BRX

1   Kutani Yesu atlhela aphindha avulavula navu hi svifaniso, aku:

2   “Mfumu wa matilo wungafanisiwa ni hosi leyihambeliki n’wana wa yone nkhuvu wa muchatu.

3   Kutani yizruma malandzra ya yone kuyavitana lavazrambiwiki amuchatwini, kasi vone afa vangasvijuli kuya.

4   Yitlhela yizruma malandzra ya yone, yiku: ‘Bzelani vazrambiwa, n’wiku: “Lavisani! Ndzrihetile kululamisela svakuda sva nkhuvu; tihomu tanga ni svihazri sva kunona svitlhaviwile, kutani hinkwasvu svilungile. Buyani amuchatwini.”’

5   Kambe lesvi afaka vange na mhaka, vatifambela, mun’we ansin’wini yakwe, mun’wanyana akuxaviseni kwakwe;

6   kambe lavan’wana vakhoma malandzra vamaxanisa, vagama vamadlaya.

7   “Kutani hosi yihlundzruka, yizrumela masocha ya yone, yidlaya vadlayi lavo yigama yihisa doropa dzravu.

8   Kutani yiku ku malandzra ya yone: ‘Nkhuvu wa muchatu wulungile wone, kambe lavazrambiwiki afa vangafaneleki.

9   Xilesvo, fambani amatlhanganwini ya svitaratu, n’wiyazramba mani na mani lweyi n’wimukumaka ata amuchatwini.’

10   Kutani malandzra lawo mahuma maya svitaratwini mayahlengeleta hinkwavu lava mavakumiki, va kubiha ni lavanene; kutani yindlu ya nkhuvu wa muchatu yitala hi lava afaka vatsrhami akudeni.

11   “Kutani loko hosi yinhingena kutatavona lesvaku hi vamani afaka vali kudeni, yovona mun’we wanuna lweyi afaka angayambalanga mpahla ya muchatu.

12   Kutani yiku ku yene: ‘Nandzruwe, unhingenisi kuyini laha na unge na mpahla ya muchatu?’ Lweyo wanuna apfumala xa kuxihlaya.

13   Kutani hosi yiku ku malandzra ya yone: ‘Mutsrimbani mavoko ni milenge n’wimucukumeta amunyameni hala handle. Hi laha atakadzrila atlhela aketsrela menyo kone.’

14   “Hikusa lavazrambiwiki i vanyingi, kambe lavahlawuliwiki i vatsrongo.”

15   Kutani vafarisi vafamba vayahamba xikungu xa ndlela ya kumuphasa hi mazritu yakwe.

16   Kutani vazrumela vadondzrisiwa vavu ku yene, kun’we ni vaseketeli va Heroda, vayaku: “Mudondzrisi, hasvitiva lesvaku ukanela xihlayelamfuzri ni lesvaku udondzrisa ndlela ya Xikwembu Nkulukumba hi xihlayelamfuzri, ni lesvaku awujuli kunyonxisa mhunu, hikusa awulangusi wuso bza vhanu.

17   Ke, hibzele: Uli yini hi mhaka leyi: Svapfumeleliwa kuhakela tinemba ku Khezari kumbe ihina?”

18   Kambe Yesu, hi kutiva mazrengu yavu ya kubiha, aku: “N’windzridzringela yini, vakanganyisi?

19   Ndzrikombani mali leyi kuhakeliwaka ha yone tinemba.” Vamubuyisela denari.

20   Aku ku vone: “I xifaniso xa mani lexi ni mazritu lamatsraliwiki laha kee?”

21   Vaku: “I sva Khezari.” Kutani aku ku vone: “Xisvosvo, tlheliselani Khezari sva Khezari, na Xikwembu Nkulukumba sva Xikwembu Nkulukumba.”

22   Kutani loko vayingela lesvo, vahlamala; kutani vamutsrhika, vakhoma ndlela.

23   Hi siku dzrodzro, vasaduki, lavaliki aku na kupfuka ka vafi, vamutela, vamuvutisa lesvi:

24   “Mudondzrisi, Moxe ati: ‘Loko mhunu afa na ange na vana, makwavu aachate ni nsati wakwe, atapfuxela makwavu xiloso.’

25   Kutani, kavi ni ntlhanu wa vamakwavu na vabizri amakazri kwezru. Lwewa kusungula achata agama afa na ange na vana, asiyela makwavu nsati.

26   Kutani sviva xisvosvo ku lwewa vubizri ni lwewa vuzrazru, kuyatlhasa ku hinkwavu va ntlhanu na vabizri.

27   Hi vugamu, lwe wansati afa.

28   Ke, akupfukeni ka vafi, lwe wansati atava nsati wa mani ku lava ntlhanu na vabizri? Hikusa hinkwavu vachati naye.”

29   Yesu avahlamula, aku: “N’wilahlekile, hikusa an’wimativi Matsralwa nambi ntamu wa Xikwembu Nkulukumba.

30   Hikuva akupfukeni ka vafi, vhanu avachati nambi kuchatisiwa, kambe vafana ni tintsrumi letinga tilweni.

31   Nangweso, mayelanu ni kupfuka ka vafi, an’widondzranga lesvingahlayiwa ku n’wine ha Xikwembu Nkulukumba, aku:

32   ‘Hi mine Xikwembu Nkulukumba wa Abrahamu, ni Xikwembu Nkulukumba wa Izaki, ni Xikwembu Nkulukumba wa Yakobe’? Ahi Xikwembu Nkulukumba wa vafi, kambe i Xikwembu Nkulukumba wa lavahanyaka.”

33   Kutani loko sviyingela lesvo, svitsrhungu svihlamala hi dondzro yakwe.

34   Kutani loko vafarisi vayingela lesvaku apfali nomu vasaduki, vabuya kun’we.

35   Kutani mun’we wa vone, lweyi afaka ali ntivi ya Nawu, amudzringa hi kumuvutisa, aku:

36   “Mudondzrisi, andzreni ka Nawu hinkwawu, hi xini xileleto lexikulu xa kone?”

37   Kutani aku ku yene: “‘Zrandzra Yehovha, Xikwembu Nkulukumba waku, hi mbilu yaku hinkwayu, ni hi hika dzraku hinkwadzru, ni hi miyanakanyu yaku hinkwayu.’

38   Lexi hi xo xileleto lexikulu ni lexa kusungula.

39   Lexa vubizri, xa kufana na xone, hi lexi: ‘Zrandzra walekwenu xilesvi utizrandzrisaka xisvone.’

40   Ahenhla ka svileleto lesvi kubekiwi masungulu ya Nawu hinkwawu ni vaprofeta.”

41   Kutani loko vafarisi vahlengeletanile, Yesu avavutisa aku:

42   “N’wili yini ha Kriste? I n’wana wa mani kee?” Vaku ku yene: “Wa Davhida.”

43   Avavutisa, aku: “Ke, sviyencekisa kuyini kuva Davhida, hi kuhuhuteliwa hi moya amuvitana Hosi, aku:

44   ‘Yehovha ati ku Hosi yanga: “Tsrhamisa axineneni xanga ndzriko ndzribeka valala vaku ahansi ka minkondzro yaku”’?

45   Ke, loko Davhida amuvitana Hosi, xana sviyencekisa kuyini kuva ava n’wanakwe?”

46   Kutani kungavi na mhunu wa kukota kumuhlamula hi zritu ni dzrin’we. Nakone kusukela asikwini dzrodzro, akahavanga na mhunu lwatiyiki kutlhela amuvutisa xanchumu.