-
Marku 15
1 Kutani na wehe mpundzru svinene, vaprista lavakulu ni vakulu, ni vatsrali, ni Huvo ya Xiyuda hinkwayu, vakombisana vagama vatsrimba Yesu, vafamba naye vayamunyiketa ku Pilatu.
2 Kutani Pilatu amuvutisa, aku: “Xana u Hosi ya vayuda?” Amuhlamula, aku: “Uhlayi ha bzaku.”
3 Kambe vaprista lavakulu afa vamuzrwexa milandzru ya kutala.
4 Kutani Pilatu atlhela amuvutisa, aku: “Awuyanguli nchumu? Vona milandzru ya kutala leyi vakuzrwexaka yone!”
5 Kambe Yesu angahayangulanga nchumu, lakakuva Pilatu atala hi kuhlamala.
6 Kutani loko kutlhasa nkhuvu, afa ahamba avantsrhunxela mubohiwa mun’we lweyi vamukombelaka.
7 Kutani afa ku ni mhunu lwavitaniwaka Barabasi, lweyi afaka ali bohelweni kun’we ni vapfukeli va mfumu, lweyi angadlaya mhunu na vapfukela vuhosi.
8 Kutani kubuya vhanu va vanyingi vatatahamba pongwe, vakombela lesvaku Pilatu avayencela lesvi angasvitolovela.
9 Avayangula, aku: “Xana n’wijula ndzrin’wintsrhunxela Hosi ya vayuda?”
10 Hikusa Pilatu afa asvivonile lesvaku vaprista lavakulu afa vamuheketeli Yesu hi mhaka ya matsrhoho yavu.
11 Kambe vaprista lavakulu vahlohlotela xitsrhungu lesvaku xikombela kuntsrhunxeliwa Barabasi amatsrhan’wini ya Yesu.
12 Kutani Pilatu atlhela ahlamula vhanu, aku: “Kutani ke, ndzriyenca yini hi lweyi n’wimuvitanaka Hosi ya vayuda?”
13 Vatlhela vabandlukana, vaku: “Mugongondzrele amhandzreni!”
14 Kambe Pilatu avavutisela, aku: “Hayini? Ehonha yini kee?” Kambe vayengetela kubandlukana, vaku: “Mugongondzrele amhandzreni!”
15 Kutani Pilatu, hi kujula kunyonxisa vhanu, avantsrhunxela Barabasi; agama anyiketa Yesu akuva agongondzreliwa amhandzreni antsrhaku ka loko azrumi vhanu vamukwapa hi xisepu.
16 Kutani masocha mamuyisa alinxonxeni, kunga mutini wa hosi ya xifundzrankulu, mavitana xikwata hinkwaxu xihlengeletana.
17 Kutani mamuyambexa xiyambalu xa libungu, matlhela mamutlhanteka hazri ya kulukiwa hi mitwa anhlokweni.
18 Magama masungula kumulosela, maku: “B’ayethe, Hosi ya vayuda!”
19 Mamubetetela nhloko hi lihlanga, matlhela mamuthukela mazri, na mapfa makhondla matsrolo mamukhinsamela.
20 Kutani, loko maheti kutlanga ha yene, mamuhlivila xiyambalu xa libungu, mamuyambexa mpahla yakwe. Magama mamuhumexa mayamugongondzrela amhandzreni.
21 Masindzrisa mun’we wa muhundzri wa ndlela, lweyi afaka abuya he masin’wini, lesvaku azrwala mhandzre leyi Yesu afaka atadlawela ku yone. Vito dzrakwe afa ali Simoni wa le Sireni, tatana wa Alexandre na Rufo.
22 Kutani masocha mamubuyisa ambangwini lowu valiki i Golgota, lesvi, loko svindzrulutiwa hi lidzrimi dzrin’wana, svihlayaka lesvaku “Mbangu wa Pala.”
23 Magama mamunyika vhinyo dzra kupatsriwa ni mafuzra ya kunun’hwela, kambe ayala kunwa.
24 Kutani mamugongondzrela amhandzreni, mava mayavelana mpahla yakwe hi kuhamba mpshampsha akuva matativa lesvaku mun’wana ni mun’wana atateka yini.
25 Nkama lowu mamugongondzreliki ha wone afa wuli wora dzra vuntlhanu na mune wa mixo.
26 Nakone afa ku ni papela dzra kuhlaya lexi afaka adlawela xone, dzriku: “Hosi Ya Vayuda.”
27 27 Masocha matlheli magongondzrela svigevenga svibizri na yene, xin’we axineneni xakwe, lexin’wana aximatsrini.
29 Kutani lava afaka vahundzra hi ndlela afa vamutsreketsrela na vahlakahla tinhloko, vaku: “Ha! Wene wa kuhohlota tempele utlhela udzriyaka hi masiku mazrazru,
30 tihuluxe, utixixa amhandzreni.”
31 Hi kufana, na vone vaprista lavakulu ni vatsrali afa vamuhleka amakazri kwavu, vaku: “Van’wana avahuluxile; kambe kutihuluxa angasvikoti!
32 Svosvi hijula kuvona Kriste, Hosi ya Yisrayele, axika hi le mhandzreni, hitakholwa.” Nambi lava afaka vagongondzreliwi naye afa vamuzruketela.
33 Loko kuba dina, munyama wufuneketa tiko hinkwadzru kuyatlhasa wora dzra vuzrazru dzra nhlikanhi.
34 Kutani hi wora dzra vuzrazru dzra nhlikanhi, Yesu abandlukana hi zritu ledzrikulu, aku: “Eli, Eli, lama sabaktani?”, lesvi, loko svindzrulutiwa hi lidzrimi dzrin’wana, svihlayaka lesvaku: “Xikwembu Nkulukumba wanga, Xikwembu Nkulukumba wanga, undzritsrhikeli yini?”
35 Kutani van’we va lava afaka vayimi kusuhi, loko vasviyingela, vaku: “Lavisani! Avitana Eliya.”
36 Kutani mun’we atsrutsruma, ayatata xiponjhi hi vhinyo dzra kutsatsavela, axitlhoma alihlangeni, amupsompsisa, aku: “Mutsrhikani! Hitavona kumbe Eliya atabuya amuxixa.”
37 Kambe Yesu aba huwa svinene, agama afa.
38 Kutani xisizrelo xa mbangu lowa kuxwenga xihandzruka hi makazri kusukela ahenhla kuyatlhasa ahansi.
39 Kutani loko ndzruna ya masocha leyi afaka yiyimi ka kulavisana na Yesu yivona lesvaku afisi xilesvo, yiku: “Hakunene mhunu lweyi afa ali N’wana wa Xikwembu Nkulukumba!”
40 Nakone afa ku ni vavasati lava afaka vayimi hi le kulenyana vahlalela. Mun’we wa vone i Mariya Madalena na Mariya mamana wa Yakobe (Lwentsrongo) na Yosefa, na Salomeya,
41 lava afaka vahamba vafambafamba naye vamupfunisa ankama lowu afaka ali Galileya, ni vavasati van’wana va kutala lavangatlhantukela Yerusalema na yene.
42 Kutani loko dzriya akupeleni, nakuve afa ali Siku dzra Kululamisela, hi lesvaku, mundzruku ka kone afa ali Savata,
43 kutlhasa Yosefa wa le Arimateya, xizro lexichavisekaka xa Huvo ya Xiyuda, lweyi na yene afaka ayimela Mfumu wa Xikwembu Nkulukumba. Aboha mbilu ayavonana na Pilatu, akombela ntsrumbu wa Yesu.
44 Kambe Pilatu afa ajula kutiva lesvaku angava na kutani afile. Ahangavitana ndzruna ya masocha, ayivutisa lesvaku Yesu kutani afa afile kee.
45 Kutani loko akumisisile xihlayelamfuzri ku lwewa ndzruna ya masocha, anyika Yosefa ntsrumbu wa Yesu.
46 Kutani axava linyu dzra kuxonga, amususa mhandzreni, amutsrondzriyela hi dzrone, amubeka axizreni ledzri afaka dzrikeliwi azribzeni, agama asusumeta zribze dzripfala xizra.
47 Kambe Mariya Madalena na Mariya mamana wa Yosefa afa vayimi vavona lomu angabekiwa kone.