BRX

1   Kutani loko Yesu agami kuhlaya lesvi hinkwasvu, aku ku vadondzrisiwa vakwe:

2   “N’wasvitiva lesvaku andzreni ka masiku mabizri kudiwa Paxkwa, nakone N’wana wa Mhunu atanyiketiwa akuva adlayiwa amhandzreni.”

3   Kutani vaprista lavakulu ni vakulu va tiko vahlengeletana amutini wa muprista lwenkulu, lweyi afaka avitaniwa Kayafasi,

4   valuka makungu ya kukhoma Yesu hi maqhinga ni kumudlaya.

5   Nambitanu, afa vaku: “Kungave ankhubzini, akuva kungahumeleli dzolonga amakazri ka vhanu.”

6   Na Yesu ahali Betanya andlwini ya Simoni, lwewa nhlokonho,

7   abuyeliwa hi mun’we wansati na atameli ngwama ya kutiyela ya mafuzra ya kunun’hwela ni ya kudula, kutani amuchela anhlokweni na ali akudeni.

8   Kutani loko vavona lesvo, vadondzrisiwa vahlundzruka, vaku: “Hayini kutlangiwa hi mafuzra lawa?

9   Hikusa inhaka maxavisiwile hi mali ya yinyingi yinyikiwa svisiwana.”

10   Kutani loko Yesu asvivonile, aku ku vone: “N’wimukazratela yini wansati lweyi? Andzriyenceli ntizro wa kuxonga.

11   Hikusa n’wine minkama hinkwayu n’wi ni svisiwana, kambe mine n’wingativa na mine minkama hinkwayu.

12   Loko acheli mafuzra lawa ya kunun’hwela amizrini yanga, asviyenceli kundzrilulamisela akuva ndzrilahliwa.

13   Ndzrihlayela mfuzri ndzrili ku n’wine: Kwini na kwini lomu madzrungula lamanene matakazrezriwa kone amisaveni hinkwayu, lesvi lweyi wansati asviyenciki na svone svitahlayiwa akuva adzrimukiwa.”

14   Kutani mun’we wa lava khume na vabizri, lwavitaniwaka Yuda Iskariyota, aya ku vaprista lavakulu,

15   aku: “N’witandzrinyika yini akuva ndzrimunyiketa ku n’wine?” Kutani vamutsremela makume mazrazru ya macheleni ya silivhela.

16   Kutani kusukela kolahu, ajuletela mukhandlu lowunene wa kumunyikela.

17   Hi siku dzra kusungula dzra Makati ya Kuka Handzrelo, vadondzrisiwa vata ku Yesu, vaku: “Ujula hikululamisela kwini akuva udela kone Paxkwa?”

18   Kutani aku: “Nhingenani adoropeni, n’wiya ku Manyana, n’wiyaku ku yene: ‘Mudondzrisi ali: “Nkama wanga wu kusuhi. Ndzritada Paxkwa ni vadondzrisiwa vanga akaya kwaku.”’”

19   Kutani vadondzrisiwa vayencisa xilesvi Yesu avaleletisiki xisvone, valulamisela Paxkwa.

20   Kutani loko dambu dzripelile, atsrhamisa ada ni vadondzrisiwa vakwe lava khume na vabizri atafuleni.

21   Na vahada, aku: “Ndzrihlayela mfuzri ndzrili ku n’wine: Mun’we ku n’wine atandzridlayisa.”

22   Kutani hi kuvaviseka svinene hi lesvo, mun’wana ni mun’wana asungula kuhlaya lesvi ku yene: “Hosi, angava mine?”

23   Kutani ahlamula, aku: “Lweyi apetaka voko dzrakwe na mine axibzeni hi yelweyo atakandzridlayisa.

24   Kunene, N’wana wa Mhunu awafamba, svanga hesvi svitsraliwiki mayelanu na yene, kambe yowee mhunu lweyi N’wana wa Mhunu adlayisiwaka ha yene! Inhaka svimuyampselile loko mhunu lweyo ni kubelekiwa afa angabelekiwanga.”

25   Kutani Yuda, lweyi afaka ajula kumunyikela, ahlamula, aku: “Angava mine, we Rabbi?” Yesu aku ku yene: “Uhlayi ha bzaku.”

26   Vati na vahada, Yesu ateka kati, kutani loko akhensile ni kudzrikatekisa, adzrikhema, anyika vadondzrisiwa, aku: “Tekani n’wida. Kati ledzri i mizri yanga.”

27   Agama ateka xinwelo, akhensa, avanyika, aku: “Siyelanani ha xone hinkwenu,

28   hikuva vhinyo ledzri i ngati yanga ya xipfumelelananu, leyitakahalateliwa lavanyingi akuva vadzrivaleliwa svidoho.

29   Kambe ndzrili ku n’wine: Ndzringatitlhela ndzrinwa handzru lowu wa mavhinya kuyatlhasa asikwini ledzri ndzritakatlhela ndzriwunwa na n’wine amfun’wini wa Tatana wanga.”

30   Kutiloko vayimbeleli tinsimu ta svidzrumiso, vahuma vaya le Nhaveni ya Minhlwazri.

31   Kutani Yesu aku ku vone: “Hinkwenu laha n’witawa hi mhaka yanga vusiku lebzi, hikusa kutsraliwi lesvi: ‘Ndzritaba mubzisi, kutani tihamba ta ntlhambi wa kone titahangalaka.’

32   Kambe antsrhaku ka loko ndzripfuxiwile, ndzritapfa ndzrin’wizrangela ndzriya Galileya.”

33   Kambe Petrosi ahlamula, aku ku yene: “Nambi lava van’wana hinkwavu vangowa hi mhaka yaku, mine ndzringatiwa ni siku ni dzrin’we!”

34   Yesu aku ku yene: “Ndzrihlayela mfuzri ndzrili ku wene: Vusiku bzobzi, na nkuku wungasiyimba, utandzrilandzrula kuzrazru.”

35   Petrosi aku ku yene: “Nambiloko ndzringofa na wene, mine andzri na kukulandzrula.” Na vone vadondzrisiwa lavan’wana hinkwavu vahlaya svo sva svin’we.

36   Kutani Yesu afamba ni vadondzrisiwa ambangwini lowuvitaniwaka Getsemani, aku ku vone: “Tsrhamani laha na ndzrahaya lahayani ndzriyakhongota.”

37   Kutiloko ateki Petrosi ni vana lavabizri va Zebedewu, asungula kuvaviseka, akazrateka ngopfu svinene.

38   Kutani aku ku vone: “Hika dzranga dzrivaviseki ngopfu, kuyatlhasa akufeni. Tsrhamani laha n’wilavelela na mine.”

39   Kutiloko aya amahlweninyana, awa hi mombo, akhongota, aku: “Tatana, loko svikoteka, xinwelo lexi axihundzre hi kule na mine. Kambe svingaye hi kuzrandzra kwanga, kambe hi kuzrandzra kwaku.”

40   Agama ayela vadondzrisiwa, avakuma na voyetlela; kutani aku ku Petrosi: “Svili an’wisvikotanga kulavelela na mine wora dzra dzrin’we?

41   Lavelelani n’witlhela n’wikhongota, akuva n’winganhingeni andzringweni. Svone, moya wasvijula, kambe nyama ayi na ntamu.”

42   Atlhela asuka, dzra vubizri, ayakhongota, aku: “Tatana, loko svingakoteki kuva xinwelo lexi xihundzra na ndzringaxinwanga, akuyenceke kuzrandzra kwaku.”

43   Kutani atlhela abuya, avakuma na vayetlela, hikusa mahlo yavu afa mabindzriwa hi vuzrongo.

44   Kutani avatsrhika, atlhela asuka ayakhongota dzra vuzrazru, atlhela ahlaya svo sva svin’we.

45   Kutani ayela vadondzrisiwa, aku ku vone: “Vusiku bza kufana ni lebzi, n’wine n’woyetlela, n’wiwisa! Lavisani! Wutsrhindzrekelile nkama wa kuva N’wana wa Mhunu anyiketiwa amavokweni ya vadohi.

46   Pfukani hifamba. Lweyi andzridlayisaka hi lwe atsrhindzrekelaka.”

47   Ati na ahakanela, kotlhasa Yuda, mun’we wa lava khume na vabizri, ni xitsrhungu lexikulu, lexitameliki timpanga ni tindhuku, na xizrumeliwi hi vaprista lavakulu ni vakulu va tiko.

48   Kutani lweyi amuxavisiki afa avanyiki xikombiso, aku: “Lweyi ndzritakamun’quta, hi yelweyo; mukhomani.”

49   Kutani akongoma Yesu, aku: “Hilosile, we Rabbi”, amun’quta.

50   Kambe Yesu aku ku yene: “Nandzruwe, ubuya uyenca yini laha?” Kutani vatsrhindzrekela, vayisa mavoko ku Yesu, vamukhoma.

51   Kambe mun’we wa lava afaka vali na Yesu analavuta voko dzrakwe ahlomula lipanga, aba nandzra wa muprista lwenkulu, amutsrema ndleve.

52   Kutani Yesu aku ku yene: “Tlhelisa lipanga dzraku ambangwini wa dzrone, hikusa hinkwavu vakhomaka lipanga vatadlawa hi lipanga.

53   Kumbe wopimisa lesvaku ndzringekombeli Tatana wanga andzrinyika svosvisvosvi kutlula khume dzra mabutsrhu na mabizri ya tintsrumi?

54   Ke, matahetisekisa kuyini Matsralwa lamaliki svifanela kuyencekisa xisvosvi kee?”

55   Ankameni lowo, Yesu aku ku svitsrhungu lesviya: “N’wibuya n’windzrikhoma na n’witameli timpanga ni tindhuku svanga n’wojula muyivi? Siku ni siku afa ndzretsrhama atempeleni ndzridondzrisa, kambe an’wibuyanga n’windzrikhoma.

56   Kambe hinkwasvu lesvi sviyencekile akuva kuhetiseka matsralwa ya vaprofeta.” Kutani vadondzrisiwa hinkwavu vamutsrhika vusvakwe, vatsrutsruma.

57   Kutani lavakhomiki Yesu vamuyisa ku Kayafasi, muprista lwenkulu, lomu vatsrali ni vakulu afaka vatlhangani kone.

58   Kambe Petrosi afa amulandzra he kule, akota ayatlhasa amutini wa muprista lwenkulu. Kutani loko anhingeni ndzreni, atsrhamisa ni vatizri akuva avona magamela ya kone.

59   Kutani vaprista lavakulu ni Huvo ya Xiyuda hinkwayu afa vajula vumboni bza madzrimi bza kulumbeta Yesu akuva vakota kumudlaya,

60   kambe avabzikumanga, nambilesvi afaka kutsrhindzrekela timboni tinyingi ta madzrimi akuva tibeka vumboni. Hi vugamu, kutsrhindzrekela vabizri,

61   vaku: “Lweyi ati: ‘Ndzringahohlota Tempele dzra Xikwembu Nkulukumba ndzritlhela ndzridzriyaka hi masiku mazrazru.’”

62   Kolahu muprista lwenkulu asekeleka, aku ku yene: “Awuyanguli nchumu? Hi svini lesvi lava vakuzrambelaka ha svone?”

63   Kambe Yesu amiyela akuntse! Kutani muprista lwenkulu aku ku yene: “Ndzrakufungisa hi Xikwembu Nkulukumba lwahanyaka: Hibzele loko uli Kriste, N’wana wa Xikwembu Nkulukumba!”

64   Yesu aku ku yene: “Uhlayi ha bzaku. Kambe ndzrili ku n’wine: Kusukela svosvi n’witavona N’wana wa Mhunu na atsrhamisi avokweni dzra xinene dzra ntamu, abuya hi matlavi ya tilo.”

65   Kutani muprista lwenkulu ahandzrula nkhancu wakwe, aku: “Asandzrile! Hahajulela yini timboni? Lavisani! N’wixiyingelile xisandzru.

66   N’wili yini?” Kutani vahlamula, vaku: “Afaneliwa hi kufa.”

67   Kutani vamuthukela mazri alisweni vatlhela vamuhimetela. Van’wana vamuba liso hi timpama,

68   na vaku: “Hi profetele, we Kriste. Hi mani lwangakuba?”

69   Kasi Petrosi afa atsrhami ahandle alinxonxeni. Kutani mun’we wa nhwanyana lwe afaka atizra kone amuyela, aku: “Na wene afa uli na Yesu, lwewa mugalileya!”

70   Kambe aphikisa amahlweni ka hinkwavu, aku: “Andzrisvitivi lesvi ukanelaka ha svone.”

71   Kutani loko ahumi handle, aya nyangweni, nhwanyana mumbeni amuvona, aku ku lava afaka vali kone: “Lweyi afa ali na Yesu, lwewa munazareta.”

72   Atlhela aphikisa, na afunga, aku: “Andzrimutivi mhunu lweyi!”

73   Antsrhaku ka nkamanyana lava afaka vayimi kusuhi vatsrhindzrekela, vaku ku Petrosi: “Nakunene na wene u mun’we wa vone, hikusa nambi makanelela yaku mokupaluxa.”

74   Kutani asungula kuzruka atlhela afunga, aku: “Andzrimutivi mhunu lweyi!” Kolahu nkuku wuku: “Kikiligoo!”

75   Kutani Petrosi adzrimuka mazritu ya Yesu, loko aku: “Na nkuku wungasiyimba, utandzrilandzrula kuzrazru.” Kutani ahuma handle, ayadzrila hi xiviti.