BRX

1   Kutani vafarisi ni vasaduki vatsrhindzrekela ku yene, vamukombela kuvakomba hlolana dzra kupfa hi le tilweni, kumudzringa.

2   Kutani avahlamula, aku: “Loko dambu dzripela, n’wili: ‘Maxela matava manene hikusa tilo dzrizukile’,

3   ni le mixweni N’wili: ‘Namunhla kutava ni moya ni mpfula, hikusa tilo dzrizukile nakuve ku ni mphumelo.’ N’wasvitiva kutlhamuxela lesvi matsrhamela ya tilo majulaka kuhlaya svone, kambe lesvi svikombiso sva minkama svijulaka kuhlaya svone an’wisvikoti kusvitlhamuxela.

4   Lixaka dzra kubiha ni dzra vumbuye dzrili dzrijula kuvona hlolana, kambe dzringatinyikiwa hlolana ni dzrin’we handle ka hlolana dzra Yonasi.” Afambisa xisvosvo, avasiya.

5   Kutani vadondzrisiwa vawelela halahaya ka lwandle, kambe vadzrivala kuteka makati.

6   Kutani Yesu aku ku vone: “Tsrhamani na n’wipfuli mahlo, n’witivonela ku handzrelo ya vafarisi ni vasaduki.”

7   Kutani vasungula kudzrimuxana, vaku: “O! Ahibuyanga nawu makati!”

8   Kambe loko ativa lesvo, Yesu aku: “N’wiholovisanela yini hilesvi n’wingeke na makati, n’wine va lipfumelo dzritsrongo?

9   An’wisvitwisisi, kumbe an’wimadzrimuki ntlhanu wa makati lawa kudiki lava ntlhanu wa makume ya madzana ni lesvaku n’witeki mintsrhava mingani?

10   Kumbe makati laya ntlhanu na mabidzri lawa kudiki lava mune wa makume ya madzana ni lesvaku n’witeki svihundzru svingani?

11   Sviyencekisa kuyini kuva n’wingasvitwisisi lesvaku afa ndzringakaneli na n’wine hi makati? Kambe tivonelani ku handzrelo ya vafarisi ni vasaduki.”

12   Hi kone vatwisisiki lesvaku afa angahlayi lesvaku vativonela ku handzrelo ya makati, kambe vativonela ku dondzro ya vafarisi ni vasaduki.

13   Kutiloko anhingeni amugangeni wa Khezariya wa Filipi, Yesu avutisa vadondzrisiwa, aku: “Xana vhanu vali N’wana wa Mhunu i mani?”

14   Kutani vaku: “Van’we vali i Yohani Mubabatisi, van’wana vali i Eliya, kasi van’wanyana vali i Yeremiya kumbe mun’we wa vaprofeta.”

15   Aku ku vone: “N’wine ke, n’wili hi mine mani?”

16   Kutani Simoni Petrosi ahlamula, aku: “Wene u Kriste, N’wana wa Xikwembu Nkulukumba lwahanyaka.”

17   Kutani Yesu amuyangula, aku: “U ni njombo wene, Simoni, n’wana Yonasi! Hikusa lesvo awupfuleteliwanga hi nyama ni ngati, kambe hi Tatana wanga lwanga matilweni.

18   Na mine, ndzrili ku wene: Wene u Petrosi. Kutani azribzeni ledzri ndzritayaka bandla dzranga, nakone tinyangwa ta Xizra tingatidzrihlula.

19   Ndzritakunyika mimpfungulu ya Mfumu wa matilo, kutani xin’wana ni xin’wana lexi uxitsrimbaka amisaveni xitava na xitsrimbiwile amatilweni, nakone xin’wana ni xin’wana lexi uxitlhantlhaka amisaveni xitava na xitlhantlhiwile amatilweni.”

20   Kutani aleleta svinene vadondzrisiwa vakwe akuva vangabzeli mhunu ni mun’we lesvaku i Kriste.

21   Kusukela ankameni wolowo, Yesu asungula kutlhamuxela vadondzrisiwa vakwe lesvaku afanela kuya Yerusalema ayaxanisiwa svinene hi vakulu ni vaprista lavakulu ni vatsrali, ava adlayiwa, agama apfuxiwa hi siku dzra vuzrazru.

22   Kolahu Petrosi amuteka hi tlhelo asungula kumukhwavela, aku: “Titsretsrelele, Hosi; lesvo ungasvitsrhike svikuyencekela ni kutsrongo.”

23   Kambe afulazra, aku ku Petrosi: “Suka aphambheni kwanga, Sathana! Wene u xikhunguvanyiso ku mine, hikusa awupimisi sva Xikwembu Nkulukumba, kambe upimisa sva vhanu.”

24   Kutani Yesu aku ku vadondzrisiwa vakwe: “Loko mhunu ajula kundzrilandzra, aatitsrhike, azrwala mhandzre yakwe, andzrilandzrelela.

25   Hikusa lweyi ajulaka kuhuluxa vutomi bzakwe atalahlekeliwa hi bzone, kambe lweyi alahlekeliwaka hi vutomi bzakwe hi mhaka yanga atabzikuma.

26   Hikuva, svitamupfuna yini mhunu loko akota kukuma misava hinkwayu kambe alahlekeliwa hi vutomi bzakwe? Kumbe i mpsini lesvi mhunu atakacincisa vutomi bzakwe ha svone?

27   Hikusa N’wana wa Mhunu atabuya akuphatimeni ka Tatana wakwe ni tintsrumi takwe. Kutani ankameni wa kone atahakela mun’wana ni mun’wana hi kulandzra hanyela dzrakwe.

28   Ndzrihlayela mfuzri ndzrili ku n’wine: Ku ni van’we ku lavayimiki la lavangatikidzringa lifu ni kutsrongo na vangazranganga hi kuvona N’wana wa Mhunu na abuya amfun’wini wakwe.”