-
Matewu 19
1 Kutiloko Yesu aheti mazritu lawa, asuka Galileya aya mugangeni wa Yudeya, hi tlhelo dzra halahaya ka nambu wa Yordani.
2 Kutani svitsrhungu lesvikulu svimulandzra, asvihanyisa kone.
3 Kutani vafarisi vamuyela na vajula kumudzringa; vamuvutisa, vaku: “Svapfumeleliwa kuva wanuna adlaya vukati ni nsati wakwe hi xivangelo xini na xini?”
4 Kutani avahlamula, aku: “An’widondzranga lesvaku Mutumbuluxi kusukela akusunguleni avayenci wanuna ni wansati,
5 ava aku: ‘Hi mhaka leyi, wanuna atasiya tatana wakwe ni mamana wakwe, anamazrela nsati wakwe, kutani hi vubizri vatava nyama yin’we’?
6 Xilesvo, avehe vabizri, kambe i nyama yin’we. Xisvosvo, lesvi Xikwembu Nkulukumba asvitlhanganisiki, mhunu angachuke asvihambanisa!”
7 Vaku ku yene: “Ke, hayini Moxe aleleti lesvaku wansati anyikiwa papela dzra kudlaya vukati, ahlongoliwa?”
8 Aku ku vone: “Moxe an’wipfumeleli kudlaya vukati ni vasati venu hi mhaka ya kutiyela ka timbilu tenu, kambe kusukela akusunguleni afa svinge xitanu.
9 Kutani ndzrin’wibzela lesvaku lweyi adlayaka vukati ni nsati wakwe na kunge hi mhaka ya vugangu, agama ateka mun’wana, ayenca vumbuye.”
10 Vadondzrisiwa vaku ku yene: “Loko svitsrhamisisi xilesvo ku wanuna ni nsati wakwe, svayampsa kuva mhunu angachati.”
11 Kutani aku ku vone: “Ahi hinkwavu vayamukelaka zritu ledzro, kambe ntsena lavanyikiwiki.
12 Hikusa ku ni va kutsrhama na vangachatanga vangapsalisiwa xisvosvo, kutlhela kuva ni va kutsrhama na vangachatanga vangayenciwa hi vhanu, kutlhela kuva ni va kutsrhama na vangachatanga vangatiyenca ha bzavu hi mhaka ya Mfumu wa matilo. Lweyi asvikotaka kusviyamukela aasviyamukele.”
13 Kutani vamubuyisela svivanana akuva asvitlhanteka mavoko ni kusvihambela xikhongoto, kambe vadondzrisiwa vavakhwavela.
14 Kambe Yesu aku: “Tsrhikani svivanana lesvo; n’wingasvitsimbeni kuta ku mine, hikusa Mfumu wa matilo i wa lava kutsrhamisisa xilesvi.”
15 Kutani asvitlhanteka mavoko agama asuka kone.
16 Kutani kutlhasa mun’we ku yene, aku: “Mudondzrisi, ndzrifanela kuyenca yini sva svinene akuva ndzrikuma vutomi lebzingahelikiki?”
17 Kutani aku ku yene: “Undzrivutisela yini hi lesvinga sva svinene? Ova mun’we ntsena lwanga munene. Kambe, loko ujula kunhingena avuton’wini, landzra svileleto minkama hinkwayu.”
18 Aku ku yene: “Svini sva kone?” Kutani Yesu aku: “Ungadlaye mhunu, ungayence vumbuye, ungayive, ungabeke vumboni bza madzrimi;
19 kombisa xichavu ku tatana waku ni mamana waku, zrandzra walekwenu xilesvi utizrandzrisaka xisvone.”
20 Jaha ledzro dzriku ku yene: “Lesvo hinkwasvu ndzrasvilandzra; kahakiyela yini kwanga?”
21 Yesu aku ku yene: “Loko ujula kuhelela hi matlhelo hinkwawu, famba uyaxavisa minchumu yaku, uteka mali ya kone uhanana svisiwana, kutani utava ni vukosi atilweni; ugama ubuya undzrilandzra.”
22 Loko jaha ledzro dzriyingela lesvo, dzrisuka dzrifamba na dzrivavisekile, hikusa afa dzri ni vukosi bzinyingi.
23 Kutani Yesu aku ku vadondzrisiwa vakwe: “Ndzrihlayela mfuzri ndzrili ku n’wine: Svitamubindzrela mhunu lwanga xipfundzri kunhingena amfun’wini wa matilo.
24 Nakone mfuzri ndzrili ku n’wine: Svitanabzalela kamele kunhingena hi mbhovo wa ximazri kutlula kuva mhunu lwanga xipfundzri anhingena amfun’wini wa Xikwembu Nkulukumba”
25 Kutani loko vadondzrisiwa vayingela lesvo, vahlamala ngopfu svinene, vaku: “Ke, hi mani lwangahulukaka?”
26 Kutani Yesu avalangusisa, aku ku vone: “Ku vhanu lesvi asvikoteki, kambe ku Xikwembu Nkulukumba hinkwasvu svakoteka.”
27 Kutani Petrosi ahlamula, aku: “Phela hine hitsrhiki hinkwasvu hikulandzra; kutani ke, hitakuma yini?”
28 Kutani Yesu aku ku vone: “Ndzrihlayela mfuzri ndzrili ku n’wine n’wingandzrilandzra: ankameni wa kupfuxetiwa ka minchumu, loko N’wana wa Mhunu atsrhamisa axiluvelweni xakwe lexiphatimaka, na n’wine n’witatsrhamisa asviluvelweni sva khume na svibizri, n’wiyavanyisa tinxaka ta khume na tibizri ta Yisrayele.
29 Nakone mani na mani lwasiyiki tiyindlu, kumbe vamakwavu va xinuna kumbe va xisati, kumbe tatana, kumbe mamana, kumbe vana, kumbe masimu, hi nkonta yanga atayamukela kadzana sva kufana, atlhela akuma vutomi lebzingahelikiki.
30 “Kambe vanyingi vanga va kusungula vatava va vugamu, ni lava vanga va vugamu vatava va kusungula.