BRX

1   Kutani ankama lowu vatsrhindzrekelaka kusuhi na Yerusalema vava vatlhasa Betifaxje le Nhaveni ya Minhlwazri, Yesu azruma vadondzrisiwa vabizri,

2   aku ku vone: “Nhingenani axidoropaneni lexiya n’wixivonaka. Kutani n’witatekela kukuma mbongolo na yitsrimbiwile, kun’we ni n’wana wa yone. Titlhantlhani n’witibuyisa ku mine.

3   Loko mhunu achuka an’wiyangula sva kukazri, hlayani lesvaku Hosi yativilela. Kutani loko ayingela lesvo, atatekela kun’witsrhika n’wibuya na tone.”

4   Kutani lesvo sviyencekile, akuva kuhetiseka lesvihlayiwiki hi muprofeta, lwatiki:

5   “Bzela n’wana wa xisati wa Ziyoni, uku: ‘Wasvivona! Hosi yaku yakubuyela; yatitsrongahata nakone yifamba hi mbongolo, xinga ximbongolwana, n’wana wa xihazri xa kuzrwala.’”

6   Kutani vadondzrisiwa vafamba vayayencisa xisvosvi Yesu avaleletisiki xisvone.

7   Vabuyisa mbongolo ni n’wana wa yone vava vabeketela mijansi yavu henhla ka tone, kutani atitsrhamela.

8   Kutani xitsrhungu lexikulu xiyandlalela mijansi ya xone axitaratwini, na vambeni vatsrema tinkambu aminsinyeni vatiyandlalela axitaratwini.

9   Kutani svitsrhungu lesvi afaka svifamba mahlweni kwakwe ni lesvi afaka svimulandzra he ntsrhaku afa svibandlukana, sviku: “Huluxa, hokombela, N’wana Davhida! Aakhensiwe lweyi abuyaka hi vito dzra Yehovha! Huluxa, hokombela, ahenhlahenhla!”

10   Kutani loko anhingena Yerusalema, doropa hinkwadzru dzritalataleka, dzriku: “Xana i mani lweyi?”

11   Kutani svitsrhungu sviku: “Lweyi i muprofeta Yesu, wa le Nazareta wa Galileya!”

12   Kutani Yesu anhingena atempeleni ahlongola hinkwavu lava afaka vaxavisa ni kuxava atempeleni, abakanyisa matafula ya vacincisi va mali ni svitsrhamu sva lavaxavisaka matuva.

13   Agama aku ku vone: “Kutsraliwi lesvi: ‘Yindlu yanga yitavitaniwa yindlu ya xikhongoto.’ Kambe n’wine n’wiyiyenca mhakwa ya vayivi.”

14   Kutani vhanu va kuka vangavoni ni va kukhuta vamuyela atempeleni, avahanyisa.

15   Kutani loko vaprista lavakulu ni vatsrali vavona mahlolana lawa afaka amayenca ni svifanyatana lesvi afaka svibandlukana atempeleni, na sviku: “Huluxa, hokombela, N’wana Davhida”, vahlundzruka,

16   vaku ku yene: “Wasviyingela lesvi lava vasvihlayaka?” Yesu aku ku vone: “Ina. Xana an’wingidondzra lesvi: ‘Anon’wini wa vatsrongwana ni wa svivanana lesvahayan’waka, uhumexi lidzrumu?’”

17   Kutani asuka avasiya, ahuma adoropeni aya Betanya, ayayetlela kone.

18   Kutani ankama lowu atlhelelaka adoropeni ximixweni svinene, atwa ndlala.

19   Kutani loko avona nkuwa axitaratwini awuyela, kambe angakumi nchumu handle ka makamba ntsena. Kutani aku ku wone: “Kungahachuke kutlhela kuhuma handzru ku wene!” Kutani nkuwa wutekela kuwoma.

20   Kutani loko vadondzrisiwa vasvivona, vahlamala, vaku: “Xana nkuwa lowu wuwomisi kuyini hi nkamanyana?”

21   Kutani Yesu avahlamula, aku: “Ndzrihlayela mfuzri ndzrili ku n’wine: Loko n’wiva ni lipfumelo, n’witlhela n’wingaganaganeki, n’wingatiyenca ntsena lesvi ndzrisviyenciki ku nkuwa lowu, kambe nambi n’wobzela nhava leyi, n’wiku: ‘Suka uyapela lwandle’, svitayenceka.

22   Kutani hinkwasvu n’wisvikombelaka hi xikhongoto, na n’wi ni lipfumelo, n’witasvikuma.”

23   Kutani loko anhingeni atempeleni, vaprista lavakulu ni vakulu va tiko vamubuyela na adondzrisa, vaku: “Uyenca lesvi hi ntamu muni? Nakone i mani akunyikiki ntamu lowu?”

24   Kutani Yesu avahlamula, aku: “Na mine ndzritan’wivutisa nchumu wun’we. Loko n’windzribzela, na mine ndzritan’wibzela lesvaku ndzriyenca lesvi hi ntamu wini:

25   Xana babatiso dzra Yohani afa dzripfa kwini? Atilweni kumbe avhanwini?” Kutani vasungula kuvonisana hi xivone, vaku: “Loko ho: ‘Atilweni’, ataku ku hine: ‘Ke, hayini n’wingakholwanga ku yene?’

26   Kambe loko ho: ‘Avhanwini’, hichava xitsrhungu lexi hikusa hinkwavu vali Yohani i muprofeta.”

27   Kutani vahlamula Yesu, vaku: “Ahisvitivi.” Na yene, ke, aku ku vone: “Na mine andzrin’wibzeli lesvaku ndzriyenca lesvi hi ntamu wini.

28   “Kambe n’wisvivonisa kuyini? Tatana muni afa a ni vana vabizri. Atiki ayela lwewa kusungula, aku: ‘N’wananga, famba uyatizra ansin’wini yanga ya mavhinya namunhla.’

29   Kutani n’wana lweyo amuhlamula, aku: ‘Ndzringatiya’, kambe antsrhaku, atitwa nandzru, ahuma afamba.

30   Atiki atsrhindzrekela ku lwewa vubizri, ahlaya svo sva svin’we, kutani ahlamula, aku: ‘Hi svone, Tata’, kambe agama angayi mbangu.

31   Hi wini ku lavabizri lweyi ayenciki kuzrandzra ka tatana wakwe kee?” Vahlamula, vaku: “Hi lwewa kusungula.” Yesu aku ku vone: “Ndzrihlayela mfuzri ndzrili ku n’wine: Vahakelisi va tinemba ni tinghwavana van’wichangwela kunhingena amfun’wini wa Xikwembu Nkulukumba.

32   Hikusa Yohani an’witelile hi ndlela ya kululama, kambe n’wine an’wikholwanga ku yene. Kambe vahakelisi va tinemba ni tinghwavana vakholwile ku yene; kasi n’wine, nambilesvi n’wisvivoniki lesvo, an’wigamanga hi kutitwa nandzru akuva n’wikholwa ku yene.

33   “Yingisetani xifaniso xin’wana: afa ku ni mhunu, wa n’winyi wa muti, lwabzaliki nsimu ya mavhinya ayibiyela matlhelo hinkwawu, ava akela xipfuvelo xa vhinyo, ayaka ni xihondzro, agama ayivolekisa ku vadzrimi, ayendzrela matiko man’wana.

34   Loko kutlhasa nkama wa mihandzru, azruma malandzra yakwe ku vadzrimi vayateka mihandzru yakwe.

35   Kambe vadzrimi vakhoma malandzra yakwe, mun’we vamukwapa, mun’wana vamudlaya, mun’wanyana vamukhandla hi mazribze.

36   Atlhela azrumela malandzra mambeni, ya kutlula ya kusungula, kambe vamayenca svo sva svin’we.

37   Hi vugamu avazrumela n’wanakwe, na aku: ‘Lesvi anga n’wananga, vatamubekela xichavu.’

38   Kambe loko vavona n’wanakwe, vadzrimi vabzelana, vaku: ‘Hi lweyi madapfindla. Tanani himudlaya, hiteka pfindla dzrakwe!’

39   Kutani vamukhoma vamucukumeta handle ka nsimu ya mavhinya, vamudlaya.

40   Xilesvo, loko n’winyi wa nsimu ya mavhinya abuya, xana atavayenca yini vadzrimi lavo?”

41   Vaku ku yene: “Lesvi vabihiki, atavasuvisa hi ndlela leyichavisaka. Kutani nsimu ya mavhinya atayivolekisa ku vadzrimi van’wana, lavatakamunyika mihandzru loko kutlhasa nkama wa yone.”

42   Yesu aku ku vone: “Xana an’wingidondzra lesvi Matsralweni: ‘Zribze ledzri vayaki vadzridzreliki hi dzrone dzringayenciwa zribze ledzra lisima dzra masungulu. Lesvi svipfa ku Yehovha, mfuzri svahlamalisa amahlweni yezru’?

43   Hi mhaka yoleyo ndzriliki ku n’wine: Mfumu wa Xikwembu Nkulukumba wutatekiwa ku n’wine wunyikiwa tiko ledzripsalaka mihandzru ya dzrone.

44   Nangweso, lweyi atakawa ahenhla ka zribze ledzro, atapshandlaka, kasi lweyi dzritakamuwela dzritamufuhlutela.”

45   Kutani loko vaprista lavakulu ni vafarisi vayingela svifaniso svakwe, vasvivona lesvaku akanela hi vone.

46   Kambe nambi vajula kumukhoma, afa vachava svitsrhungu, hikusa afa sviku i muprofeta.