-
Matewu 10
1 Kutiloko asuki kone, anhingena mindzrilakaneni ya Yudeya ka kuhundzra Yordani; svitsrhungu svitlhela svihlengeletana ku yene. Kutani, tanihi laha afaka atoloveli ha kone, asungula kusvidondzrisa.
2 Kutani vafarisi vamutsrhindzrekelela, vamuvutisa lesvaku nawu wapfumela kuva nuna atsrhika nsati kumbe ihina, na vayencela kumudzringa.
3 Kambe avahlamula, aku: “Xana Moxe an’wileleti lesvaku yini?”
4 Kutani vaku: “Moxe apfumeleli kutsrala papela dzra kutimisa vukati, umuhlongola.”
5 Kambe Yesu aku ku vone: “An’witsraleli xileleto lexo hi mhaka ya kutlanyala ka timbilu tenu.
6 Kambe kusukela amasungulwini ya ntumbuluku, ‘Xikwembu Nkulukumba avayenci wanuna ni wansati.
7 Xilesvo, mhunu atasiya tatana wakwe ni mamana wakwe,
8 kutani hi vubizri vatava nyama yin’we.’ Kutani avehe vabizri, kambe nyama yin’we.
9 Xisvosvo, lesvi Xikwembu Nkulukumba asvitlhanganisiki, mhunu angasvihambanise!”
10 Ankama lowu vangatlhela vava andlwini, vadondzrisiwa vamuvutisa hi mhaka leyi.
11 Agama aku ku vone: “Mani na mani lwatsrhikaka nsati wakwe achata ni mumbeni adohela nsati hi vumbuye,
12 nakone loko wansati atsrhikana ni nuna wakwe agama achata ni mumbeni, ayenca vumbuye.”
13 Kutani vhanu vamubuyisela svivanana akuva asvikhumba, kambe vadondzrisiwa vavatshinya.
14 Loko asvivona, Yesu akwata, aku ku vone: “Tsrhikani svivanana svindzribuyela; n’wingasvitsimbeni, hikusa Mfumu wa Xikwembu Nkulukumba i wa lavafanaka nasvu.
15 Ndzrihlayela mfuzri ndzrili ku n’wine: Mani na mani lwangayamukelikiki Mfumu wa Xikwembu Nkulukumba kufana ni xin’wanana angaka anganhingeni ku wone.”
16 Kutani asvitlakula, asvikatekisa, asvitlhanteka mavoko.
17 Aku awasuka, kobuya mhunu hi kutsrutsruma, atatamukhinsamela, amuvutisa lesvi: “Mudondzrisi Lwenene, xana ndzrifanela kuyenca yini akuva ndzrida pfindla dzra vutomi lebzingahelikiki?”
18 Yesu aku ku yene: “Hayini undzrivitana lwenene? Aku na mhunu anga lwenene handle ka Xikwembu Nkulukumba ntsena.
19 Wamitiva milawu lemiliki: ‘Ungadlaye; ungambuyete; ungayive; unganyikele vumboni bza madzrimi; ungakanganyise; kombisa xichavu ku tatana waku ni mamana.’”
20 Mhunu lweyo aku ku yene: “Mudondzrisi, ndzrisunguli na ndzrehe ntsrongo kulandzra milawu leyi hinkwayu.”
21 Yesu amulavisa, amuzrandzra, agama aku: “Kehesala nchumu wun’we ntsena kuva uwuyenca: Famba uyaxavisa hinkwasvu lesvi unga nasvu, unyika svisiwana, kutani utava ni vukosi atilweni; ugama ubuya undzrilandzra.”
22 Kambe avaviseka hilesvi angasviyingela; asuka afamba na atlhaveki mbilu, hikusa afa a ni minchumu minyingi.
23 Kutani Yesu andzruluka alavisa hala ni hala, agama aku ku vadondzrisiwa vakwe: “Svitavakazratela ngopfu svinene lavanga ni timali kunhingena amfun’wini wa Xikwembu Nkulukumba!”
24 Kambe vadondzrisiwa vahlamala hi mazritu yakwe. Kutani Yesu atlhela ayangula, aku: “Vananga, svikazrata ngopfu svinene kunhingena amfun’wini wa Xikwembu Nkulukumba!
25 Svinabzala ngopfu kuva kamele dzrinhingena hi mbhovo ya ximazri kutlula kuva mhunu lwanga xipfundzri anhingena amfun’wini wa Xikwembu Nkulukumba.”
26 Kutani vahlamalisisa, vaku ku yene: “Ke, hi mani lwangahulukaka?”
27 Yesu avalavisisa, aku: “Ku vhanu asvikoteki, kambe ku Xikwembu Nkulukumba, asvi tanu, hikusa hinkwasvu svakoteka ku Xikwembu Nkulukumba.”
28 Petrosi asungula kukanela, aku: “Lavisa! Hine hisiyi hinkwasvu hi kulandzra.”
29 Yesu aku: “Ndzrihlayela mfuzri ndzrili ku n’wine: Anga kone lwasiyiki yindlu, kumbe vamakwavu va xinuna kumbe va xisati, kumbe mamana, kumbe tatana, kumbe vana, kumbe masimu, hi mhaka yanga ni hi mhaka ya madzrungula lamanene,
30 lwatakaka angakumi kadzana tiyindlu, vamakwavu va xinuna, vamakwavu va xisati, vamamana, vana ni masimu, svosvi ku nkama wolowu—ni kuxanisiwa—ni vutomi lebzingahelikiki, amisaveni lemitaka.
31 Kambe vanyingi va lavanga va kusungula vatava va vugamu, kutani lavanga va vugamu vatava va kusungula.”
32 Lesvi vagamiki vakhoma ndlela, vatlhantukela Yerusalema. Kutani Yesu avazrangela; vadondzrisiwa vatala hi kuhlamala, kasi lava afaka vali ntsrhaku vatala hi kuchava. Atlhela ateka lava khume na vabizri hi tlhelo, asungula kuvabzela lesvi afaka svili kusuhi ni kumuyencekela, aku:
33 “Lavisani! Hitlhantukela Yerusalema, kutani N’wana wa Mhunu atanyiketiwa ku vaprista lavakulu ni vatsrali. Vatamutsremela xikhatiso xa lifu vava vamunyiketa amavokweni ya va matiko,
34 kutani lavo vatatlanga ha yene, vamuthukela mazri, vamukwapa, vagama vamudlaya; kambe antsrhaku ka masiku mazrazru atapfuka.”
35 Kutani Yakobe na Yohani, vana va Zebedewu, vamutsrhindzrekelela, vaku ku yene: “Mudondzrisi, afa hinavela lesvaku uhiyencela lesvi hitakakukombela svone.”
36 Kutani aku ku vone: “N’winavela lesvaku ndzrin’wiyencela yini?”
37 Kutani vaku: “Tsrhika mun’we ku hine atsrhama atlhelweni dzraku dzra xinene, ni lwemun’wana atsrhama atlhelweni dzraku dzra ximatsri, amfun’wini waku lowa kuphatima.”
38 Kambe Yesu aku ku vone: “An’wisvitivi lesvi n’wikombelaka svone. Xana n’wingasvikota kunwa lesvi ndzrijulaka kusvinwa, kumbe kupela ababatisweni ledzri ndzrijulaka kupela ku dzrone?”
39 Kutani vaku ku yene: “Hingasvikota.” Kutani Yesu aku ku vone: “Lesvi ndzrijulaka kusvinwa, n’witasvinwa, ni babatiso ledzri ndzrijulaka kupela ku dzrone, n’witapela ku dzrone.
40 Kambe kutsrhama axineneni xanga kumbe aximatsrini xanga, ahi mine ndzringa ni mfanelo ya kun’winyika, kambe i sva lava svibekiseliwiki vone.”
41 Kutani loko lava va khume vasviyengela, vahlundzrukela Yakobe na Yohani.
42 Kambe Yesu avavitana, aku ku vone: “N’wasvitiva lesvaku lavankontiwaka lesvaku hi vone vafumaka matiko vamakhonzisa, ni lesvaku lavakulu ku vone vatizrisa ntamu ahenhla kwavu.
43 Kambe svingave tanu amakazri kwenu; kambe lweyi ajulaka kuva nkulu amakazri kwenu afanela kuva mutizreli wenu,
44 nakone lweyi ajulaka kuva wa kusungula amakazri kwenu afanela kuva nandzra wa hinkwavu.
45 Hikusa nambi N’wana wa Mhunu angatelanga kutatatizreliwa, kambe ateli kutatatizrela ni kunyikela vutomi bzakwe akuva ahuluxa lava kutala.”
46 Kutani vatlhasa Yeriko. Kambe loko aku awahuma Yeriko ni vadondzrisiwa vakwe ni xitsrhungu xa kuhlawa, okuma lesvaku andleleni kutsrhami Bartimewu, n’wana Timewu, lweyi afaka angavoni nakone afaka ahanya hi kukombela.
47 Loko atwa lesvaku i Yesu wa Nazareta, asungula kubandlukana, aku: “Yesu, N’wana Davhida, ndzritwele vuzrombe!”
48 Kutani vanyingi vamukhwavela, vaku: “Miyela!” Kambe abandlukana hi kutlulisa, aku: “N’wana Davhida, ndzritwele vuzrombe!”
49 Kutani Yesu ayima, aku: “Muvitanani abuya halenu.” Kutani vavitana mhunu lweyo wa kuka angavoni, vaku ku yene: “Tiya nhlana, usekeleka; awakuvitana!”
50 Kutani acukumeta mujansi wakwe, asekeleka aya ku Yesu.
51 Kutani Yesu amuyangula, aku: “Xana unavela akuva ndzrikuyencela yini?” Lwewa kuka angavoni aku ku yene: “Mudondzrisi, ndzrinavela kutlhela ndzrivona.”
52 Kutani Yesu aku ku yene: “Famba. Lipfumelo dzraku dzrikuhanyisile.” Kutani atekela kutlhela avona, ava asungula kumulandzra andleleni.