BRX

1   Antsrhaku ka Savata, loko bziya kuxeni hi siku dzra kusungula dzra vhiki, Mariya Madalena na Mariya lwemun’wana vabuya vavona xizra.

2   Kutani vakuma lesvaku kuhumeleli ximbeta lexikulu, hikusa afa kuxiki ntsrumi ya Yehovha he tilweni yitatasusumeta zribze, yigama yitsrhama ahenhla ka dzrone.

3   Kutani lesvi afaka yili xisvone afa svifana ni lihati, nakone mpahla ya yone afa yiphatima yikumpaa kufana ni xitsrhwatsrhwa.

4   Kutani, hi kuyichava, lava afaka vavonelela afa vawomi hi kuzruzrumela ingiki vefa.

5   Kambe ntsrumi yiku ku vavasati lavayani: “N’wingachaveni, hikusa ndzrasvitiva lesvaku n’wijuletela Yesu, lwadlayiwiki amhandzreni.

6   Anga kone la, hikusa apfuxiwile, svanga hesvi ahlayiki ha kone. Buyani n’wivona mbangu lowu afaka alatiwi ku wone.

7   Kutani hangwesani n’wifamba n’wiyabzela vadondzrisiwa vakwe lesvaku apfuxiwile akufeni. Nangweso, phela apfi azranga amahlweni kwenu kuya Galileya. N’witayamuvona kohala. Hi svolesvo afaka ndzribuya ndzrin’wibzela svone!”

8   Kutani vahangwesa vasuka axizreni, na vatali hi kuchava ni kutsrhava lokukulu; vatsrutsruma vayadzrungulela vadondzrisiwa vakwe.

9   Kolahu Yesu avatlhangaveta, aku: “Awuxeni!” Kutani vatsrhindzrekela vamukhoma minkondzro, vamukhinsamela.

10   Kutani Yesu aku ku vone: “N’wingachaveni! Fambani n’wiyadzrungulela vamakwezru, vataya Galileya vayandzrivona.”

11   Kutani na vahafamba, van’we va vazrindzri vanhingena adoropeni vadzrungulela vaprista lavakulu hinkwasvu lesviyencekiki.

12   Kutiloko vanhingeni nhlengeletanu ni vakulu vakombisana navu, vakulu vanyika masocha mali ya yinyingi,

13   vaku: “Hlayani lesvi: ‘Vadondzrisiwa vakwe vati ni vusiku vamuyiva na hiyetlelile’.

14   Kutani loko lesvi svochuka sviyingeliwa hi hosi ya xifundzrankulu, hitayizrulisa, hin’wixizrelela.”

15   Kutani mateka mali, mayencisa xilesvi maleletisiwiki xisvone. Kutani mhaka leyi yihangalaka amakazri ka vayuda kutatlhasa ni namunhla.

16   Kambe, vadondzrisiwa lava khume na mun’we vaya Galileya, anhaveni leyi Yesu angavaleleta yone.

17   Loko vamuvona, vamukhinsamela, kambe van’we vaganaganeka.

18   Kutani Yesu atsrhindzrekela, akanela navu, aku: “Ndzrinyikiwi vuhosi hinkwabzu atilweni ni misaveni.

19   Xilesvo, fambani n’wiyayenca vadondzrisiwa amakazri ka vhanu va matiko hinkwawu, n’wivababatisa hi vito dzra Tatana, ni dzra N’wana, ni dzra moya lowa kuxwenga,

20   n’wivadondzrisa kulandzrelela hinkwasvu lesvi ndzrin’widondzrisiki svone. Nangweso, lavisani, ndzri na n’wine masiku hinkwawu, kuko kutlhasa kuhela ka misava.”