-
Marku 3
1 Atlheliki anhingena ku sinagoga dzrin’we, akuma lesvaku ku ni mhunu wa kuwoma voko.
2 Kutani vamuhononela kuvona lesvaku kumbe atadaha mhunu lweyo hi Savata kumbe ihina, akuva vatamuzrwexa nandzru.
3 Aku ku mhunu lwewa kuwoma voko: “Sekeleka uta laha makazri.”
4 Agama aku ku vone: “Hi Savata, svapfumeleliwa kuyenca sva svinene kumbe kuhona kee? Svapfumeleliwa kuhuluxa mhunu kumbe kumudlaya kee?” Kambe vamiyela vakuntse!
5 Kutani ntsrhaku ka kulangusa ha mun’we ni mun’we wa vone, na avasola hi kuvaviseka svinene hi mhaka ya kutlanyala kwavu timbilu, aku ku mhunu lwiyani: “Nalavuta voko.” Kutani analavuta voko, dzritlhela dzrihanya.
6 Kutani vafarisi vahuma, vahangwesa vahlengeletana ni va ntlawa wa Heroda akuva valuka makungu ya kumudlaya.
7 Kambe Yesu asuka aya alwandle kun’we ni vadondzrisiwa vakwe, kutani xitsrhungu lexikulu lexihumaka Galileya ni lexihumaka Yudeya ximulandzra.
8 Nambi hi le Yerusalema ni le Idumeya ni halahaya ka Yordani ni le matlhelweni ka Tire na Sidoni, afa ateliwa hi xitsrhungu lexikulu svinene loko xiyingela minchumu ya kutala leyi afaka amiyenca.
9 Kutani abzela vadondzrisiwa vakwe lesvaku vatsrhama ni bzatsrhu na dzrilungile akuva xitsrhungu xingamukamalati.
10 Lesvi afaka adaha va kutala, hinkwavu lava afaka va ni svivavu lesva kuchavisa afa vakamalatana matlhelweni yakwe akuva vamukhumba.
11 Nambi mimoya leminyamiki, loko mimuvona, afa mimukhinsamela na mibandlukana, miku: “Wene u N’wana wa Xikwembu Nkulukumba!”
12 Kambe minkama minyingi afa amileleta svinene akuva mingamutivisi.
13 Atlhantuka nhava agama avitana lava afaka avajula, kutani vamutela.
14 Kutani avumba ntlawa wa khume na vabizri, lava atlheliki avachula vapostola, lava afaka vatatsrhama na yene ni lava afaka atavazrumela kuyazrezra,
15 ni kuva ni ntamu wa kuhlongola mademona.
16 Kutani svizro sva ntlawa wa lava khume na vabizri lowu awuvumbiki afa svili Simoni, lweyi atlheliki amunyika vito dzra Petrosi,
17 Yakobe, n’wana Zebedewu, na Yohani, makwa Yakobe (atlheliki avachula vito dzra Bowernegesi, lesvijulaka kuhlaya lesvaku “Vana va Kudzruma ka Tilo”),
18 Andreye, Filipi, Bartolomewu, Matewu, Tomasi, Yakobe, n’wana Alfewu, Tadewu, Simoni, mukanana,
19 na Yuda Iskariyota, lweyi agamiki amudlayisa. Agama anhingena ndlwini ya kukazri.
20 Kutani kutlhela kutlhangana xitsrhungu, lakakuva vangahasvikoti nambi kuda svakuda.
21 Kambe loko maxaka yakwe masviyingela, mahuma akuva matatamuteka, hikusa afa maku: “Atitlhangani.”
22 Nangweso, vatsrali lavatiki hi le Yerusalema afa vaku: “A ni Belezebubi, mfuzri ahlongola mademona hi hosi ya mademona.”
23 Kutani antsrhaku ka loko avavitanile vata ku yene, akanela navu hi svifaniso, aku: “Xana Sathana angahlongolisa kuyini Sathana?
24 Loko mfumu wuyavanile wutilwisa, mfumu lowo awu na kutama wuva kone;
25 nakone loko yindlu yoyavana yitilwisa, yindlu leyo ayi na kusvikota kutama yiva kone.
26 Nangweso, loko Sathana asekeleki atilwisa atlhela ayavana, anga na kusvikota kutama ava kone kambe atawa.
27 Nambitanu, aku na mhunu anganhingenaka ndlwini ka mhunu wa ntamu lwangakotaka kuyiva minchumu yakwe handle ka loko ozranga hi kutsrimbelela mhunu lwewa ntamu. Hi kone angasvikotaka kuphanga minchumu leminga ndlwini.
28 Ndzrin’wibzela na ndzritiyisile lesvaku minchumu hinkwayu mitadzrivaleliwa vana va vhanu, nambi ova svidoho svini na svini lesvi vasviyencaka ni svisandzru svini na svini lesvi vasvihlayaka.
29 Kambe mani na mani lwasandzraka moya lowa kuxwenga anga na kudzrivaleliwa hi la kungahelikiki, kambe a ni nandzru wa xidoho xa hi la kungahelikiki.”
30 Ahlayi lesvo hikusa afa vaku: “A ni moya lowunyamiki.”
31 Kutani kuta mamana wakwe ni vamakwavu, vatlhasa vayima handle, vazruma mhunu ayamuvitana.
32 Vaku ku yene mahlweni ka xitsrhungu lexi afaka ximutsrandzrelile: “Lavisa! Mamana waku ni vamakwenu va hala handle vakujulaka.”
33 Kambe avahlamula, aku: “I mani mamana wanga? Ni vamakwezru i vamani?”
34 Kutani alavisa lavatsrhamiki amatlhelweni kwakwe vamusiya makazri, aku: “Mamana wanga ni vamakwezru hi lava!
35 Mani na mani lwayencaka kuzrandzra ka Xikwembu Nkulukumba, hi yene anga makwezru wa xinuna ni wa xisati ni mamana wanga.”