BRX

1   Kutani avitana vadondzrisiwa vakwe va khume na vabizri, avanyika ntamu wa kuhlongola mimoya leminyamiki, ni kudaha mavabzi ya mixaka hinkwayu ni svivavu sva mixaka hinkwayu.

2   Kutani mavito ya khume dzra vapostola na vabizri hi lawa: Kusungula, Simoni, lwavitaniwaka Petrosi, na Andreye, makwavu; Yakobe, n’wana Zebedewu, na Yohani, makwavu;

3   Filipi na Bartolomewu; Tomasi na Matewu, muhakelisi wa tinemba; Yakobe, n’wana Alfewu; Tadewu;

4   Simoni, mukanana; na Yuda Iskariyota, lweyi angagama amudlayisa.

5   Yesu azruma lava khume na vabizri, avaleleta lesvi: “N’winganhingeni axitaratwini xa va matiko, nakone n’winganhingeneni adoropeni ni dzrin’we dzra vasamariya;

6   kambe, amatsrhan’wini ya lesvo, kongomani ku tihamba letilahlekiki ta yindlu ya Yisrayele.

7   Ankama lowu n’wifambaka, zrezrani n’wiku: ‘Mfumu wa matilo wutsrhindzrekelile.’

8   Dahani timbabzi, pfuxani vafi, basisani lavanga ni nhlokonho, hlongolani mademona. N’winyikiwi hi mahala, nyikani hi mahala.

9   N’wingatekeni mali amaphakitini yenu,

10   kumbe nkwama wa manghunghu ya kuda hi ndlela, kumbe sviyambalu svibizri, kumbe tintangu, kumbe nhonga, hikusa mutizri afaneliwa hi mphamu wakwe.

11   “Adoropeni dzrini na dzrini kumbe axidoropanini xini na xini lomu n’winhingenaka kone, julisisani lweyi svimufanelaka, n’witsrhama kone n’wiko n’wisuka.

12   Kutani loko n’winhingena amutini, wuloselani.

13   Loko muti wa kone sviwufanela, kuzrula kwenu akuve henhla ka wone; kambe loko svingawufaneli, kuzrula kwenu akutlhelele ku n’wine.

14   Mani na mani lwakaka angan’wiyamukeli kumbe angayingiseti mazritu yenu, loko n’wihuma amutini wa kone kumbe doropeni dzra kone, phumunani ntsrhuzri amilengeni yenu.

15   Ndzrihlayela mfuzri ndzrili ku n’wine: Svitavevuka ku tiko dzra Sodoma na Gomora hi siku dzra yavanyiso kutlula ku doropa ledzro.

16   “Phela ndzrin’wizrumela svanga tihamba amakazri ka mahava. Xilesvo, tlhazrihani kufana ni tinyoka kambe n’wiva va timbilu ta kubasa kufana ni matuva.

17   Tivonelani ku vhanu, hikusa vatan’wiyisa akuthethisiweni, van’wikwapa amasinagogeni yavu.

18   Nakone vatan’wiheketa ku tihosi ta svifundzrankulu ni tihosi ta tiko hinkwadzru hi mhaka yanga, akuva bziva vumboni ku vone ni ku matiko.

19   Kambe, loko van’winyikela, n’wingahlatiyeleni hi lesvi n’witakavulavulisa xisvone kumbe lesvi n’witakasvihlaya, hikusa lesvi n’wifanelaka kusvihlaya, n’witanyikiwa svone hi nkama wolowo;

20   hikusa ahi n’wine n’wivulavulaka, kambe i moya wa Tatana wenu lowuvulavulaka ha n’wine.

21   Nangweso, makwavu atanyikela makwavu akuva adlawa, ni tatana atanyikela n’wanakwe, ni vana vatajikela vapsele, vavadlayisa.

22   Nakone n’witavengiwa hi vhanu hinkwavu hi kola ka vito dzranga, kambe lweyi atiyiselaka kuyatlhasa avugan’wini atahuluxiwa.

23   Kutani loko van’wixanisa adoropeni dzra kukazri, tsrutsrumelani ku dzrin’wana; hikusa ndzrin’wibzela xihlayelamfuzri, ndzriku: N’wingatitlhanganisa madoropa hinkwawu ya Yisrayele na N’wana wa Mhunu angasitlhasa.

24   “Mudondzrisiwa angamutluli mudondzrisi wakwe, nambi nandzra angamutluli n’winyi wakwe.

25   Svadzringana loko mudondzrisiwa afana ni mudondzrisi wakwe, ni nandzra afana ni n’winyi wakwe. Loko n’winyi wa muti vamuchuli lesvaku i Belzebule, akahahlayiwi ku svizro sva ndangu wakwe!

26   Xilesvo, n’wingavachaveni, hikusa aku na nchumu lowufihliwiki lowungatikigunguliwa, ni xihundla ni xin’we lexingatikitiviwa.

27   Lesvi ndzrin’wibzelaka amunyameni, svihlayani alivaningweni, ni lesvi n’wisviyingelaka hi kuhleveteliwa, svizrezrani ahenhla ka tiyindlu.

28   Nakone n’wingachaveni lavadlayaka mizri kambe vangeke na kudlaya hika. Kambe, amatsrhan’wini ya lesvo, chavani lweyi angasuvisaka hika ni mizri Xikheleni xa Kusuvisiwa.

29   Xana svinjingilitana svibizri avaxavisi hi nkinyenta? Nambitanu, aku na ni xin’we xa svone xiwaka ahansi na Tatana wenu angasvitivi.

30   Kambe nambi ova misisi hinkwayu ya tinhloko tenu minkontiwile.

31   Xilesvo, n’wingachaveni; n’witlula svinjingilitana sva svinyingi hi lisima.

32   “Xilesvo, mani na mani lwahlayaka lesvaku awandzritiva amahlweni ka vhanu, na mine ndzritahlaya lesvaku ndzramutiva amahlweni ka Tatana wanga lwanga matilweni.

33   Kambe lweyi andzrilandzrulaka amahlweni ka vhanu aku angandzritivi, na mine ndzritamulandzrula amahlweni ka Tatana wanga lwanga matilweni.

34   N’wingapimiseni lesvaku ndzriteli kubuyisa kuzrula amisaveni; andzritelanga kubuyisa kuzrula, kambe ndzriteli kubuyisa lipanga.

35   Hikusa ndzriteli kutatahambanisa mhunu ni tatana wakwe; n’wana wa xisati ni mamana wakwe; n’wingi ni n’wingi wakwe.

36   Nakone valala va mhunu vatava va le ndangwini wakwe.

37   Lweyi azrandzraka tatana wakwe kumbe mamana wakwe kutlula mine angandzrifaneli; ni lweyi azrandzraka n’wanakwe wa xinuna kumbe wa xisati kutlula mine angandzrifaneli.

38   Ni lweyi angazrwalikiki mhandzre yakwe andzrilandzrelela angandzrifaneli.

39   Lweyi akumaka vutomi bzakwe atalahlekeliwa ha bzone, ni lweyi alahlekeliwaka hi vutomi bzakwe hi nkonta yanga atabzikuma.

40   “Lweyi an’wiyamukelaka awandzriyamukela na mine, ni lweyi andzriyamukelaka ayamukela ni Lweyi andzrizrumiki.

41   Lweyi ayamukelaka muprofeta hilesvi anga muprofeta atakuma muholo wa muprofeta, ni lweyi ayamukelaka mhunu wa kululama hilesvi anga mhunu wa kululama atakuma muholo wa mhunu wa kululama.

42   Nakone mani na mani lwanyikaka mun’we wa lavatsrongo mati ya kutitimeta hilesvi anga mudondzrisiwa, nambi mova ya kutata xinwelo xin’we ntsena, ndzrihlayela mfuzri ndzrili ku n’wine: Angaka angalahlekeliwi hi muholo wakwe.”