BRX

1   Agama ahuma kone aya atikweni dzra lekwavu; vadondzrisiwa vakwe vamulandzra.

2   Loko kutlhasi Savata, asungula kudondzrisa asinagogeni. Kutani vanyingi va lavamuyingeliki vahlamala, vaku: “Xana mhunu lweyi asvikumi kwini lesvi? Vutlhazri lebzi anyikiwiki bzone i bza kwini, ni mahlolana ya kutanu, lamayenciwaka hi mavoko yakwe?

3   Xana lweyi ahi yene lwewa muvatli, n’wana Mariya, lwewa makwa Yakobe, Yosefa, Yuda na Simoni? Ni vamakwavu va xisati ahi vone volava, vanga na hine?” Kutani vakhunguvanyeka ha yene.

4   Kambe Yesu aku ku vone: “Muprofeta akombiwa xichavu hinkwaku, handle ka lekwavu, amakazri ka maxaka yakwe ni va le kaya kwakwe.”

5   Kutani angakotanga kuyenca hlolana ni dzrin’we kone, handle ka kutlhanteka mavoko ku timbabzi tinge tingani, atihanyisa.

6   Atlheli ahlamala hi kupfumala kwavu lipfumelo. Agama azrendzreleka hi svidoropana, afamba adondzrisa.

7   Kutani avitana lava khume na vabizri, asungula kuvazruma hi vabizrivabizri, avanyika ni ntamu wa kuhlongola mimoya leminyamiki.

8   Ava avaleleta lesvaku vangateke nchumu wa kuwutizrisa andleleni handle ka nhonga; aku vangateke makati, nkwama, kumbe mali mabandhini yavu,

9   kambe aku avayambale tintangu, vangayambali mijansi mibizri.

10   Agama aku ku vone: “Kwini na kwini, loko n’winhingena amutini wa kukazri, tsrhamani ku wone n’wiko n’wisuka ku mbangu lowo.

11   Kutani loko mbangu wa kukazri wuyala kun’wiyamukela kumbe kun’wiyingiseta, sukani; phumunani ntsrhuzri lowunga minkondzrweni yenu akuva bziva vumboni ku vone.”

12   Kutani vafamba vazrezra lesvaku vhanu vafanela kutisola;

13   vahlongola ni mademona ya kutala, vatota hi mafuzra timbabzi ta kutala, vatidaha.

14   Kutani Hosi Heroda asviyingela, hikusa vito dzra Yesu afa dzri ni ndhuma, nakone vhanu afa vaku: “Yohani Mubabatisi apfuxiwi akufeni; hi svosvo svimuyencaka akota kuhamba mahlolana.”

15   Kambe vambeni afa vaku: “I Eliya.” Kasi vambeni afa vaku: “I muprofeta, kufana ni mun’we wa vaprofeta va khale.”

16   Kambe loko Heroda ayingela lesvo, aku: “Yohani, lweyi ndzringamutsrema nhloko, apfukile.”

17   Hikusa Heroda hi ntshima yakwe afa azrumi vhanu vayakhoma Yohani, vamupfalela abohelweni hi mhaka ya Herodiya, nsati wa makwavu, Filipi, hikuva Heroda afa achati naye.

18   Hikusa Yohani afa ahamba aku ku Heroda: “Lesva kuteka nsati wa makwenu, nawu awusvipfumeleli.”

19   Kutani Herodiya afa amubekeli xiviti, ajula kumudlaya kambe angasvikoti.

20   Hikusa Heroda afa achava Yohani, hi kutiva lesvaku i mhunu wa kululama ni wa kuxwenga, kutani amuxizrelela. Nkama hinkwawu loko akanela na Yohani, Heroda afa atalataleka ngopfu svinene; nambitanu afa anyonxa hi kumuyingela.

21   Kambe kutlhasa siku ledzrinene, loko Heroda ahamba nkhuvu wa kutlhanganisa ka malembe ya kubelekiwa kwakwe, azramba tihosana takwe ni tindzruna ta masocha, ni vazrangeli va le Galileya.

22   Kutani loko n’wana wa xisati wa Herodiya anhingena akina, Heroda ni lava afaka vatsrhami na yene atafuleni vanyonxa. Hosi yiku ku lweyi wa nhwanyana: “Kombela xin’wana ni xin’wana lexi uxijulaka kwanga, ndzritakunyika.”

23   Yiva yimufungela, yiku: “Xin’wana ni xin’wana lexi utakandzrikombela xone, ndzritakunyika, kuyatlhasa ni hamfu ya mfumu wanga.”

24   Kutani lwewa nhwanyana ahuma ayavutisa mamana wakwe, aku: “Ndzrikombela yini kee?” Aku: “Nhloko ya Yohani Mubabatisi.”

25   Kutani anhingena hi kuhangwesa ayakombela hosi, aku: “Ndzrijula undzrinyika nhloko ya Yohani Mubabatisi svosvisvosvi hi mbaka.”

26   Nambilesvi hosi yingatlhaveka mbilu svinene hi lesvo, ayijulanga kumutsrona, hi mhaka ya lesvi yingasvifunga ni hi mhaka ya lava afaka yitsrhami navu atafuleni.

27   Kutani hosi yitekela kuzruma musocha mun’we, yimuleleta kuyabuyisa nhloko ya Yohani. Kutani afamba ayamutsrema nhloko abohelweni,

28   abuyisa nhloko yakwe hi mbaka. Ayinyika lwewa nhwanyana, kutani yene ayinyiketa mamana wakwe.

29   Kutani loko vadondzrisiwa vakwe vasvitwa, vabuya vateka ntsrumbu wakwe vayawulahla axizreni.

30   Kutani vapostola vahlengeletana ku Yesu vamudzrungulela hinkwasvu lesvi vangasviyenca ni lesvi vangasvidondzrisa.

31   Kutani aku ku vone: “Buyani, n’wine vusvenu ntsena, ku mbangu wa mananga, n’wiwisanyana.” Hikusa afa kubuyetela vhanu va vanyingi na van’wana vafamba, lakakuva Yesu ni vapostola vangawukumi ni nkama wa kuda.

32   Kutani vasuka hi bzatsrhu vaya ku mbangu wa mananga, vone vusvavu.

33   Kambe vhanu vavavona loko vafamba, kutani vanyingi vasvitiva; vahuma amadoropeni hinkwawu, vatsrutsrumela kone kun’we hi milenge, vavachangwela.

34   Kutani loko ahuma, avona vhanu va vanyingi svinene; avatwela vuzrombe, hikusa afa vafana ni tihamba letingeke na mubzisi. Kutani asungula kuvadondzrisa minchumu ya kutala.

35   Kutani lesvi nkama afaka wufambile, vadondzrisiwa vakwe vamuyela, vaku ku yene: “Lomu akutsrhami mhunu, nakuve nkama kutani wufambile.

36   Valelele, vatakota kuya amigangeni ni le svidoropaneni sva le kusuhi, vayatixavela svakuda.”

37   Kambe avahlamula, aku: “Vanyikani n’wine svakuda.” Na vone vaku ku yene: “Xana hitayaxava makati ya madzana mabizri ya madenari hivanyika vada kee?”

38   Aku ku vone: “N’wi ni makati mangani kee? Fambani n’wiyakamba!” Loko vayile vayakamba, vaku: “I ntlhanu, ni tinhlampfi tibizri.”

39   Kutani abzela hinkwavu vatsrhama hi mintlawantlawa abzanyini bza lihlaza.

40   Kutani vatsrhama hi mintlawa ya dzana ni ya ntlhanu wa makume ya vhanu.

41   Kutani ateka makati laya ntlhanu ni tinhlampfi leta tibizri, alavisa ahenhla atilweni, akhensa. Agama akhemelela makati, amanyiketa vadondzrisiwa vakwe akuva vaphakela vhanu; ayavela hinkwavu ni tinhlampfi leta tibizri.

42   Kutani hinkwavu vada, vaxuzra.

43   Kutani vazrwala mintsrhava ya khume na mibizri ya kutala hi matlhantlha ni hi tinhlampfi.

44   Kutani lavadiki makati lawo afa vali ntlhanu wa makume ya madzana ya vavanuna.

45   Kutani azruma vadondzrisiwa vakwe vanhingena bzatsrhwini vapfa vazranga, vaya ku tlhelo ledzrin’wana dzra Betsayda, na yene ahalelelana ni xitsrhungu.

46   Kutani loko aheti kulelelana ni xitsrhungu, aya anhaveni ayakhongota.

47   Loko dambu dzripelile, bzatsrhu afa dzrili makazri ka lwandle, kambe yene afa ali vusvakwe asaveni.

48   Kutani, loko avavona lesvaku vaweta hi kukazrateka, hikusa moya afa wuhunga wuvaba, na sviya mpundzrwini, avayela, na afamba ahenhla ka lwandle; kambe afa ajula kuvahundzra.

49   Loko vamuvona na afamba ahenhla ka lwandle, vapimisa lesvaku i xipoko, kutani vasungula kuba tinyandha.

50   Hikusa hinkwavu vamuvonile, vachava. Kambe atekela kukanela navu, aku: “Tiyani nhlana! Hi mine; n’wingachaveni.”

51   Agama anhingena abzatsrhwini ledzri afaka vali ku dzrone, kutani moya wumiyela. Kutani vatala hi kuhlamala ka kutlula mpimu,

52   hikusa afa vangasvitwisisi lesvaku afa ajula kuhlaya yini hi makati, kambe timbilu tavu afa titlanyalile.

53   Loko vawelile, vanhingena Genezareti, vatsrimba bzatsrhu kone.

54   Kambe neti axika abzatsrhwini, vhanu vamuvona lesvaku hi yene.

55   Kutani vatsrutsruma amugangeni luwani hinkwawu, vasungula kutlakulela timbabzi hi svinkukwana, vatiyisa hinkwaku lomu vayingelaka lesvaku a kone.

56   Nakone hinkwaku lomu afaka anhingena kone, asvidoropaneni kumbe amadoropeni, kumbe atintlhaveni, afa vabeka lava kuvabza amabazara, vamukombela lesvaku vangakhumba ntsena mponta ya mpahla yakwe. Kutani hinkwavu lava afaka vayikhumba afa vahanya.