BRX

1   Aku ahuma atempeleni, mun’we wa vadondzrisiwa vakwe aku ku yene: “Mudondzrisi, hingalavisa kuhlamalisa ka mazribze lawa ni tiyindlu leti!”

2   Kambe, Yesu aku ku yene: “Wativona tiyindlu leti ta kukulisa xilesvi? Aku na zribze dzritakasala ahenhla ka dzrin’wana. Hinkwawu matambundzrumuxiwa.”

3   Loko atsrhami le Nhaveni ya Minhlwazri, ka kulavisana ni tempele, Petrosi, Yakobe, Yohani na Andreye vamuvutisa hi tlhelo, vaku:

4   “Hibzele: Xana minchumu leyi mitayenceka siku muni, nakone hi xini xikombiso xa lesvaku minchumu leyi hinkwayu mijula kuhela?”

5   Kutani Yesu asungula kuvabzela lesvi: “Tivonelani, hikusa mhunu angachuka an’wikanganyisa.

6   Vanyingi vatata hi vito dzranga, vaku: ‘Hi mine.’ Kutani vatakanganyisa lava kutala.

7   Nangweso, loko n’wiyingela tiyimpi ni timhaka ta tiyimpi, n’wingachaveni. Lesvo svifanela kusungula svihumelela, kambe abzisiva vugamu.

8   “Hikusa dzrin’we tiko dzritapfukela tiko dzrin’wana ni mfumu wun’we wutapfukela mfumu wun’wana; kutava ni svimbeta amimbangwini ya kusiyanasiyana; ni tindlala. Lesvi i kusungula ka kuxaniseka.

9   “Kambe n’wine, tivonelani. Vatan’wikhomisa n’wiyathethisiwa, n’wibeteteliwa amasinagogeni n’witlhela n’wiyayimisiwa amahlweni ka tihosi ta svifundzrankulu ni tihosi ta tiko hi mhaka yanga, akuva vabekeliwa vumboni.

10   Nangweso, amatikweni hinkwawu, kufanela kuzranga hi kuzrezriwa madzrungula lamanene.

11   Kutani loko van’wikhoma van’wiyisa kuthethisiweni, n’wingachaveni hi kuka n’wingasvitivi sva kusvihlaya; kambe lesvi n’witakanyikiwa kusvihlaya hi nkama wolowo, hlayani svolesvo. Hikusa ahi n’wine n’wikanelaka, kambe i moya wa kuxwenga.

12   Nakone mun’we makwavu atadlayisa mun’wana makwavu, ni tatana atadlayisa n’wana, mfuzri vana vatapfukela vapsele, vavadlayisa.

13   Nakone n’wine n’witanyenyiwa hi vhanu hinkwavu hi mhaka ya vito dzranga. Kambe lweyi atiyiselaka kuyatlhasa avugan’wini atahuluxiwa.

14   “Kambe, loko n’wivona xinyenyentso lexivangaka kuhonetela na xiyimi la xingafanelikiki kuyima kone (Lweyi adondzraka aatwisise!), kutani lavanga Yudeya avatsrutsrumele atinhaveni!

15   Lweyi anga ahenhla ka yindlu angaxike ahanhingena ahumexa nchumu andlwini yakwe;

16   ni lweyi anga amasin’wini angatlhelele akaya ayateka mpahla yakwe.

17   Vambuyangwana vavasati lavanga ni tinyimba ni lavayan’wisaka amasikwini wolawo!

18   Kutani khongotani lesvaku svingayenceki hi vuxika;

19   hikusa masiku lawo matava ya nhlomulo wa kuva wungasami wuva kone wa kufana na wone kusukela akusunguleni ka ntumbuluku lowu Xikwembu Nkulukumba angawuhamba kuyatlhasa ankameni lowo, nakone wungatitlhela wuva kone.

20   Nangweso, loko Yehovha afa angapumbanga masiku ya kone, inha kungatihuluka mhunu ni mun’we. Kambe hi mhaka ya vahlawuliwa lava angavalanga, apumbi masiku ya kone.

21   “Nangweso, mfuzri, n’wingapfumeleni loko mhunu on’wn’wibzela lesvi: ‘Vonani! Hi lweyi Kriste!’ Kumbe: ‘Vonani! Hi lwiyaa!’

22   Hikusa kutahumelela vaKriste va madzrimi ni vaprofeta va madzrimi, nakone vatayenca mahlolana ni svihlamaliso lesvaku, loko svikoteka, vakanganyisa vahlawuliwa.

23   Kutani n’wine, tivonelani. Ndzrin’wibzeli hinkwasvu na svingasiyenceka.

24   “Kambe amasikwini lawo, antsrhaku ka nhlomulo wa kone, dambu dzritandzruluka munyama, ni hweti yingativaninga,

25   ni tinyeleti titawa hi le tilweni, nakone mintamu leminga matilweni mitatsrekatsreka.

26   Kutani hi nkama lowo vatavona N’wana wa Mhunu na ata hi matlavi, na a ni ntamu lowukulu ni kuphatima.

27   Kutani hi nkama lowo atazruma tintsrumi tihlengeleta vahlawuliwa vakwe matlhelo hinkwawu ya mune ya misava, kusukela avugan’wini bza misava kuyatlhasa avugan’wini bza tilo.

28   “Kutani dondzrani hi xifaniso lexi xa nkuwa: Loko tinkambu ta wone kutani tisunguli kunabzala, tihluka makamba, n’wasvitiva lesvaku malanga ma kusuhi.

29   Xisvosvo na n’wine, loko n’wivona minchumu leyo miyenceka, svitivani lesvaku ale kusuhi, kola nyangweni.

30   Ndzrihlayela mfuzri ndzrili ku n’wine: Lixaka ledzri dzringaka dzringahundzri na kungasiyenceka minchumu leyi hinkwayu.

31   Kasi tilo ni misava svitahundzra, kambe mazritu yanga mangaka mangahundzri.

32   “Mayelanu ni siku dzra kone ni nkama wa kone, aku na mhunu lwasvitivaka, nambi tintsrumi atilweni kumbe N’wana, kambe svotibziwa ha Tatana.

33   Tivonelani, n’witsrhama na n’wivonelela, hikusa an’wisvitivi lesvaku nkama wa kone wutava wini.

34   Svifana ni mhunu lweyi ayaka amatikweni, afambaka asiya yindlu yakwe, na asiyeli malandzra yakwe ntizro, mun’wana ni mun’wana amunyika ntizro wakwe, atlhela aleleta muvoneleli wa nyangwa kutsrhama na avonelela.

35   Xilesvo, tsrhamani hi kuvonelela, hikusa an’wisvitivi lesvaku n’winyi wa yindlu atabuya nkama muni, kumbe atava amadambzeni kumbe amakazri ka vusiku, kumbe ampundzrwini kumbe amixweni,

36   lesvaku loko atlhasa hi xichuketa, angan’wikumi na n’wokhutsriyela.

37   Kambe lesvi ndzrin’wibzelaka svone, ndzribzela hinkwavu: Tsrhamani hi kuvonelela.”