BRX

1   Kutani afa kusali masiku mabizri akuva kudiwa Paxkwa ni Nkhuvu wa Makati Ya Kuka Handzrelo. Kutani vaprista lavakulu ni vatsrali afa vajuletela ndlela ya kumukhoma hi maqhinga vayamudlaya;

2   hikusa afa vaku: “Svingave ankhubzini; hikusa vhanu vangachuka vahamba svitereka.”

3   Loko ali Betanya, na alalela akaya ka Simoni, lwewa nhlokonho, kutlhasa mun’we wansati ni ngwama ya kutiyelanya leyinga ni mafuzra ya kunun’hwela ni ya kudula svinene, ya kuhambiwa hi xiluva xa kunandzrika xa le Indya xa kuka xingapatsriwanga na nchumu. Adlaya ngwama, achela mafuzra ya kone anhlokweni ya Yesu.

4   Kutani van’we van’unun’uta, vaku: “Hayini kutlangiwi hi mafuzra lawa ya kunun’hwela?

5   Hikusa mafuzra lawa ya kunun’hwela inhaka maxavisiwile hi mali ya kutlula madzana mazrazru ya madenari yiyanyikiwa svisiwana!” Kutani vamusola svinene lwe wansati.

6   Kambe Yesu aku: “Mutsrhikani. N’wimuhluphela yini? Andzriyenceli ntizro wa kuxonga.

7   Hikusa svisiwana n’wi nasvu minkama hinkwayu, nakone n’wingasviyencela lesvinene nkama wini na wini n’wisvijulaka, kambe mine an’wi na mine nkama hinkwawu.

8   Ayenci lesvi asvikotiki. Abuyi achela mafuzra ya kunun’hwela amizrini yanga na kungasitlhasa xilahlu xanga.

9   Ndzrihlayela mfuzri ndzrili ku n’wine: Hinkwaku lomu kutakazrezriwa madzrungula lamanene amisaveni hinkwayu, lesvi lwe wansati angasviyenca svitadzrunguliwa, akuva adzrimukiwa ha svone.”

10   Kutani Yuda Iskariyota, mun’we wa lava khume na vabizri, ahuma ayakanela ni vaprista lavakulu akuva akota kumunyiketa ku vone.

11   Loko vasviyingela, vanyonxa vava vamudumbisa lesvaku vatamunyika mali. Kutani asungula kujuletela nkama wa hombe wa kumunyiketa.

12   Kutani hi siku dzra kusungula dzra Makati ya Kuka Handzrelo, nkama lowu vatolovelaka kutlhava hamba ya Paxkwa, vadondzrisiwa vakwe vaku ku yene: “Xana unavela lesvaku hiyakululamiselela kwini mbangu wa kudela kone Paxkwa?”

13   Kutani azruma vabizri ku vadondzrisiwa vakwe, aku ku vone: “Nhingenani doropeni. N’witatlhangana ni mhunu na azrwali hotsro ya mati. Mulandzrani.

14   Kutani lomu atakanhingena kone, bzelani n’winyi wa muti, n’wiku: ‘Mudondzrisi ali: “Xi kwini xilawu xa vayeni la ndzringadaka kone Paxkwa ni vadondzrisiwa vanga?”’

15   Kutani atan’wikomba yindlu ya le henhla, leyinga ni tafula ni svitsrhamu, ni svibza hinkwasvu. Hilulamiselani kone.”

16   Kutani vadondzrisiwa vahuma vaya doropeni. Vayakuma xisvosvi angahlayisa xisvone, valulamisela Paxkwa.

17   Kutani loko dzripelile, abuya ni lava khume na vabizri.

18   Kutani na vahatsrhami tafuleni vada, Yesu aku: “Ndzrihlayela mfuzri ndzrili ku n’wine: Mun’we ku n’wine atandzrixavisa; yelwe adaka na mine.”

19   Vasungula kutlhaveka timbilu, vamuvutisa ha mun’wemun’we, vaku: “Angava mine?”

20   Aku ku vone: “I mun’we ku lava khume na vabizri; yelweyi acovelaka na mine kola ka ximbengana.

21   Hikusa N’wana wa mhunu awafamba, hi laha svitsraliwiki ha kone mayelanu na yene. Kambe khombo dzra mhunu wa kone lweyi N’wana wa mhunu adlayisiwaka ha yene! Inhaka svimuyampselile loko mhunu wa kone afa angabelekiwanga.”

22   Vaku na vahada, ateka kati, akhensa, adzrikhemelela, avanyika, aku: “Danani. Lesvi i mizri yanga.”

23   Agama ateka xinwelo, akhensa, avanyika, kutani hinkwavu vanwa ha xone.

24   Kutani aku ku vone: “Lesvi i ngati yanga ya xipfumelelanu, leyitakahalatiwa kupfuna vanyingi.

25   “Ndzrihlayela mfuzri ndzrili ku n’wine: ndzringaka ndzringahanwi vhinyo kuyatlhasa asikwini ledzri ndzritakadzrinwa na dzrahakuhuma amfun’wini wa Xikwembu Nkulukumba.”

26   Kutani vayimbelela svidzrumiso, vagama vaya Nhaveni ya Minhlwazri.

27   Kutani Yesu aku ku vone: “N’wine hinkwenu n’witawela ntlhan’wini, hikusa kutsraliwi lesvi: ‘Ndzritaba mubzisi, kuhangalaka tihamba ta kone.’

28   Kambe loko ndzripfukile, ndzritazranga ndzriyan’wiyimela le Galileya.”

29   Kambe Petrosi aku ku yene: “Nambiloko hinkwavu lavan’wana vangowela ntlhan’wini, mine ndzringewi.”

30   Kutani Yesu aku ku yene: “Ndzrihlayela mfuzri, ndzrili ku wene: Wene, namunhla vusiku bzobzi, na nkuku wungasiyimba kubizri, utandzrilandzrula kuzrazru.”

31   Kambe atizra kuhlayetela lesvi: “Nambi svokombela akuva ndzrifa na wene, ndzringaka ndzringakulandzruli.” Na vone hinkwavu lavan’wana vahlaya svo sva svin’we.

32   Kutani vatlhasa ku mbangu lowu valiki i Getsemani. Kutani Yesu aku ku vadondzrisiwa vakwe: “Tsrhamani la; ndzrabuya, ndzroyakhongota.”

33   Kutani ateka Petrosi, Yakobe na Yohani afamba navu, asungula kukazrateka svinene amoyeni wakwe ni kukameka ngopfu mbilu.

34   Agama aku ku vone: “Ndzritwa gome dzrikulu ahikeni dzranga, kuyatlhasa akufeni. Tshramani la, n’wivonelela.”

35   Kutani atsrhindzrekanyana, awela hansi asungula kukhongota lesvaku, loko svikoteka, nkama lowo wungamuhundzra.

36   Kambe afa aku: “Abba, we Tatana wanga! Hinkwasvu svakoteka ku wene; ndzrisusele xinwelo lexi. Kambe kungayenceke kuzrandzra kwanga; akuyenceke kuzrandzra kwaku.”

37   Kutani atlhela, avakuma na vakhutsriyelile. Aku ku Petrosi: “Simoni, wokhutsriyela? Awuvanga nawu ntamu wa kuvonelela hi wora dzrin’we ntsena?

38   Vonelelani n’witlhela n’wikhongota akuva n’wingaweli andzringweni. Wone moya wasvijula; kambe nyama ayi na ntamu.”

39   Kutani atlhela asuka ayakhongota, ahlaya mazritu wolawa ya man’we.

40   Kutani atlhela abuya, avakuma na vakhutsriyelile, hikusa mahlo yavu afa mabindzriwa hi vuzrongo; kutani vangativi ni xa kumuyangula.

41   Kutani atlhela abuya dzra vuzrazru, aku ku vone: “Ku nkama wa kufana ni lowu, n’wine n’wokhutsriyela, n’wiwisa! Gamani! Nkama wutlhasile! Lavisani! N’wana wa mhunu atanyiketiwa amavokweni ya vadohi.

42   Sekelekani hifamba. Lavisani! Lweyi andzridlayisaka a kola kusuhi.”

43   Kutani, hi kuhangwesa, na ahavulavula, kotlhasa Yuda, mun’we wa lava khume na vabizri, na a ni xitsrhungu lexitameliki timpanga ni tinhonga, na vazrumeliwi hi vaprista lavakulu ni vatsrali, ni vakulu.

44   Kutani lweyi amudlayisaka afa avanyiki xikombiso, aku: “Lweyi ndzritakamun’quta, hi yelweyo. Mukhomani n’wifamba naye na avoneleliwa ha hombe.”

45   Kutani loko atlhasa, atekela kuyela Yesu, aku ku yene: “Mudondzrisi!” Agama amun’quta.

46   Kutani vamukhoma, vangamutsrhiki.

47   Kambe, mun’we wa lava afaka vayimi kusuhi ahlomula lipanga dzrakwe aba xitizri xa muprista lwenkulu, axitsrema ndleve.

48   Kambe Yesu avayangula, aku: “Xana n’wibuyela kutatandzrikhoma hi timpanga ni tinhonga ingiki ndzrova xigevenga?

49   Siku ni siku afa ndzrili na n’wine atempeleni na ndzridondzrisa, kambe an’windzrikhomanga. Kambe, lesvi sviyencela kuhetisisa Matsralwa.”

50   Kutani hinkwavu vamutsrhika vusvakwe vatsrutsruma.

51   Kambe mumpsha wa kukazri afa amulandzrelela na atikapeki mujansi wa linyu ntsena amizrini, ange na nkhancu; kutani vakumugi!

52   Kambe achupuka, asiya mujansi wakwe wa linyu, atsrutsruma na esala hi xizrangiso.

53   Kutani vateka Yesu vamuyisa ku muprista lwenkulu. Hinkwavu vaprista lavakulu ni vakulu, ni vatsrali, vahlengeletana.

54   Kambe Petrosi, amulandzra hi le kule, ayatlhasa akintazri wa muti wa muprista lwenkulu. Atlhasa atsrhama ni vatizri va muti, awozra ndzrilo.

55   Kutani vaprista lavakulu ni Huvo ya Xiyuda hinkwayu afa vajula vumboni bza kuyavanyisa Yesu akuva vamudlaya, kambe vangabzikumi.

56   Hikusa vanyingi afa vamuhembela hi vumboni bzavu, kambe lesvi afaka vabeka vumboni ku svone afa svingakumani.

57   Kugama kusekeleka van’we, vamuhembela hi vumboni bzavu, vaku:

58   “Hine himuyingeli na aku: ‘Ndzritahohlota tempele ledzringahambiwa hi mavoko, ndzriyaka dzrin’wana dzra kuka dzringahambiwanga hi mavoko hi masiku mazrazru.’”

59   Kambe nambi vahlaya svosvo, lesvi afaka vabeka vumboni ku svone afa svingakumani.

60   Kutani muprista lwenkulu asekeleka ayima amakazri kwavu, avutisa Yesu, aku: “Awuyanguli nchumu? Xana lava vabeka vumboni bza lesvaku uhoni yini?”

61   Kambe amiyela akuntse, angayanguli nchumu. Muprista lwenkulu atlhela amuvutisa, aku: “Xana u Kriste, N’wana wa Lwakhensiwaka?”

63   Kutani muprista lwenkulu ahandzrula xiyambalu xakwe, aku: “Hahajulela yini timboni?

62   Kutani Yesu aku: “Ndzri yene; nakone n’wine n’witavona N’wana wa Mhunu na atsrhami avokweni dzra xinene dzra ntamu, loko abuya hi matlavi ya le tilweni.”

64   N’wixiyingelile xisandzru! N’wisvivonisa kuyini?” Kutani hinkwavu vaku afaneliwa hi kukhatisiwa hi lifu.

65   Kutani van’we vasungula kumuthukela mazri, vamufuneketa vuso, vamubukutela hi tin’qindhi, na vaku: “Profeta!” Na vone vatizri va muti vamuteketa hi timpama.

66   Kutani na Petrosi ali hansi, le kintazri, kobuya mun’we wa vatizri va xisati va muprista lwenkulu.

67   Loko avona Petrosi na awozra ndzrilo, amulavisisa, aku: “Na wene afa uli ni munazareta lweyi, Yesu.”

68   Kambe aphika, aku: “Andzrimutivi, mfuzri nesvaku ukanela ha yini andzrisvitwisisi.” Agama ahuma aya nyangweni.

69   Kutani lwewa nhwanyana wa xitizri amuvona, atlhela asungula kubzela lava afaka vali kusuhi, aku: “Lweyi i mun’we wa vone.”

70   Kambe atlhela aphikisa. Kutani loko kuhundzra nkamanyana, lava afaka vali kusuhi vatlhela vasungula kukanela na Petrosi, vaku: “Wene nakunene u mun’we wa vone, hikusa mfuzri u mugalileya.”

71   Kambe asungula kutihlayela makhombo atlhela afunga, aku: “Andzrimutivi mhunu lweyi n’wikanelaka ha yene!”

72   Kolahu nkuku wuyimba dzra vubizri, kutani Petrosi adzrimuka mazritu lawa Yesu angamahlaya ku yene, aku: “Na nkuku wungasiyimba kubizri, wene utandzrilandzrula kuzrazru.” Kutani atlhaveka mbilu, adzrila.