BRX

1   Ankameni lowo, Yesu ahundzra he masin’wini ya tizriku hi Savata. Kambe vadondzrisiwa vakwe afa vatwa ndlala, kutani vasungula kukhaya mimoko vada.

2   Loko vavona lesvi, vafarisi vaku ku yene: “Hingalavisa! Vadondzrisiwa vaku vayenca sva kuka svingapfumeleliwi kusviyenca hi Savata.”

3   Aku ku vone: “An’widondzranga lesvi Davhida asviyenciki loko yene ni masocha yakwe vatwa ndlala?

4   Anhingeni andlwini ya Xikwembu Nkulukumba, ada navu makati ya magandzrelo, svinga lesvi afaka svingapfumeleliwi kuva yene kumbe lava afaka vali naye vada, handle ka vaprista ntsena!

5   Kumbe an’widondzranga abukwini dzra Nawu lesvaku hi masiku ya Savata vaprista lavanga tempeleni vatlula nawu wa Savata kambe avahlayeliwi nandzru?

6   Kambe ndzran’wibzela lesvaku laha ku ni wa kutlula ni tempele hi vukulu.

7   Kambe, loko afa n’wetwisisa lesvaku majula kuhlaya yini mazritu lamaliki: ‘Lexi ndzrixijulaka i timpsalu, kunge xitlhavelo’, inha n’wingasolanga lavangeke na nandzru.

8   Hikusa N’wana wa Mhunu i Hosi ya Savata.”

9   Loko asuki kone, anhingeni asinagogeni dzravu.

10   Kutani akuma lesvaku ku ni mhunu lwakhwanyaliki voko! Kutani vamuvutisa, navajula kumuzrwexa nandzru, vaku: “Svapfumeleliwa kuhanyisa hi Savata?”

11   Aku ku vone: “I mani amakazri kwenu lweyi, loko yin’we ya tihamba takwe yopela axikheleni hi Savata, angeke na kuyikhoma ayihumexa?

12   Mhunu a ni lisima dzrikulu ngopfu svinene kutlula hamba! Xilesvo, svapfumeleliwa kuyenca nchumu lowunene hi Savata.”

13   Kutani aku ku mhunu lweyo: “Nalavuta voko.” Lesvi adzrinalavutiki; kutani dzriwololoka dzrihanya kufana ni ledzrin’wana.

14   Kambe vafarisi vahuma vayamulukela xikungu xa kumudlaya.

15   Kutiloko Yesu asvitivile, asuka kolahu. Kambe vanyingi vamulandzra, kutani avadaha hinkwavu,

16   kambe avaleleta svinene lesvaku vangamupaluxi,

17   akuva kuhetiseka lesvihlayiwiki hi muprofeta Ezaya, lwatiki:

18   “N’wamuvona nandzra wanga, lweyi ndzrimulangiki, muzrandzriwa wanga, lweyi hika dzranga dzrinyonxaka ha yene! Ndzritabeka moya wanga ahenhla kwakwe, kutani atadzrungulela matiko vululami.

19   Angatiholova kumbe kubandlukana, nambi zritu dzrakwe dzringatiyingeliwa hi mhunu asvitaratwini.

20   Lihlanga ledzritsrhovekiki, angatidzripfatlanya, ni xiphefu lexifumfunhaka, angatixitima, ako ayenca vululami bzihlula.

21   Nakone vhanu va matiko vatadumba vito dzrakwe.”

22   Ankameni lowo, vamubuyisela mhunu lweyi afaka a ni demona, wa kuka angavoni kumbe kuvulavula; kutani amudaha. Mhunu wa kuka angavulavuli asungula kuvulavula ni kuvona.

23   Kutani svitsrhungu hinkwasvu svihlamala, sviku: “Njhe, lweyi ahi yene N’wana Davhida?”

24   Loko vasviyingela, vafarisi vaku: “Lweyi, ntamu lowu ahlongolaka mademona ha wone ahi wumbeni handle ka wa Belzebule, hosi ya mademona.”

25   Hi kutiva mimpimiso yavu, aku ku vone: “Mfumu wun’wana ni wun’wana lowuyavaniki wutasala na wuli zrumbi, nakone doropa dzrin’wana ni dzrin’wana kumbe yindlu yin’wana ni yin’wana leyiyavaniki ayi na kutiya.

26   Nangweso, loko Sathana ahlongola Sathana, ayavanile; ke, mfumu wakwe wutatiyisa kuyini?

27   Nangweso, loko mine ndzrihlongola mademona ha Belzebule, vana venu vamahlongola ha mani? Hi mhaka yoleyi vatakan’wiyavanyisa.

28   Kambe loko ndzrihlongola mademona hi moya wa Xikwembu Nkulukumba, ke, Mfumu wa Xikwembu Nkulukumba wun’witlhaselile.

29   Kumbe, xana mhunu angapfhanyisa kuyini yindlu ya mhunu wa ntamu ateka minchumu yakwe na angazranganga hi kumutsrimba? Hi kone angaphangaka yindlu yakwe.

30   Lweyi angayimikiki na mine alwa na mine, nakone lweyi angahlengeletikiki na mine awahangalasa.

31   “Hi mhaka leyi ndzrili ku n’wine: Svidoho ni svisandzru hinkwasvu sva vhanu svitadzrivaleliwa, kambe xisandzru xa kusandzra moya xingatidzrivaleliwa.

32   Nangweso, lweyi asandzraka N’wana wa Mhunu atadzrivaleliwa; kambe lweyi asandzraka moya lowa kuxwenga, angatidzrivaleliwa, nambi ku misava ya nkama lowu, nambi ku lemitaka.

33   “Muzri, wuyencani vunene, kutani mihandzru ya wone mitava minene, kumbe n’wiwuyenca wa kubola, kutani mihandzru ya wone miva ya kubola; hikusa muzri wutibziwa hi mihandzru ya wone.

34   Vana va svipshahla, xana n’wingavulavulisa kuyini minchumu leminene na kasi n’wibihile? Hikusa nomu wuvulavula lesvi mbilu yitaliki ha svone.

35   Mhunu lwenene ahumexa minchumu leminene avukosini bzakwe lebzinene, kasi mhunu wa kubiha ahumexa minchumu ya kubiha avukosini bzakwe bza kubiha.

36   Ndzrin’wibzela lesvaku hi siku dzra yavanyiso vhanu vatavutisiwa hi nkonta ya zritu dzrin’wana ni dzrin’wana dzra kuka ndlela ledzri vadzrivulavulaka;

37   hikusa utahlayiwa lesvaku ululamile hi kola ka mazritu yaku, nakone utahlayiwa lesvaku ubihile hi kola ka mazritu yaku.”

38   Kutani, van’we va vatsrali ni vafarisi vamuyangula, vaku: “Mudondzrisi, hijula uyenca hlolana hi kuvona.”

39   Avahlamula aku ku vone: “Lixaka dzra kubiha ni dzra vumbuye dzrili dzrijula hlolana, kambe dzringatinyikiwa hlolana ni dzrin’we handle ka hlolana dzra muprofeta Yonasi.

40   Hikusa svanga hesvi Yonasi aviki akhuzrini dzra nhlampfi leyikulu masiku mazrazru ni vusiku bzizrazru, na ye N’wana wa Mhunu atava ndzreni ka misava masiku mazrazru ni vusiku bzizrazru.

41   Vhanu va le Ninivha vatapfuka akuyavanyisiweni ni lixaka ledzri vava vadzritsremela xikhatiso, hikusa vone vatisolile loko Yonasi azrezra. Kambe lavisani, kola ku ni lweyi atlulaka Yonasi hi vukulu.

42   Nkosikazi ya nyingitimu yitapfuxiwa akuyavanyisiweni ni lixaka ledzri yiva yidzritsremela xikhatiso, hikusa yiti hi le matikweni ya le kule ya misava akuva yitatayingiseta vutlhazri bza Salomoni. Kambe lavisani, kola ku ni lweyi atlulaka Salomoni hi vukulu.

43   “Loko moya lowunyamiki wuhuma amhunwini, wuhundzra hi le mimbangwini lemingeke na mati na wujula mbangu wa kuwisela ku wone, kambe wungawukumi.

44   Kutani wuku: ‘Ndzritatlhelela akaya kwanga lomu ndzrizruzriki kone.’ Kutani loko wutlhasa, wukuma yindlu na yili phanga, yikukuliwi yibasa yitlhela yixongisiwa.

45   Kutani wufamba wuyateka mimoya mimbeni ya ntlhanu na mibizri ya kubiha ngopfu kutlula wone, kutani minhingena ndzreni, mitsrhama kone; kutani xiyimu xa vugamu xa mhunu lweyo xibiha ngopfu kutlula lexa kusungula. Hi svosvi svitakayencekisa xisvone ku lixaka ledzri dzra kubiha.”

46   Ati na ahakanela ni svitsrhungu, kotlhasa mamana wakwe ni vamakwavu vayima handle, na vajula kukanela naye.

47   Kutani mun’we aku ku Yesu: “Lavisa, mamana waku ni vamakwenu veyima hala handle, vajulaka kukanela na wene.”

48   Kutani amuhlamula, aku: “Mamana wanga hi mani, ni vamakwezru hi vamani?”

49   Agama akombeta vadondzrisiwa vakwe hi voko, aku: “N’wamuvona mamana wanga ni vamakwezru!

50   Hikusa lweyi ayencaka kuzrandzra ka Tatana wanga lwanga tilweni, hi yelweyo anga makwezru wa xinuna, ni makwezru wa xisati, ni mamana wanga.”