BRX

1   Amasikwini lawo, katlheli kuva ni xitsrhungu lexikulu, kambe afa xinge na nchumu wa kuda. Kutani avitana vadondzrisiwa, aku ku vone:

2   “Ndzravatsretsra vhanu lava, hikusa va ni masiku mazrazru na vatsrhami na mine, kutani ava na svakuda.

3   Nakone loko ndzrovamukisa amakaya kwavu ni ndlala, vatajiyela andleleni, hikusa van’we va vone vapfa kule.”

4   Kambe vadondzrisiwa vakwe vamuhlamula, vaku: “Xana mhunu angamakuma kwini makati ya kuxuzrisa vhanu lava hinkwavu ku mbangu lowu wa mananga?”

5   Kutani avavutisa, aku: “N'wi ni makati mangani?” Vaku: “Ntlhanu na mabizri.”

6   Kutani aleleta xitsrhungu lesvaku xitsrhama ahansi. Loko ateki makati lawo ya ntlhanu na mabizri, akhensa, amakhemelela, agama amanyiketa vadondzrisiwa vakwe lesvaku vamaphakela, kutani vamaphakela xitsrhungu.

7   Handle ka lesvo, afa va ni svinhlampfana svinge svingani. Kutani loko asvikatekisile, aleleta lesvaku na svone sviphakeliwa.

8   Kutani vhanu vada, vaxuzra; vagama vateka ntlhanu wa svihundzru na svibizri sva kutala hi matlhantlha lamangasala.

9   Kutani afa ku ni kolomu ka mune wa makume ya vavanuna. Agama avalelela.

10   Ahangwesa anhingena abzatsrhwini ni vadondzrisiwa vakwe, vanhingena amugangeni wa Dalmanuta.

11   Kutani kuhumelela vafarisi vasungula kuphikisana naye, vaku vajula ahamba hlolana dzra kupfa tilweni, na vayencela kumudzringa.

12   Kutani akonya svinene amoyeni wakwe, aku: “Xana lixaka ledzri dzrijulela yini hlolana? Ndzrihlayela mfuzri ndzrili ku n’wine: Aku na hlolana dzritakakombiwa lixaka ledzri.”

13   Agama asuka avasiya, atlhela anhingena abzatsrhwini, aya atlhelweni ledzrin’wana dzra lwandle.

14   Kambe vadzrivala kuteka makati, vakumeka na vange na nchumu abzatsrhwini handle ka kati dzrin’we ntsena.

15   Kutani avamamulela hi kutiyisa, aku: “Basopani! Tivonelani ku handzrelo ya vafarisi ni handzrelo ya Heroda.”

16   Kutani vasungula kuholovisana hi mhaka ya lesvi afaka vange na makati.

17   Loko avona lesvo, aku ku vone: “N’wiholovela yini hilesvi n’wingeke na makati? N’woka n’wingavoni, ni kutwisisa n’wingatwisisi? Xana timbilu tenu tahatlanyalile?

18   ‘Nambesvi n’winga ni mahlo, an’wivoni? Nambesvi n’winga ni tindleve, an’wiyingeli kee? An’widzrimuki?

19   Ankama lowu ndzringakhemelela ntlhanu wa makati ndzrinyika lava ntlhanu wa makume ya madzana, xana n’wizrwali mintsrhava mingani ya kutala hi matlhantlha?” Vaku ku yene: “Khume na mibizri wa yone.”

20   “Ankama lowu ndzringakhemelela makati ya ntlhanu na mabizri ndzrinyika lava mune wa makume, n’wizrwali svihundzru svingani sva kutala hi matlhantlha?” Vaku ku yene: “Ntlhanu na svibizri wa svone.

21   Agama aku ku vone: “Ni svosvi an’wisitwisisa nchumu?”

22   Lesvi vagamiki vanhingena Betsayda. Kutani vamubuyisela mhunu wa kuka angavoni, vamukombela lesvaku amukhumba.

23   Akhomiki mhunu lweyo wa kuka angavoni hi voko, amuhumexa axidoropaneni. Athukela mazri amahlweni yakwe, agama amutlhanteka mavoko, aku: “Xi kone uxivonaka?”

24   Alavisa, agama aku: “Ndzrivona vhanu, hikusa svitsrhami ingiki i minsinya lemifambafambaka.”

25   Yesu atlhela akhumba mahlo ya mhunu lweyo, kutani matlhela mavona, ava asungula kuvona minchumu hinkwayu hi kukhanya.

26   Kutani amumukisa akaya kwakwe, aku: “Unganhingeni amugangene.”

27   Yesu ni vadondzrisiwa vakwe vagama vasuka vaya asvidoropaneni sva Khezareya wa Filipi. Na vehe ndleleni, avutisa vadondzrisiwa vakwe, aku: “Xana vhanu vali ni mani?”

28   Vaku ku yene: “Yohani Mubabatisi, kambe van’wana vali Eliya, kasi vambenyana vali u mun’we wa vaprofeta.”

29   Kutani avavutisa, aku: “N’wine, ke? N’wili ni mani?” Petrosi amuhlamula, aku: “Hi wene Kriste.”

30   Kutani avamamulela lesvaku vangachuke vabzela mhunu lesvaku hi yene mani.

31   Agama asungula kuvadondzrisa lesvaku N’wana wa mhunu afanela kutwisiwa tinxanisa tinyingi, adzreliwa hi vakulu ni vaprista lavakulu, ni vatsrali, ava adlayiwa, agama apfuxiwa antsrhaku ka masiku mazrazru.

32   Nakone afa avatlhamuxela mhaka leyo alivaleni. Kambe Petrosi amutekela atlhelweni, asungula kumukhwavela.

33   Kutani andzruluka alavisa vadondzrisiwa vakwe, akhwavela Petrosi, aku: “Suka kwanga, Sathana! Hikusa lesvi upimisaka svone ahi sva Xikwembu Nkulukumba, kambe i sva vhanu.”

34   Agama avitana xitsrhungu ni vadondzrisiwa vakwe vatsrhindzrekela, aku: “Loko mhunu ajula kundzrilandzra, aatitsrhike ava azrwala mhandzre yakwe, andzrilandzrelela.

35   Hikusa lweyi ajulaka kuhuluxa vutomi bzakwe atalahlekeliwa hi bzone, kambe lweyi alahlekeliwaka hi vutomi bzakwe hi mhaka yanga ni madzrungula lamanene atabzihuluxa.

36   Hikusa svimupfuna yini mhunu, loko akuma misava hinkwayu kambe alahlekeliwa hi vutomi bzakwe?

37   Hikusa mhunu anganyikela yini akuva axava vutomi bzakwe kee?

38   Hikusa lweyi adanaka ha mine ni mazritu yanga amahlweni ka lixaka ledzri dzra vumbuye ni dzra vudohi, N’wana wa Mhunu na yene atadana ha yene loko abuya akuphatimeni ka Tatana wakwe ni tintsrumi ta kuxwenga.”