atikweni dzra Gibita avahumexa hi voko ledzra ntamu.
18 Nakone atiyiselile kolomu ka mune wa makume ya malembe na vali kazri vayencekana loko vahali le huleni.
19 Antsrhaku ka kuhelisa ntlhanu wa matiko na mabizri atikweni dzra Kanana, avanyiki tiko ledzro dzriva pfindla dzravu,
20 lesvi svitlhanganisiki mune wa madzana ni ntlhanu wa makume ya malembe. “Antsrhaku ka lesvo avanyiki vayavanyisi kuyatlhasa ankameni wa muprofeta Samuweli.
21 Kambe antsrhaku ka lesvo vati vajula kuva ni hosi, kutani Xikwembu Nkulukumba avanyika Sawlu, n’wana wa Kixi, wanuna wa lixaka dzra Benjamini, kudzringana mune wa makume ya malembe.
22 Antsrhaku ka loko amususile, avanyiki Davhida akuva ava hosi, lweyi angamubekela vumboni, aku: ‘Ndzrikumi Davhida, n’wana wa Yese, wanuna lwanyonxisaka mbilu yanga, lwatakayenca kuzrandzra kwanga hinkwaku.’
23 Hi kulandzra xidumbiso lexi, ku vana va yelweyo, Xikwembu Nkulukumba atiseli Yisrayele muhuluxi, anga Yesu.
24 Na yelweyo angasitlhasa, Yohani azrezreli xitsrhungu hinkwaxu xa Yisrayele babatiso dzra kukomba kutisola.
25 Kambe ankama lowu Yohani afaka ayenca ntizro wakwe, afa aku: ‘Xana n’wipimisa lesvaku ndzri mani? Ahi mine Kriste. Kambe lavisani! Awata antsrhaku kwanga lweyi nambi masandhazi yakwe ndzringeke na mfanelo ya kumatlhantlha.’
26 “Vavanuna, vamakwezru, n’wine vana va ndangu wa Abrahamu, na n’wine vambeni n’winga laha, n’wichavaka Xikwembu Nkulukumba, zritu dzra huluku ledzro dzrizrumeliwi ku hine.
27 Hikuva vayaki va Yerusalema ni vafumi vavu avamutivanga lweyo, kambe vamuyavanyisile, vahetisisa mazritu ya vaprofeta, lawa madondzriwaka hi zritu dzra le henhla hi Savata dzrin’wana ni dzrin’wana.
28 Kutani nambilesvi vangakumangakiki xivangelo xa kumudlaya, vakombeli kuva Pilatu amudlaya.
29 Kutani loko vahetisisile hinkwasvu lesvitsraliwiki mayelanu na yene, vamuxixi amhandzreni vayamulahla axizreni.
30 Kambe Xikwembu Nkulukumba amupfuxile akufeni,
31 ava ahumelela masiku ya kutala ku lavasukiki naye Galileya vatlhantukela Yerusalema, lava svosvi vanga timboni takwe amahlweni ka xitsrhungu.
32 “Kutani hine hin’wibzela madzrungula lamanene ya minchumu lemingadumbisiwa vatatana vezru,
33 lesvaku Xikwembu Nkulukumba amiyencile ku hine, vanavu, hi kupfuxa Yesu akufeni, svanga hesvi svitsraliwiki ha kone ku Pisalma dzra vubizri: ‘U n’wananga; kusukela namunhla mine ndzri tatana waku.’
34 Kutani lesvi amupfuxiki akufeni akuva angatlheleli akuboleni, ahlayi lesvi: ‘Ndzritakunyika matovoko ya Davhida laya kuxwenga ni ya kudumbeka.’
35 Nangweso, ku Pisalma dzrin’wana kuhlayiwa lesvi: ‘Ungatitsrhika mhunu waku wa kuxwenga avona kubola.’
36 Kutani Davhida atizreli kuzrandzra ka Xikwembu Nkulukumba alixakeni dzrakwe, agama afa, alandzra vatatana vakwe, ava avona kubola.
37 Kambe, lweyo Xikwembu Nkulukumba amupfuxile ava angavoni kubola.
38 “Xilesvo, svitivani, vamakwezru, lesvaku hi kola ka yelweyo kudzrivaleliwa ka svidoho katwalisiwa ku n’wine.
39 Nakone aminchun’wini hinkwayu leyi afaka n’wingakoti kuhlayiwa lavalulamiki hi kola ka Nawu wa Moxe, mani na mani lwapfumelaka ahlayiwa lwalulamiki hi kola ka yelweyo.
40 Kutani ke, tivonelani lesvaku n’wingahumeleliwi hi lesvingahlayiwa amabukwini ya vaprofeta, vaku:
41 ‘Lavisani, n’wine vahleki, n’wihlamala n’wiva n’winyamalala, hikuva ndzritayenca ntizro amasikwini yenu, ntizro lowu n’wingatikiwukholwa ni siku ni dzrin’we nambiloko n’wodzrunguleliwa wone ha wun’wewun’we.’”
42 Kutani loko vahuma, vhanu vavakombela kutlhela vavulavula hi timhaka leti hi Savata ledzrilandzrelaka.
43 Kutani loko kuhumiwile asinagogeni, vayuda vanyingi ni vhanu va matiko lavachavaka Xikwembu Nkulukumba lava afaka vanhingenisiwi ku xiyuda, valandzra Pawlu na Barnaba. Vone vakanela navu, vavakuca kutsrhama atimpsalwini ta Xikwembu Nkulukumba.
44 Kutani hi Savata ledzrilandzrelaka, kuhlengeletana kolomu ka vhanu hinkwavu va doropa akuva vayingela zritu dzra Yehovha.
45 Kambe loko vayuda vavona svitsrhungu, vatala hi vukwele, vasungula kuphikisa lesvi Pawlu afaka asvihlaya, vamusandzra.
46 Kutani Pawlu na Barnaba vakanela na vone hi xixixi, vaku: “Afa svijulekile lesvaku zritu dzra Xikwembu Nkulukumba dzrizranga dzribzeliwa n’wine. Kambe lesvi n’widzribakanyaka ni lesvi n’witivonaka na n’wingafaneliwi hi vutomi lebzingahelikiki, svosvi ke, hiya ku vamatiko.
47 Hikuva Yehovha ahileletisi xilesvi: ‘Ndzrikulangile akuva uva livaningo dzra matiko, akuva uva huluku kuyatlhasa amimbangwini ya le kule ya misava.’”
48 Kutani loko vhanu va matiko vasviyingela, vanyonxa vadzrumisa zritu dzra Yehovha, kutani hinkwavu lava afaka vali xiyin'wini xa kukuma vutomi lebzingahelikiki vandzruluka vapfumeli.
49 Kutani zritu dzra Yehovha dzrifambisiwa atikweni hinkwadzru.
50 Kambe vayuda vahlohlotela vavasati lavachavaka Xikwembu Nkulukumba va xiyimu xa le henhla, ni vazrangeli va doropa, vayenca lesvaku Pawlu na Barnaba vahlongoliseliwa, vavahlongola axifundzreni xavu.
51 Kutani Pawlu na Barnaba vavaphumunela ntsrhuzri wa minkondzro yavu vagama vaya le Ikoniya.
52 Kutani vadondzrisiwa vatala hi kutsrhava ni moya lowa kuxwenga.