-
Matewu 11
1 Loko Yesu aheti kunyika svileleto vadondzrisiwa vakwe lava khume na vabizri, asuki kone ayadondzrisa ni kuzrezra amadoropeni yavu.
2 Kambe loko Yohani ayingela mintizro ya Kriste na ali abohelweni, azrumela vadondzrisiwa vakwe,
3 vayamuvutisa, vaku: “Hi wene Lweyi ataka, kumbe hifanela kuyimela mun’wana kee?”
4 Yesu avahlamula, aku: “Fambani n’wiyadzrungulela Yohani lesvi n’wisviyingelaka ni lesvi n’wisvivonaka:
5 Lava kuka vangavoni vavona; ni lava kukhuta vafamba hi milenge yavu; ni lava nhlokonho vabasisiwa; ni lavapfalekiki tindleve vayingela; ni vafi vapfuxiwa; ni svisiwana svibzeliwa madzrungula lamanene.
6 A ni njombo lweyi angakhunguvanyekikiki hi mhaka yanga!”
7 Kutani ankama lowu vasukaka, Yesu asungula kukanela ni svitsrhungu hi Yohani, aku: “N’wihumi n’wiyavona yini le huleni? N’wiyivona lihlanga na dzritsrekatsrekisiwa hi moya kee?
8 Ina ka, i yini lexi n’wihumiki n’wiyaxivona? I mhunu lwayambaliki sviyambalu sva kudula? Phela ka, lavayambalaka sviyambalu sva kudula vatsrhama tindlwini ta tihosi.
9 Ina ka, afa n’wihumela yini? Kuyavona muprofeta? Ina, ndzrin’wibzela lesvi: Ni wa kutlula ngopfu muprofeta.
10 Lweyi hi lweyi kutsraliwiki ha yene lesvi: ‘Lavisani! Ndzrizrumela muzrumiwa wanga amahlweni kwanga, lweyi atakalulamisela ndlela yaku amahlweni kwaku!’
11 Ndzrihlayela mfuzri ndzrili ku n’wine: Amakazri ka lavabelekiwiki hi vavasati, akungihumelela mhunu wa kutlula Yohani Mubabatisi hi vukulu. Kambe lwentsrongo, amfun’wini wa matilo, awamutlula hi vukulu.
12 Kusukela amasikwini ya Yohani Mubabatisi kutatlhasa svosvi, Mfumu wa matilo i nchumu lowu vhanu valwelaka kuwukuma, kutani lava vatihitaka vawukuma.
13 Hikusa hinkwavu vaprofeta ni Nawu vaprofeti vayagamela ku Yohani;
14 kutani loko n’wijula kusvipfumela, pfumelani: Hi ye Eliya lwataka.’
15 Lweyi anga ni tindleve aayingisete!
16 “Xana lixaka ledzri ndzritadzrifanisa na yini? Dzrifana ni vatsrongwana lavatsrhamiki lomuya bazara, vavitanaka vanghanu,
17 vaku: ‘Hin’wichayeli xitiloti, kambe n’wine an’wikinanga; hitlhavi lisimu dzra nkosi, kambe n’wine an’widzrilanga.’
18 Hikuva, Yohani ati na angadi nambi kunwa, kambe vhanu vali: ‘A ni demona.’
19 N’wana wa Mhunu ati na ada atlhela anwa, kambe vhanu vali: ‘Hingavonani mhunu wa magolo ni wa kuzrandzra kunwa vhinyo, munghanu wa vahakelisi va tinemba ni vadohi!’ Nambitanu, lexikombisaka lesvaku vutlhazri bzilulamile i mintizro ya bzone.”
20 Ankameni lowo, asungula kusola madoropa lawa ntalu wa mahlolana yakwe mangahambeliwa kone, hikusa amatisolanga, aku:
21 “Yowee, Korazini! Yowee, Betsayda! Hikusa loko mahlolana lamayencekiki atikweni dzrenu afa meyenceka Tire na Sidoni, inhaka matisoli khale na mayambali masaka matlhela maticheletela nozra.
22 Kambe ndzrili ku n’wine: Svitavevuka ku Tire na Sidoni hi siku dzra yavanyiso kutlula ku n’wine.
23 Na wene, Kapernawume, ungatitlakuxeliwa atilweni; utafulamela Xizreni. Hikusa loko mahlolana lamayencekiki atikweni dzraku afa meyenceka atikweni dzra Sodoma, inhaka dzrehe kone kutlhasa ni namunhla.
24 Kambe ndzrili ku n’wine: Svitavevuka ku tiko dzra Sodoma hi siku dzra yavanyiso kutlula ku n’wine.”
25 Kutani Yesu ayangula, aku: “Ndzrakudzrumisa, Tatana, Hosi ya tilo ni misava, hikusa ufihleli tintlhazri ni tintivi minchumu leyi kambe umipaluxeli vatsrongwana.
26 Ina, Tatana, hikusa usvinyonxeli hi ndlela yoleyo.
27 Hinkwasvu svinyiketiwi mine hi Tatana wanga, kutani anga kone lwativaka N’wana handle ka Tatana; nakone anga kone lwativaka Tatana handle ka N’wana, ni lweyi N’wana anyonxelaka kumukomba yene.
28 Tanani ku mine, hinkwenu n’wine n’wifomaka hi kutizra, na n’wine n’wibindzriwaka, ndzritan’wiwisisa.
29 Zrwalani mpinga wanga n’witlhela n’widondzra ku mine, hikusa ndzri mbulwa ni mhunu wa kutitsrongahata, kutani n’witakuma kupepa amahikeni yenu.
30 Hikusa mpinga wanga wanabzala, ni ntsrhwalu wanga wavevuka.”