BRX

1   Kutiloko vaya vatsrhindzrekela Yerusalema, ka kuya Betifaxje na Betanya, le Nhaveni ya Minhlwazri, azruma vabizri ku vadondzrisiwa vakwe,

2   aku ku vone: “Yanani axidoropaneni lexi n’wilavisaniki na xone. Neti n’winhingena, n’witakuma ximbongolwana na xitsrimbiwile, lexi kungeke na mhunu lwasamiki afamba ha xone. Xitlhantlhani n’wixibuyisa halenu.

3   Kutani loko mhunu wa kukazri achuka aku: ‘N’wiyencela yini lesvo?’, n’wiku: ‘Hilesvi xijuliwaka hi Hosi, kambe yitaxitlhelisa svosvi.’”

4   Kutani vasuka vafamba, vayakuma ximbongolwana na xitsrimbiwile ahandle ka nyangwa, ka kulavisana ni xitaratu, vaxitlhantlha.

5   Kambe van’we va lava afaka vayimi kone vaku ku vone: “N’wixitlhantlhela yini ximbongolwana lexo?”

6   Kutani vavahlamula hi la Yesu avaleletiki ha kone, vavatsrhika.

7   Kutani vabuyisa ximbongolwana ku Yesu, vabeketela sviyambalu svavu ahenhla ka xone, agama atsrhama ahenhla ka xone.

8   Kutani vanyingi na vone vabeketela sviyambalu svavu andleleni; vambeni vabeketela sviphundla lesvi vangasvitsrema amasin’wini.

9   Kutani lava afaka vali phambeni ni lava afaka vali ntsrhaku vabandlukana, vaku: “Huluxa! Aakhensiwe lweyi ataka hi vito dzra Yehovha!

10   Akukhensiwe Mfumu lowutaka wa tatana wezru Davhida! Huluxa le henhlahenhla!”

11   Agama anhingena Yerusalema, atempeleni, akambela xiyimu xa minchumu hinkwayu. Kambe lesvi dambu afaka dzripelile, ahuma aya Betanya ni lava khume na vabizri.

12   Mundzruku ka kone, loko vasuka Betanya, atwa ndlala.

13   Kutani avona nkuwa he kule, lowu afaka wu ni makamba, atsrhindzrekela akuva avona lesvaku kumbe angakuma xa kukazri ku wone. Kambe, loko atlhasa ku wone, akuma lesvaku awu na nchumu handle ka makamba ntsena, hikusa afa wunge nkama wa makuwa.

14   Kutani aku ku wone: “Kungahatlhele kuva ni lweyi adaka handzru waku ni siku ni dzrin’we!” Kutani vadondzrisiwa vakwe afa vasviyingela.

15   Kutani vatlhasa Yerusalema. Atlhasa anhingena atempeleni, asungula kuhlongola lava afaka vaxavisa ni lava afaka vaxava atempeleni, awisetela matafula ya vacincisi va mali ni svitsrhamu sva lava afaka vaxavisa svituvana.

16   Nakone afa angatsrhiki mhunu ahundzra hi le tempeleni na azrwali xibza xa kukazri.

17   Nakone afa avadondzrisa, na ahlaya lesvi: “Xana akutsraliwanga lesvaku: ‘Yindlu yanga yitavitaniwa yindlu ya xikhongoto ya matiko hinkwawu’? Kambe n’wine n’wiyiyenci mhakwa ya vayivi!”

18   Kutani vaprista lavakulu ni vatsrali vasviyingela, vasungula kujuletela tindlela ta kumudlaya. Kambe afa vamuchava, hikusa xitsrhungu hinkwaxu afa xihlamalisiwa hi madondzrisela yakwe.

19   Amadambzeni ka kone, vahuma adoropeni.

20   Kambe loko vahundzra ni mixo, vavona nkuwa na wuwomile kusukela amitsrwini.

21   Kutani Petrosi adzrimuka, agama aku ku Yesu: “Mudondzrisi, langusa! Nkuwa lowu ungawuzruketela wuwomile.”

22   Kutani Yesu ayangula, aku ku vone: “Vanani lipfumelo ku Xikwembu Nkulukumba.

23   Ndzrihlayela mfuzri ndzrili ku n’wine: Lweyi angabzelaka nhava leyi, aku: ‘Suka uyaticukumeta alwandle’, na angaganaganeki ambilwini yakwe, kambe ava ni lipfumelo dzra lesvaku lesvi asvihlayaka svitayenceka, svitamuyencekela.

24   Hi svosvo ndzrin’wibzelaka ha svone, ndzriku: Hinkwasvu n’wisvikombelaka loko n’wikhongota, pfumelani lesvaku n’wisviyamukelile, kutani n’witasviyamukela.

25   Nakone loko n’wiyima n’wikhongota, dzrivalelani xin’wana ni xin’wana lexi mhunu an’widoheliki xone, lesvaku Tatana wenu lwanga matilweni na yene atan’widzrivalela svihono svenu.”

[26]

27   Vatlhela vanhingena Yerusalema. Kutani na afambafamba atempeleni, kutlhasa vaprista lavakulu ni vatsrali, ni vakulu,

28   vaku ku yene: “Xana uyenca minchumu leyi hi ntamu wa mani? Hi mahlayela man’wana, hi mani lwakunyikiki ntamu wa kuyenca minchumu leyi?”

29   Yesu aku ku vone: “Yimani ndzrin’wihamba xivutiso. Loko n’windzrihlamula, na mine ndzritan’wibzela lesvaku ndzriyenca minchumu leyi hi ntamu wa mani.

30   Xana babatiso dzra Yohani afa dzrisukela atilweni kumbe avhanwini? Ndzrihlamulani.”

31   Kutani vasungula kuhamba tinkonta hi xivone, vaku: “Loko hiku: ‘Afa dzrisukela atilweni’, ataku: ‘Ke, hayini n’wingakholwanga ku yene?’

32   Kambe hingaku: ‘Avhanwini?... ’” Afa vachava xitsrhungu, hikusa vhanu hinkwavu afa vaku Yohani afa ali muprofeta wa xihlayelamfuzri.

33   Kutani vahlamula Yesu, vaku: “Ahisvitivi.” Kutani Yesu aku ku vone: “Na mine ndzringatin’wibzela lesvaku minchumu leyi ndzrimiyenca hi ntamu wini.”