BRX

1   Kutani atlhanganisa lava khume na vabizri ambangu wun’we, avanyika ntamu ni vusvikoti bza kuhlongola mademona hinkwawu ni kudaha mavabzi.

2   Kutani avazruma kufamba vayazrezra Mfumu wa Xikwembu Nkulukumba ni kudaha vhanu,

3   aku ku vone: “N’wingatekeni nchumu wa kuwutizrisa liyendzrweni, nambi nhonga nambi nkwama wa svakuda kumbe makati kumbe mali; nambi minkhancu mibizri.

4   Kambe tsrhamani ku yindlu yin’wana ni yin’wana leyi n’witakanhingena ku yone, n’wiva n’wisukela ku yone.

5   Kutani kwini na kwini lomu vhanu vangan’wiyamukelikiki kone, loko n’wihuma adoropeni ledzro, phumunani ntsrhuzri aminkondzrweni yenu, bzitava vumboni bza lesvaku vayalile.”

6   Kutani vasuka vafamba hi xidoropana xin’wana ni xin’wana, na vazrezra madzrungula lamanene vava vadaha vhanu amimbangwini hinkwayu.

7   Kutani loko ayingela minchumu hinkwayu leyi afaka miyenceka, Heroda, muzrangeli wa xifundzra, ahlamala ngopfu svinene hikuva van’we afa vaku Yohani apfuxiwi akufeni,

8   kambe van’wana afa vaku i Eliya ahumeleliki, kasi vambenyana afa vaku kupfuki mun’we wa vaprofeta va khale.

9   Kutani Heroda aku: “Yohani ndzrimutsremi nhloko. Kutani ke, i mani lweyi ndzriyingelaka minchumu leyi vhanu vamihlayaka ha yene?” Kutani ajuletela ndlela ya kumuvona.

10   Loko vapostola vatlhelile, vadzrungulela Yesu hinkwasvu lesvi vasviyenciki. Agama avateka asuka navu hi tlhelo avayisa adoropeni ledzrivitaniwaka Betsayda.

11   Kambe loko svitsrhungu svisvitivile, svimulandzra. Kutani asviyamukela hi vumbilu asungula kukanela nasvu hi Mfumu wa Xikwembu Nkulukumba, adaha lava afaka vavilela kudahiwa.

12   Kutani dambu afa dzrijula kupela. Kutani lava khume na vabizri vamuyela, vaku: “Lelela vhanu lava vatakota kunhingena asvidoropaneni sva le kusuhi ni le handle ka madoropa akuva vakuma ka kuyetlela kone ni svakuda, hikuva lomu hinga kone i mananga.”

13   Kambe aku ku vone: “Vanyikani n’wine svakuda.” Vaku: “Ahi na nchumu handle ka ntlhanu wa makati ni tinhlampfi tibizri; loko svinge tanu, svitajula hifamba ha bzezru hiyaxavela vhanu lava hinkwavu svakuda.”

14   Hikusa afa ku ni kusuhi ni ntlhanu wa makume ya madzana ya vavanuna. Kutani aku ku vadondzrisiwa vakwe: “Vatsrhamisisani hi mintlawa ya kujula kutlhasa ka ntlhanu wa makume.”

15   Kutani vayenca tanu, vatsrhamisisa vhanu hinkwavu.

16   Kutiloko ateki ntlhanu wa makati ni tinhlampfi letibizri, alangusa atilweni asvikatekisa. Agama asvikhemelela asvinyiketa vadondzrisiwa akuva vaphakela xitsrhungu.

17   Kutani hinkwavu vada vaxuzra, vateka matlhantlha lamangasala, svihamba khume wa mintsrhava na mibizri.

18   Ankama lowu afaka ali kukhongoteni na ali vusvakwe, vadondzrisiwa vamuyela. Kutani avavutisa, aku: “Xana svitsrhungu svili ndzri mani?”

19   Vamuhlamula, vaku: “Yohani Mubabatisi, kambe van’wana vali Eliya, kasi vambenyana vali kupfuki mun’we wa vaprofeta va khale.”

20   Agama aku ku vone “N’wine ke, n’wili ndzri mani?” Petrosi ahlamula aku: “Kriste wa Xikwembu Nkulukumba!”

21   Kutani avamamulela svinene, avaleleta lesvaku vangabzeli mhunu mhaka leyo,

22   kambe aku: “N’wana wa mhunu afanela kukumana ni tinxanisa tinyingi ava adzreliwa hi vakulu ni vaprista lavakulu ni vatsrali ava adlayiwa, kutani apfuxiwa hi siku dzra vuzrazru.”

23   Kutani abzela vhanu hinkwavu aku: “Loko mhunu ajula kundzrilandzra, aatitsrhike, azrwala mhandzre yakwe siku dzrin’wana ni dzrin’wana, andzrilandzrelela.

24   Hikusa lweyi ajulaka kuhuluxa vutomi bzakwe atalahlekeliwa hi bzone, kambe lweyi alahlekeliwaka hi vutomi bzakwe hi mhaka yanga atabzihuluxa.

25   Hikusa, svitapfuna yini loko mhunu akuma misava hinkwayu kambe alahlekeliwa hi vutomi bzakwe kumbe akumiwa hi khombo?

26   Hikusa lweyi adanaka ha mine ni mazritu yanga, N’wana wa Mhunu atadana ha yene loko abuya akuphatimeni kwakwe ni ka Tatana ni ka tintsrumi leta kuxwenga.

27   Kambe ndzrin’wibzela xihlayelamfuzri, ndzrili: Ku ni van’we va lavayimiki laha lava vangatikidzringa lifu ni kutsrongo na vangasizranga hi kuvona Mfumu wa Xikwembu Nkulukumba.”

28   Kutani antsrhaku ka loko ahlayi mazritu lawo, loko kuhundzri kusuhi ni ntlhanu wa masiku na mazrazru, ateka Petrosi, Yohani na Yakobe atlhantuka nhava na vone, ayakhongota.

29   Kutiloko ahakhongota, mavonekela ya vuso bzakwe macinca ni sviyambalu svakwe sviphatima svikumpaa.

30   Kutani kuhumelela vavanuna vabizri vasungula kubula naye; afa vali Moxe na Eliya.

31   Vahumelela hi kuphatima, vakanela hi lifu dzrakwe ledzri afaka afanela kudzrikuma le Yerusalema.

32   Kutani Petrosi ni lava afaka vali naye afa vabindzriwa hi vuzrongo, kambe loko vapfuki vuzrongweni, vavoni kuphatima kwakwe ni vavanuna lavabizri na vayimi naye.

33   Kutani ankama lowu vasukaka vamusiya, Petrosi aku ku Yesu: “Mudondzrisi, i svinene kuva hiva la. Xilesvo, ahidzimeni matende mazrazru, dzrin’we dzritava dzraku, dzrin’we dzra Moxe ni dzrin’we dzra Eliya.” Kambe ni lesvi afaka ahlaya svone afa angasvitivi.

34   Kambe ati na ahahlaya lesvo, kohumelela tlavi dzrivafuneketa. Vachava loko vanhingena atlavini.

35   Kutani kuhumelela zritu atlavini, dzriku: “Lweyi i N’wananga, lweyi ndzrimuhlawuliki. Muyingisetani.”

36   Loko kutwali zritu dzra kone, Yesu akumeka vusvakwe. Kambe vamiyela vangabzeli mhunu amasikwini lawo lesvi vasvivoniki.

37   Hi siku ledzrilandzrelaka, loko vaxika anhaveni, xitsrhungu lexikulu ximutlhangaveta.

38   Kutani kuhumelela mun’we wanuna amakazri ka xitsrhungu, aku: “Mudondzrisi, ndzrakukhongota, vona n’wananga, hikuva ndzrepsala yene ntsena.

39   Kutani sviyenca lesvi: Kutlhasa moya wa kukazri wumukhoma, kolahu asungula kuba nyandha; wumuyenca achukuvanya, atlhutlha duvi hi nomu, wugama wumutsrhiketa hi nkanu na wumuvavisile.

40   Ndzrikombeli vadondzrisiwa vaku kuwuhlongola, kambe vahlulekile.”

41   Kutani Yesu ahlamula, aku: “N’wine lixaka dzra kusomboloka, dzra kupfumala lipfumelo, xana ndzritan’wihanyela kuyatlhasa siku muni? Buyisa n’wanaku halenu.”

42   Kambe ankama lowu aliki awatsrhindzrekela, demona dzrimucukumetela hansi, dzrimuchukuvanyisa hi ntamu svinene. Kambe Yesu akhwavela moya lowo lowunyamiki, adaha mupfana lweyo, amutlhelisa ku tatana wakwe.

43   Kutani hinkwavu vahlamalisiwa hi ntamu lowukulu wa Xikwembu Nkulukumba. Na hinkwavu vahahlamala hi hinkwasvu lesvi afaka asviyenca, aku ku vadondzrisiwa vakwe:

44   “Yingisetani ha hombe mazritu lawa, hikusa N’wana wa Mhunu atanyiketiwa amavokweni ya vhanu.”

45   Kambe avasvitwisisanga lesvi afaka ahlaya svone. Nakunene, mhaka leyo afa vafihleliwi yone akuva vangayitwisisi, nakone afa vachava kumuvutisa lesvaku afa ajula kuhlaya yini.

46   Kutani vasungula kuholovisana hi mhaka ya lesvaku i mani ku vone lweyi afaka ali lwenkulu ku vone hinkwavu.

47   Kambe loko Yesu ativi lesvi afaka vasvipimisa atimbilwini tavu, ateka xin’wanana, axiyimisa atlhelweni kwakwe,

48   aku ku vone: “Lweyi ayamukelaka xin’wanana lexi hi vito dzranga na mine awandzriyamukela; nakone lweyi andzriyamukelaka ayamukela ni Lweyi andzrizrumiki. Hikusa lwentsrongo amakazri kwenu hinkwenu hi yene atakava lwenkulu.”

49   Kutani Yohani ayangula, aku: “Mudondzrisi, hivoni mhunu na ahlongola mademona hi vito dzraku, kutani himutsimbisile hikusa angafambifambi na hine.”

50   Kambe Yesu aku ku yene: “N’wingamutsimbiseni, hikusa lweyi angan’wikanetikiki ayima na n’wine.”

51   Kutani loko masiku ya kuntlhantuka kwakwe maya mahela, svimubzela kuya le Yerusalema.

52   Kutani azruma vazrumiwa vapfa vazranga. Kutiloko vafambile, vayanhingena axidoropaneni xa vasamariya akuva vamubekisela kone.

53   Kambe avamuyamukelanga hikusa afa ajula kuya Yerusalema.

54   Kutani loko vadondzrisiwa Yakobe na Yohani vavoni lesvo, vaku: “Hosi, wasvijula hivitana ndzrilo wuxika hi le tilweni wuvadlaya?”

55   Kambe andzruluka avakhwavela.

56   Vagama vaya ku xidoropana ximbeni.

57   Kutiloko vafamba ndleleni, kuhumelela mhunu aku ku yene: “Ndzritakulandzra kwini na kwini lomu uyaka kone.”

58   Kambe Yesu aku ku yene: “Mabuwana ma ni mimpala, ni tinyanyana ta tilo ti ni svisaka, kambe N’wana wa Mhunu anga na ka kudama kone nhloko.”

59   Agama abzela mun’wana, aku: “Ndzrilandzre.” Lweyo wanuna aku: “Hosi, ndzritsrhike ndzrizranga hi kuyalahla tatana wanga.”

60   Kambe aku ku yene: “Tsrhika vafi valahla vafi vavu, kambe wene famba uyatwalisa Mfumu wa Xikwembu Nkulukumba.”

61   Kutani kutlhela kuta mun’wana, aku: “Ndzritakulandzra, Hosi, kambe kusungula ndzritsrhike ndzriyalelela va le kaya kwanga.”

62   Yesu aku ku yene: “Aku na mhunu lwakhomiki gejo agama alavisa sva le ntsrhaku afaneliwaka hi Mfumu wa Xikwembu Nkulukumba.”