-
Matewu 7
1 “N’wingayavanyiseni, akuva n’wingatiyavanyisiwa;
2 hikusa mayavanyisela lawa n’wiyavanyisaka ha wone, n’witayavanyisiwa ha wone na n’wine, nakone mpimu lowu n’wipimaka ha wone, n’witapimiwa ha wone na n’wine.
3 Xilesvo, ulangusela yini xilavi lexinga tihlweni dzra makwenu kambe ungavoni ntsrandzra lowunga tihlweni dzraku?
4 Kumbe ungasvikotisa kuyini kubzela makwenu, uku: ‘Yima ndzrikususa xilavi atihlweni dzraku’, na kasi ku ni ntsrandzra tihlweni dzraku?
5 Mukanganyisi! Zranga hi kususa ntsrandzra lowunga tihlweni dzraku, kutani utasvivona ha hombe lesvaku ungasusisa kuyini xilavi lexinga tihlweni dzra makwenu.
6 “N’winganyikeni timbzana minchumu ya kuxwenga nakone n’wingacukumeteni tindzralama tenu amahlweni ka tinguluve, akuva tingatichuka titikandzretela hi milenge ya tone titlhela tindzruluka tin’wihandzrulela.
7 “Kombelani, kutani n’witanyikiwa; juletelani, kutani n’witasvikuma; gongondzrani, kutani n’witapfuleliwa;
8 hikusa mani na mani lwakombelaka awanyikiwa; mani na mani lwajuletelaka awasvikuma, nakone mani na mani lwagongondzraka atapfuleliwa.
9 Kunene, hi mani ku n’wine lweyi, loko n’wanakwe omukombela kati, angamunyikaka zribze?
10 Kumbe loko omukombela nhlampfi, xana angamunyika nyoka?
11 Kutani ke, lesvi n’wine, nambilesvi n’winga vabihi, n’wisvitivaka kuhanana vanenu minchumu leminene, ngopfungopfu Tatana wenu lwanga matilweni atahanana minchumu leminene lava vamukombelaka!
12 “Xilesvo, hinkwasvu lesvi n’wijulaka lesvaku vhanu van’wiyencela svone, na n’wine vayencelani svone. Hikuva lesvi hi lesvi Nawu ni vaprofeta vajulaka kuhlaya svone.
13 “Nhingenani hi nyangwa ya kukhuma, hikusa nyangwa leyiyisaka akusuveni yiyanamile ni ndlela ya kone i yikulu svinene, kutani lavanhingenaka ha yone i vanyingi;
14 kambe nyangwa leyiyisaka avuton’wini yikhumile ni ndlela ya kone yilalile, nakone lavayikumaka i vatsrongo.
15 “Tivonelani ku vaprofeta va madzrimi lavataka ku n’wine na vayambali xikhumba xa hamba, nakuve andzreni i mahava ya kuda mangaxuzri.
16 N’witavativa hi mihandzru yavu. Ahi svone lesvaku mavhinya amakhayiwi amitweni kumbe lesvaku makuwa amakhayiwi ankayeni?
17 Xisvosvo, muzri wun’wana ni wun’wana lowunene wupsala mihandzru leminene, kambe muzri wun’wana ni wun’wana wa kubola wupsala mihandzru lemingapfunikiki nchumu.
18 Muzri lowunene wungepsali mihandzru lemingapfunikiki nchumu; na wone muzri wa kubola wungepsali mihandzru leminene.
19 Muzri wun’wana ni wun’wana lowungapsalikiki mihandzru leminene watsremiwa wucukumeteliwa andzrilweni.
20 Xilesvo, ke, n’witavativa hi mihandzru yavu.
21 “Ahi hinkwavu lavaliki ku mine: ‘Hosi, Hosi,’ vatakanhingena amfun’wini wa matilo, kambe kutanhingena ntsena lweyi ayencaka kuzrandzra ka Tatana wanga lwanga matilweni.
22 Asikwini dzra kone vanyingi vataku ku mine: ‘Hosi, Hosi, xana ahiprofetanga hi vito dzraku, hihlongola mademona hi vito dzraku, hitlhela hiyenca ni mahlolana manyingi hi vito dzraku?’
23 Kutani ndzritavabzela, ndzriku: ‘Andzrin’witivanga ni siku ni dzrin’we! Sukani la ku mine, n’wine vayenci va vusomboloki!’
24 “Xilesvo, mani na mani lwayingelaka mazritu yanga lawa atlhela amayenca atafana ni mhunu wa kutlhazriha lwayakiki yindlu yakwe ahenhla ka zribze.
25 Kutani kuna mpfula, kubuya mimfula; timheho tihunga tiba yindlu leyo, kambe yingawi hilesvi afaka yiyakiwi ahenhla ka zribze.
26 Nangweso, mani na mani lwayingelaka mazritu yanga lawa kambe angamayenci atafana ni mhunu wa kumphunta lwayakiki yindlu yakwe axipfunyeni.
27 Kutani kuna mpfula, kubuya mimfula; timheho tihunga tiba yindlu leyo, kutani yiwa, nakone mawela ya yone mava lamachavisaka.
28 Kutani loko Yesu aheta mazritu lawa, svitsrhungu svihlamala hi madondzrisela yakwe,
29 hikusa afa adondzrisa vhanu svanga mhunu lwanga ni ntamu, kunge kufana ni vatsrali vavu.