-
Matewu 23
1 Kutani Yesu akanela ni svitsrhungu ni vadondzrisiwa vakwe, aku:
2 “Vatsrali ni vafarisi vatsrhamisi axitsrhan’wini xa Moxe.
3 Xilesvo, hinkwasvu lesvi van’wibzelaka svone, sviyencani n’witlhela n’wisvibekisa, kambe n’wingalandzreni mintizro yavu, hikusa vohlaya ntsena kambe avayenci.
4 Vatsrimbelela mintsrhwalu ya kubindzra vamitlhanteka amakatleni ya vhanu, kambe vone avajuli nambi kumitsrhindzreta hi litiho dzravu.
5 Hinkwasvu lesvi vasviyencaka, vayencela akuva vavoniwa hi vhanu, hikusa vakulisa svibokisana svavu sva matsralwa le mombzeni ni le vokweni, vatlhela valehisa machakala ya vugamu bza sviyambalu svavu.
6 Nakone vazrandzrisa mimbangu ya kusungula lomu kudeni ni svitsrhamu sva kusungula amasinagogeni,
7 ni kuloseliwa amabazara, ni kuva vhanu vavavitana, vaku: ‘Mufundhisa’.
8 Kambe n’wine, n’wingavitaniweni ‘Mufundhisa’, hikuva Mudondzrisi wenu i mun’we ntsena; kutani n’wine hinkwenu n’wi vamakwavu.
9 Nangweso, n’wingavitaneni mhunu tatana wenu amisaveni, hikusa Tatana wenu i mun’we ntsena, lwanga tilweni.
10 Nambi kuvitaniwa vazrangeli, n’wingavitaniweni; hikusa Muzrangeli wenu i mun’we ntsena, anga Kriste.
11 Kambe lwenkulu amakazri kwenu aave mutizreli wenu.
12 Mani na mani lwatitlakuxaka atatsrongahatiwa, kasi mani na mani lwatitsrongahataka atatlakuxiwa.
13 “Kambe, yowee, vatsrali ni vafarisi, vakanganyisi! Hikusa n’wisivela vhanu kunhingena amfun’wini wa matilo; hikusa n’wine an’winhingeni, nambi lavajulaka kunhingena, an’wivatsrhiki vanhingena.
15 “Yowee, n’wine vatsrali ni vafarisi, vakanganyisi! Hikusa n’witsremakanya lwandle ni tiko dzra ntlhava akuva n’wiyanhingenisa mhunu mun’we ku xiyuda, kutani loko n’wimunhingenisile, n’wimuyenca afaneliwa hi Xikhele xa Kusuvisiwa kubizri kutlula n’wine.
16 “Yowee, n’wine vafambisi va kuka vangavoni, n’wine n’wiliki: ‘Loko mhunu afunga hi tempele, asvi na mhaka; kambe loko mhunu afunga hi gole dzra tempele, a ni xikweneti.’
17 Svimphunta sva kuka svingavoni! Kasi, hi xini xa lisima dzrikulu? I gole kumbe i tempele ledzrixwengisiki gole?
18 N’witlhela n’wiku: ‘Loko mhunu afunga hi alitari, asvi na mhaka; kambe loko mhunu afunga hi xitlhavelo lexinga ku dzrone, a ni xikweneti.’
19 N’wine va kuka n’wingavoni! Kasi, hi xini xa lisima dzrikulu? I xitlhavelo kumbe i alitari ledzrixwengisaka xitlhavelo?
20 Xilesvo, lweyi afungaka hi alitari afunga hi dzrone ni hi hinkwasvu lesvinga ku dzrone;
21 nakone lwafungaka hi tempele afunga hi dzrone ni hi Lweyi atsrhamaka ku dzrone;
22 ni lwafungaka hi tilo afunga hi xiluvelo xa Xikwembu Nkulukumba ni hi Lweyi atsrhamisiki ku xone.
23 “Yowee, n’wine vatsrali ni vafarisi, vakanganyisi! Hikusa n’wihumexa sva vukhume sva xinsinyana xa svitlukana sva kutsrokotsra, ni sva xinsinyana xa sviluvana sva kunun’hwela, ni sva svinhlekana sva kunandzrikisa muzru, kambe n’witsrhiki timhaka ta lisima ngopfu ta Nawu, kunga vululami, ni timpsalu, ni kudumbeka. Minchumu leyi afa svijuleka kuva n’wimiyenca, kambe na n’wingatsrhiki lemin’wana.
24 N’wine va kuka n’wingavoni! N’wisefa nsuna kambe n’wimita kamele!
25 “Yowee, n’wine vatsrali ni vafarisi, vakanganyisi! Hikusa n’wibasisa handle ka xinwelo ni nkambana, kambe andzreni kutali hi vuyivi ni makwanga.
26 Mufarisi wa kuka ungavoni, zranga hi kubasisa andzreni ka xinwelo ni nkambana, akuva kutabasa ni le handle.
27 “Yowee, n’wine vatsrali ni vafarisi, vakanganyisi! Hikusa n’wifana ni maxizra lamapendiwiki hi mhemba, lamavonekaka na maxongile he handle kambe andzreni matali hi mazrambu ya vhanu va kufa ni hi hinkwasvu sva nsila.
28 Hi ndlela leyifanaka, na n’wine he handle n’wivoneka ingiki nakunene n’wilulamile ku vhanu, kambe andzreni n’witali hi vukanganyisi ni vugevenga.
29 “Yowee, n’wine vatsrali ni vafarisi, vakanganyisi! Hikuva n’wiyaka maxizra ya vaprofeta n’witlhela n’wixongisa maxizra ya valulami,
30 na n’wiku: ‘Loko afa hehanya amasikwini ya vatatana vezru, inhaka hingahlengelanga navu akuhalateni ka ngati ya vaprofeta.’
31 Xilesvo, n’witiyisa ha bzenu lesvaku n’wi vana va lavangadlaya vaprofeta.
32 Kutani, n’wine tatisani mpimu wa vatatana venu.
33 “Tinyoka, vana va svipshahla! Xana n’witahulukisa kuyini yavanyiso dzra Xikhele xa Kusuvisiwa?
34 Hi mhaka leyi, lavisani, ndzrin’wizrumela vaprofeta, ni tintlhazri, ni vadondzrisi va matsralwa. Van’we, n’witavadlaya n’witlhela n’wivagongondzrela atimhandzreni, kutani van’wana n’witavakwapa amasinagogeni yenu n’witlhela n’wivaxanisa hi doropa ni doropa,
35 akuva n’witahakelisiwa ngati ya valulami hinkwavu leyihalatiwiki amisaveni, kusukela angatini ya mululami Abele kuyatlhasa angatini ya Zakariya, n’wana Barakiya, lweyi n’wimudlayiki amakazri ka tempele ni alitari.
36 Ndzrihlayela mfuzri ndzrili ku n’wine: Hinkwasvu lesvi svitawela lixaka ledzri.
37 “Yerusalema, Yerusalema, mudlayi wa vaprofeta ni mukhandli wa lavazrumeliwiki ku yene! I kangani xana ndzrijuliki kuhlengeleta vanaku kufana ni lesvi huku yihlengeletisaka xisvone svicuwana sva yone ahansi ka timpapa ta yone? Kambe awusvijulanga.
38 Lavisa! Yindlu yaku yitasala hi mazrumbi.
39 Hikuva ndzrili ku wene: Kusukela svosvi ungahatindzrivona kuyatlhasa ankameni lowu utakaku: ‘Akukhensiwe lweyi abuyaka hi vito dzra Yehovha!’”