-
Mintizro 10
1 Kutani le Khezariya afa ku ni mun’we wanuna lwavitaniwaka Kornelu, lweyi afaka ali ndzruna ya masocha ku xikwata xin’we xa ntlhanu na dzrin’we wa madzana ya masocha lexi afaka xivitaniwa Vataliyana.
2 Afa ali mhunu wa kuhanya hi vukhongoti ni lweyi afaka achava Xikwembu Nkulukumba, yene ni ndangu wakwe hinkwawu. Handle ka lesvo, afa ahanana ngopfu vhanu svipfunu, nakone afa atsrhama hi kukhongota ku Xikwembu Nkulukumba nkama hinkwawu.
3 Loko sviya ku wora dzra vuzrazru dzra nhlikanhi, avoni ntsrumi ya Xikwembu Nkulukumba hi kukhanya axivonisweni na yimutela, yiku: “Kornelu!”
4 Kutani ayilangutisa, na achava, aku: “Ndzrihoni yini, we Hosi?” Yiku ku yene: “Svikhongoto svaku ni svipfunu svaku ku svisiwana svitlhantukeli ku Xikwembu Nkulukumba svanga xidzrimuxo.
5 Kutani svosvi zruma vavanuna vaya le Yopa vayavitana Simoni, lwavitaniwaka Petrosi.
6 Atsrhami akaya ka Simoni, lwanga mufuki wa svikhumba lweyi yindlu yakwe yinga kusuhi ni lwandle.”
7 Kutiloko ntsrumi leyi afaka yivulavula naye yisukile, avitana mabizri ku malandzra yakwe ni socha dzrin’we dzra kuhanya hi vukhongoti amakazri ka lava afaka vamutizrela,
8 avadzrungulela hinkwasvu ava avazruma kuya le Yopa.
9 Mundzruku ka kone, na vehe ndleleni, loko vali kazri vatsrhindzrekela adoropeni, Petrosi atlhantukela henhla ka yindlu hi nkama wa dina akuva ayakhongota.
10 Kambe asungula kutwa ndlala ya yikulu, anavela kuda xa xanchumu. Kambe na vahasveka svakuda, awela wuzrongweni bza xivoniso,
11 kutani avona tilo na dzripfulekile, ni xibza xa kukazri xa kufana ni kapulana dzra dzrikulu na xixixiwa amisaveni hi mune wa timponta ta xone.
12 Andzreni ka xone afa ku ni tinxaka hinkwatu ta svihazri sva mune wa milenge ni svikokovi sva misava, ni tinyanyana ta tilo.
13 Kutani kuhuma zritu dzriku ku yene: “Petrosi, pfuka, udlaya uda!”
14 Kambe Petrosi aku: “Ndzringeyenci lesvo, we Hosi, hikusa andzringida nchumu wa kunyama kumbe wa kuka wungabasanga.”
15 Kutani zritu dzritlhela dzrimutela dzra vubizri, dzriku: “Lesvi Xikwembu Nkulukumba asvibasisiki, ungahlaye lesvaku svinyamile.”
16 Kutani lesvi sviyenceki kuzrazru, xibza xigama xitekela kukhwelisiwa xiya tilweni.
17 Na Petrosi ahativutisa lesvaku xivoniso lexi axivoniki xijula kuhlaya yini, kotlhasa vavanuna lavazrumiwiki hi Kornelu vavutisa lesvaku hi kwini kaya ka Simoni, vayima anyangweni.
18 Kutani vaba xipfalu, vavutisa lesvi: “Xana hi kola kuzruzreliwiki Simoni, lweyi avitaniwaka Petrosi kee?”
19 Na Petrosi ahapimisa hi xivoniso lexiyani, moya wuku: “Lavisa! Ku ni vavanuna vazrazru vakujuletelaka!
20 Kutani pfuka, uxika ufamba na vone, na ungaganaganeki ni kutsrongo, hikusa hi mine ndzrivazrumiki.”
21 Kutani Petrosi axika ayakuma vavanuna lavo, aku: “Hi mine lweyi, lweyi n’wimujuletelaka. I yini ximitisiki laha?”
22 Vaku: “Kornelu, anga ndzruna ya masocha, mhunu wa kululama ni lwachavaka Xikwembu Nkulukumba, lwakhensiwaka hi tiko hinkwadzru dzra vayuda, anyikiwi svileleto sva kupfa ku Xikwembu Nkulukumba hi ntsrumi ya kuxwenga, akuva ahizruma kuta kwaku hitatakuvitana uya kaya kwakwe akuva atayingela lesvi unga nasvu kusvihlaya.”
23 Kutani avazramba akuva vanhingena vatayetlela kone vusiku lebzo. Mundzruku ka kone, apfuka afamba navu; vamakwezru van’wana va le Yopa na vone vafamba na yene.
24 Mundzruku ka kone, anhingena Khezariya. Kutani Kornelu afa avayimelile na azrambi maxaka ni vanghanu vakwe lavakulu.
25 Loko Petrosi aku awanhingena, Kornelu amutlhangaveta, awela hansi amilengeni yakwe, amukhinsamela.
26 Kambe Petrosi amusekelekisa, aku: “Sekeleka; na mine ndzri mhunu.”
27 Kutani anhingena na abula naye, akuma vhanu vanyingi na vahlengeletanile.
28 Kutani aku ku vone: “N’wine n’wasvitiva lesvaku asvipfumeleliwi hi nawu kuva muyuda atitlhanganisa ni mhunu wa tiko dzrimbeni kumbe kumutsrhindzrekelela. Kambe Xikwembu Nkulukumba andzrikombi lesvaku andzrifanelanga kuhlaya lesvaku mhunu wa kukazri anyamile kumbe angabasanga.
29 Xilesvo, ndzritekeli kubuya ankama lowu ndzringazrambiwa. Kutani ke, ndzravutisa: ndzringava na ndzrivitaniwela yini kee?”
30 Kutani Kornelu aku: “Mune wa masiku lamahundzriki, ku nkama lowanga hi wolowu, afa ndzrili kuhambeni ka xikhongoto andlwini yanga hi wora dzra vuzrazru dzra nhlikanhi. Kutani kochuka kuhumelela mun’we wanuna ayima amahlweni kwanga na ayambali mpahla ya ntlhohe ya kuphatima,
31 aku: ‘Kornelu, xikhongoto xaku xiyingeliwile, ni svihananu svaku sva kupfuna svisiwana svidzrimukiwile amahlweni ka Xikwembu Nkulukumba!
32 Xilesvo, zruma vhanu vaya le Yopa vayavitana Simoni, lweyi avitaniwaka Petrosi. Ale kaya ka Simoni, lwewa mufuki wa svikhumba lwatsrhamaka atlhelweni ka lwandle.’
33 Kutani ke, ndzrizrumi vhanu vatatakuvitana hi kuhangwesa. Kutani uvi ni vumbilu bza kuhitlhasela. Kutani svosvi hi kola hinkwezru amahlweni ka Xikwembu Nkulukumba akuva hiyingela hinkwasvu lesvi uleletiwiki svone hi Yehovha.”
34 Kutani Petrosi apfula nomu, aku: “Svosvi ndzrasvitwisisa hakunene lesvaku Xikwembu Nkulukumba angayi hi ngohe,
35 kambe atikweni dzrin’wana ni dzrin’wana lweyi amuchavaka atlhela ayenca lesvilulamiki awayamukeleka ku yene.
36 Azrumeli zritu ku vana va Yisrayele akuva avatlhasisela madzrungula lamanene ya kuzrula hi kola ka Yesu Kriste, lweyi anga Hosi ya hinkwavu.
37 N’wine nakunene n’wayitiva mhaka leyi kukaneliwiki ha yone hinkwaku le Yudeya, kusukela Galileya antsrhaku ka babatiso ledzri Yohani adzrizrezriki,
38 yinga ya Yesu lweyi afaka ahuma Nazareta, ni ndlela leyi Xikwembu Nkulukumba amutotiki ha yone hi moya lowa kuxwenga ni ntamu, agama afambafamba atikweni hinkwadzru ayenca lesvinene ni kuhanyisa hinkwavu lavaxanisiwaka hi Diyavulosi, hikusa Xikwembu Nkulukumba afa ali na yene.
39 Kutani hine hi timboni ta hinkwasvu lesvi asvitizriki atikweni dzra vayuda ni le Yerusalema, lomu vamudlayiki hi kumuhayeka amhandzreni.
40 Xikwembu Nkulukumba amupfuxile hi siku dzra vuzrazru, ava amupfumelela kutivonekisa,
41 kunge ku hinkwavu vhanu, kambe ku timboni letizrangiki tibekisiwa hi Xikwembu Nkulukumba, anga hine, hidiki hiva hinwa na yene antsrhaku ka loko apfuxiwile akufeni.
42 Nangweso, ahileleti kuzrezrela vhanu ni kubeka vumboni hinkwabzu bza lesvaku lweyo hi yene abekiwiki hi Xikwembu Nkulukumba akuva ayavanyisa lavahanyaka ni lavafiki.
43 Vaprofeta hinkwavu vabekela yene vumboni, bza lesvaku mani na mani lwapfumelaka ku yene atakuma kudzrivaleliwa svidoho hi vito dzrakwe.”
44 Na Petrosi ahahlaya mazritu lawa, moya lowa kuxwenga wowela hinkwavu lava afaka vayingiseta zritu.
45 Kutani hinkwavu vapfumeli lavasokiki lava afaka vabuyi na Petrosi vahlamala, hilesvi nyiko ya moya lowa kuxwenga afaka yichululiwa ni le ku vhanu va matiko.
46 Hikuva afa vavayingela na vakanela hi tindzrimi ta le matikweni, vadzrumisa vukulukumba bza Xikwembu Nkulukumba. Kutani Petrosi ayangula, aku:
47 “Njhe, a kone lweyi angayalaka ni mati akuva asivela lava kubabatisiwa, lesvi vayamukeliki moya lowa kuxwenga kufana na hine?”
48 Kutani aleleta lesvaku vababatisiwa avitweni dzra Yesu Kriste. Kutani vamukombela akuva atsrhama na vone masiku mange mangani.