-
Marku 1
1 Kusungula ka madzrungula lamanene ya Yesu Kriste, N’wana wa Xikwembu Nkulukumba:
2 Svanga hesvi svitsraliwiki ha kone abukwini dzra muprofeta Ezaya, aku: “Lavisani! Ndzrizrumela muzrumiwa wanga amahlweni kwenu, lwe atakan’wilulamisela ndlela.
3 Ku ni zritu dzra lwe abandlukanaka le huleni, aku: ‘Lulamiselani ndlela ya Yehovha! Yencani svitaratu svakwe svilulama.’”
4 Kuhumeleli Yohani Mubabatisi amananga, azrera babatiso dzra kutisola akuva vhanu vadzrivaleliwa svidoho.
5 Kutani tiko hinkwadzru dzra Yudeya ni hinkwavu va Yerusalema afa vahuma vaya ku yene; avababatisa anambzeni wa Yordani, na vatihlaya svidoho svavu alivaleni.
6 Kutani Yohani afa ayambala mpahla ya voya bza kamele, atsrimba bandhi dzra xikhumba alikhalwini, ada humbi ni vulombe bza tinyonxi bza nhova.
7 Kutani afa azrezra, aku: “Lwe andzritlulaka hi ntamu awata antsrhaku kwanga, lweyi nambi ngoti ya tintangu takwe ndzrikaka ndzringafaneli kukazrama ndzriyitlhantlha.
8 Mine ndzrin’wibabatisa hi mati, kambe yene atan’wibabatisa hi moya wa kuxwenga.”
9 Kutani amasikwini lawo, Yesu ata hi le Nazareta wa Galileya, ababatisiwa le Yordani hi Yohani.
10 Ati na atlhantuka ahuma amatini hi kuhangwesa, ovona matilo na mayaviwa, kutani kuxika moya ahenhla kwakwe, svanga tuva.
11 Kutani kuhuma zritu hi le matilweni, dzriku: “Wene u N’wananga lwazrandzriwaka; ndzranyonxa ha wene!”
12 Kutani moya wutekela kumususumetela kuya mananga.
13 Kutani atsrhama amananga kudzringana mune wa makume ya masiku, na adzringiwa hi Sathana. Afa atsrhama ni svihazri sva nhova, kambe tintsrumi afa timupfunisa.
14 Kutani antsrhaku ka kukhomiwa ka Yohani, Yesu anhingena Galileya, azrezra madzrungula lamanene ya Xikwembu Nkulukumba,
15 aku: “Nkama wuhetisekile, kutani Mfumu wa Xikwembu Nkulukumba wutsrhindzrekelile. Tisolani, n'wipfumela ku madzrungula lamanene.”
16 Ati na afamba atlhelweni ka Lwandle dzra Galileya, ovona Simoni ni makwavu Andreye, na vacukumetela minkukutu yavu alwandle, hikusa afa vali vaphasi va tinhlampfi.
17 Kutani Yesu aku ku vone: “Ndzrilandzrani, ndzritan’wiyenca vaphasi va vhanu.”
18 Kutani vatekela kutsrhika minkukutu yavu, vamulandzra.
19 Ati afambanyana, ovona Yakobe, n’wana Zebedewu, ni makwavu Yohani, na vali bzatsrhwini dzravu, valunghisa minkukutu yavu,
20 kutani ahangwesa avavitana. Kutani vasiya tatana wavu Zebedewu abzatsrhwini ni vatizri, vafamba naye, vamulandzra.
21 Lesvi vanhingeniki Kapernawume. Kutani, hi Savata, atekela kunhingena asinagogeni, asungula kudondzrisa.
22 Kutani vahlamala hi madondzrisela yakwe, hikusa afa avadondzrisa svanga mhunu lwanga ni ntamu, angafani ni vatsrali.
23 Ankameni wolowo afa ku ni wanuna asinagogeni dzravu lweyi afaka a ni moya lowunyamiki. Kutani a bandlukana, aku:
24 “Hikuhonele yini, Yesu, Munazareta? Ubuya uhihelisa kee? Ndzrasvitiva lesvaku u mani, Muxwengi wa Xikwembu Nkulukumba!”
25 Kambe Yesu awukhwavela, aku: “Miyela, uhuma ku yene!”
26 Kutani moya lowunyamiki wuzruzrumelisa mhunu lweyo, wubandlukana hi zritu ledzrikulu, wugama wuhuma ku yene.
27 Kutani hinkwavu vahlamala ngopfu lakakuva vasungula kudokadokisana hi xivone, vaku: “Xa ke dondzro leyi leyimpsha i yini? Hikusa nambi mimoya leminyamiki, amileleta kufana ni hosi, mimuyingiseta.”
28 Kutani ndhuma yakwe yihangalaka hi kuhangwesa matlhelo hinkwawu ya muganga wa Galileya.
29 Kolahu vasuka asinagogeni vaya akaya ka Simoni na Andreye, na va li na Yakobe na Yohani.
30 Mamana wa nkata Simoni afa ayetlelile na avabza hi kuhiseta ka mizri, kutani vatekela kumudzrungulela ndzrava yakwe.
31 Lesvi amunhingeneliki amukhoma hi voko, amupfuxa. Kuhiseta ka mizri kusuka ku yene, kutani asungula kuvayencela lesvi ni lesviyani.
32 Amadambzeni, loko dambu dzripelile, vhanu vasungula kumubuyisela hinkwavu lava afaka vavabza ni lava afaka va ni mademona;
33 kutani doropa hinkwadzru dzritlhangana anyangweni.
34 Kutani adaha vanyingi lava afaka vavabza hi mavabzi ya kusiyanasiyana, ava ahlongola mademona manyingi, kambe mademona afa angamatsrhiki makanela, hikusa afa masvitiva lesvaku i Kriste.
35 Kutani ampundzrwini, na kahamphumile, apfuka ahuma ahandle, aya ku mbangu wa mananga, asungula kukhongota kone.
36 Kambe Simoni ni lava afaka vali naye vafamba vamujuletela.
37 Kutani loko vamukumile, vaku ku yene: “Hinkwavu vakujuletela.”
38 Kambe aku ku vone: “Ahiyeneni kun’wana, ku madoropa lamanga kusuhi, akuva ndzriyazrezra ni le ku wone, hikusa ndzriteli svolesvo.”
39 Kutani afamba, ayazrezra amasinagoneni yavu atikweni hinkwadzru dzra Galileya na ahlongola ni mademona.
40 Kutani abuyeliwa hi mhunu wa nhlokonho, amukombela na akhinsamile, aku ku yene: “Loko usvijula, ungandzribasisa.”
41 Kutani amutwela vuzrombe, analavuta voko amukhumba, aku ku yene: “Ndzrasvijula! Basisiwa.”
42 Kolahu nhlokonho yinyamalala ku yene, abasa.
43 Kutani amunyika svileleto agama atekela kumumukisa,
44 aku ku yene: “Tivonele lesvaku ungabzeli mhunu nchumu, kambe famba uyatikombisa ku muprista, uhumexa magandzrelo ya kubasisiwa kwaku lamaleletiwiki hi Moxe, akuva bziva vumboni ku vone.”
45 Kambe loko mhunu lweyo asukile, asungula kuhuwelela hi ntamu ni kuhangalasa mhaka ya kone hala ni hala, lakakuva Yesu afa angahasvikoti kunhingena adoropeni na avoniwa. Kambe ayitsrhama handle, ku mimbangu ya mananga, kutani vhanu vamubuyela hi matlhelo hinkwawu.