BRX

1   Kutani vatlhasa halahaya ka lwandle amugangeni wa vageraseni.

2   Kutani hi kuhangwesa loko Yesu ahumi abzatsrhwini, atlhangavetiwa hi mhunu lweyi afaka a ni moya lowunyamiki, na ahuma amaxizreni,

3   lweyi afaka atsrhama amaxizreni. Lweyo nambi hi mpencana, afa kungehe na mhunu lwakotaka kumutsrimba ha yone,

4   hikusa minkama ya kutala afa atsrimbiwa hi tinghomondho ni timpencana, kambe afa athinya timpencana hi makazri ava atsrhovelela tinghomondho; kutani afa kunge na mhunu lwakotaka kumuhlula.

5   Kutani vusiku ni nhlikanhi afa atsrhama hi kubonga, amaxizreni ni le tinhaveni na atixeka hi mazribze.

6   Kutani loko avona Yesu hi le kule, atsrutsruma, ayamukhinsamela.

7   Abonga hi zritu ledzrikulu, aku: “Ndzrekuhonela yini wene, Yesu, N’wana wa Xikwembu Nkulukumba Lwanga Henhlahenhla? Ndzrakufungisa ha Xikwembu Nkulukumba lesvaku ungandzrixanisi.”

8   Hikusa Yesu afa aku: “Huma ku mhunu lweyo, wene moya lowunyamiki!”

9   Kutani Yesu amuvutisa, aku: “U mani vito?” Ahlamula, aku: “Vito dzranga hi mine Butsrhu, hikusa hi vanyingi.”

10   Kutani akombela Yesu akuva angahlongoli mimoya leyo miya handle ka tiko.

11   Kutani afa ku ni ntlhambi lowukulu wa tinguluve tidaka le nhaveni.

12   Kutani mimoya mimukombela, miku: “Hizrumele tingulubzeni, akuva hinhingena ku tone.”

13   Kutani amipfumelela. Mimoya leminyamiki mihuma miyanhingena atingulubzeni, kutani ntlhambi wutsrutsrumela ligingizrini, wupela lwandle; kolomu ka makume mabizri ya madzana ya tinguluve tifa hi kunwela mati andzreni ka lwandle.

14   Kutani lava afaka vatibzisa vatsrutsruma vayahlaya adoropeni ni le ntlhaveni; vhanu vahumetela vayavona lesvihumeleliki.

15   Kutani vaya ku Yesu, vakuma lesvaku mhunu lweyi afaka akhomiwi hi butsrhu dzra mademona etsrhama nakone ayambali mpahla na nhloko yitizra ha hombe; kutani vachava.

16   Kutani lava vangasvivona vavadzrungulela lesvi svingayencekisa xisvone ku mhunu lweyi afaka a ni mademona ni ku tinguluve.

17   Kutani vasungula kumukombela lesvaku asuka amugangeni wavu.

18   Loko Yesu aku awakhwela bzatsrhu, mhunu lweyi afaka a ni mademona amukombela kufamba naye.

19   Kambe amutsimba, aku ku yene: “Muka akaya kwaku, ku vayakelani, uyavabzela hinkwasvu lesvi Yehovha akuyenceliki svone ni lilondzro ledzri angakuyencela dzrone.”

20   Kutani afamba, ayasungula kubzeletela vhanu va le Dekapolisi hinkwasvu lesvi Yesu angamuyencela svone; vhanu hinkwavu vahlamala.

21   Kutiloko Yesu atlheli atsremakanya hi bzatsrhu aya tlhelo ledzrin’wana, vhanu va vanyingi svinene vayahlengeletana ku yene, na yene ali nkingeni wa lwandle.

22   Kutani kutlhasa mun’we wa muzrangeli wa sinagoga, lweyi valiki i Yayru. Loko avona Yesu, atiwisa aminkondzrweni yakwe.

23   Amukombela, aku: “Xin’hwanyatana xanga kesala kutsrongo akuva xifa. Ndzrikombela ubuya uxitlhanteka mavoko xitadaheka, xihanya.”

24   Kutani Yesu afamba naye. Kutani vhanu va vanyingi svinene vamulandzrelela, vamukamanyetela.

25   Kutani mun’we wansati lweyi angaheta khume dzra malembe na mabizri na a ni mavabzi ya kuhumela ngati,

26   lweyi angahlupheka svinene amavokweni ya vadahi vanyingi ava aheta mali yakwe hinkwayu, kambe amatsrhan’wini ya kuyampsa, mavabzi yakwe afa moya amahlweni makula,

27   loko ayingeli vhanu vakanela hi Yesu, ati he ntsrhaku kwakwe amakazri ka xitsrhungu, akhumba mpahla yakwe,

28   hikusa afa aku: “Loko ndzrokhumba ntsena mpahla yakwe, ndzritahanya.”

29   Kutani ngati yitekela kuyima kuhuma, asvitwa amizrini yakwe lesvaku xivavu xakwe lexa kuchavisa xiholile.

30   Kolahu Yesu asvitwa andzreni kwakwe lesvaku kuhumi ntamu. Kutani andzruluka, aku ku xitsrhungu lexiyani: “Hi mani lwakhumbiki mpahla yanga?”

31   Kambe vadondzrisiwa vakwe vaku ku yene: “Wasvivona lesvaku xitsrhungu xakukamanyetela, kambe wahavutisa, uku: ‘I mani andzrikhumbiki?’”

32   Kambe, afa alangusa matlhelo hinkwavu atavona lesvaku i mani lwangayenca lesvo.

33   Kutani lweyo wansati achava atlhela azruzrumela hi kutiva lesvingamuyencekela; atsrhindzrekela ku Yesu, amukhinsamela, amubzela xihlayelamfuzri hinkwaxu.

34   Kutani Yesu aku ku yene: “N’wananga, lipfumelo dzraku dzrikuhanyisile. Muka hi kuzrula, uhola xivavu xaku lexa kuchavisa.”

35   Na ahavulavula, kutlhasa vhanu he kaya ka lweyi wa muzrangeli wa sinagoga, vaku: “N’wanaku afile! Wahamunyikela yini ntizro Mudondzrisi?”

36   Kambe Yesu ayingela mazritu yavu, kutani abzela lwewa muzrangeli wa sinagoga, aku: “Ungachavi; wene vana ni lipfumelo ntsena.”

37   Kutani angatsrhikanga mhunu amulandzra handle ka Petrosi, Yakobe na Yohani, makwa Yakobe.

38   Kutani loko vatlhasa akaya ka muzrangeli wa sinagoga, akuma lesvaku ku ni pongwe ni vhanu lava vadzrilaka, vaba ni tihuwana.

39   Anhingeniki, aku ku vone: “I pongwe dzra yini ledzri n’wibaka? N’widzrilela yini? N’wana lweyi angafanga kambe eyetlela.”

40   Kutani vamuhleka. Kambe loko ahumexi vhanu hinkwavu ahandle, ateka tatana wa n’wana ni mamana wa kone, ni lava angabuya navu, anhingena lomu n’wana afaka ali kone.

41   Agama akhoma n’wana lweyo hi voko, aku ku yene: “Talitha kumi”, lesvi, loko svindzrulutiwa hi lidzrimi dzrin’wana, sviliki: “Wene wa xin’hwanyatana, ndzrili ku wene: ‘Pfuka!’”

42   Kolahu lweyi wa nhwanyana apfuka asungula kufambafamba. Hikusa afa a ni khume dzra malembe na mabizri ya kuhanya. Kolahu vangahatikoti hi kutala hi kutsrhava.

43   Kambe avaleleta svinene lesvaku kungachuke kuva ni mhunu lwasvitivaka lesvo; atlhela avazruma kunyika n’wana svakuda.