BRX

1   Katiloko aheti kudondzrisa vhanu timhaka leto, anhingena Kapernawume.

2   Kutani afa ku ni mun’we wa ndzruna ya masocha lweyi afaka avabzeliwa ngopfu hi nandzra wakwe, lakakuva afa kesala kutsrongo akuva afa.

3   Loko ayingeli ta Yesu, azruma van’we va vakulu va vayuda vayamukombela kuyadaha nandzra wakwe.

4   Kutani vayela Yesu vayamukombela hi mbilu hinkwayu, vaku: “Awafaneliwa hi kumuyencela lesvo,

5   hikusa azrandzra tiko dzrezru nakone hi yene angahiyakela sinagoga.”

6   Kutani Yesu afamba navu. Kambe loko ali kusuhi ni muti wa kone, akuma lesvaku lwewa ndzruna ya masocha azrumeli vanghanu vakwe akuva vamubzela lesvi: “Hosi, ungatikazrate, hikusa andzrifaneliwi hi kuva wene unhingena hansi ka lwangu dzranga.

7   Xisvosvo andzritivonanga na ndzrifaneliwa hi kukutlhangaveta. Kambe hlaya zritu ntsena, kutani nandzra wanga atahanya.

8   Hikusa na mine ndzribekiwi hansi ka vuhosi, mfuzri ndzri ni masocha lamanga hansi ka vuhosi bzanga, kutani ndzribzela ledzri, ndzriku: ‘Famba!’, dzriva dzrifamba, ni dzrin’wana ndzriku: ‘Hingabuya!’, kutani dzribuya; ni ye nandzra wanga, ndzriku ‘Yenca lesvi!’, kutani asviyenca.”

9   Loko Yesu asviyingela, amuhlamala, agama andzruluka abzela xitsrhungu lexi afaka ximulandzra, aku: “Ndzrin’wibzela lesvi: Nambi le Yisrayele andzrikumanga lipfumelo dzra kukulisa xilesvi.”

10   Kutani loko lava afaka vazrumiwile vatlhelela akaya, vayakuma nandzra na ali ntomi.

11   Kutani antsrhakunyana ka svosvo, ayendzrela doropa ledzrivitaniwaka Nayini, afamba na aheleketiwa hi vadondzrisiwa vakwe ni xitsrhungu lexikulu.

12   Ati atlhasa kusuhi ni nyangwa ya doropa, ohatlana na kupingiwa mufi ahumexiwa handle, lweyi afaka ali n’wana wa mun’we ku mamana wakwe nakuve lwewa mamana afa ali mufelwa. Afa ku ni xitsrhungu xa kuhlawa xa doropa ledzro lexi afaka ximuheleketa.

13   Loko Hosi yivona lweyo wansati, yimutwela vuzrombe, yiku ku yene: “Ungadzrile.”

14   Kutani yitsrhindzrekela yikhumba lihlaka, kutani lava afaka vadzripakatsrile vayima. Yigama yiku: “Wene wa jaha, ndzrili ku wene: Pfuka!”

15   Mufi apfuka atsrhama ava asungula kuvulavula, kutani Yesu amunyiketa ku mamana wakwe.

16   Kutani hinkwavu vakhomiwa hi kuchava, vasungula kudzrumisa Xikwembu Nkulukumba, vaku: “Kupfuxiwi muprofeta lwenkulu amakazri kwezru!” Vatlhela vaku: “Xikwembu Nkulukumba alangusi vhanu vakwe!”

17   Kutani ndhuma yakwe yihangalaka Yudeya hinkwaku ni le mugangeni hinkwawu wa le kusuhi.

18   Kutani vadondzrisiwa va Yohani vamudzrungulela timhaka leti hinkwatu.

19   Kutani Yohani avitana vabizri va vadondzrisiwa vakwe, avazruma ku Hosi kuyavutisa lesvi: “Xana hi wene lwataka, kumbe hifanela kuyimela mun’wana?”

20   Kutiloko vamuyelile, vavanuna lavo vatlhasa vaku: “Yohani Mubabatisi ahizrumi kutatavutisa lesvi: ‘Xana hi wene lwataka, kumbe hifanela kuyimela mun’wana?’”

21   Hi nkama wolowo ahanyisa vhanu va kutala lava afaka va ni mavabzi, ni svivavu sva kuchavisa ni mimoya ya kubiha, atlhela apfula mahlo ya lavangavonikiki.

22   Kutani Yesu avayangula, aku: “Tlhelani n’wiyadzrungulela Yohani lesvi n’wisvivoniki ni kusviyingela: Lavangavonikiki kutani vavona, lava kukhuta kutani vafamba, lava nhlokonho kutani vabasisiwa, lava kuka vangayingeli kutani vayingela, ni vafi kutani vapfuxiwa kufeni, nakone svisiwana svibzeliwa madzrungula lamanene.

23   Nakone a ni njombo lwangakhunguvanyekikiki ha mine!”

24   Kutani loko vazrumiwa va Yohani vafambile, asungula kuvulavula ni svitsrhungu ha Yohani, aku: “Xana n’wihumi n’wiyavona yini amananga? Kuyavona lihlanga na dzritsrekatsrekisiwa hi moya?

25   Kutani ke, i yini lesvi n’wihumiki n’wiyasvivona? Kuyavona mhunu wa kuyambala timpahla ta kudula? Phela, lavayambalaka timpahla ta kudula ni lavatikholisaka siku ni siku vatsrhama atindlwini ta vuhosi.

26   Kutani ke, i yini lesvi n’wihumiki n’wiyasvivona? Kuyavona muprofeta? Ndzrin’wibzela lesvaku ina; nakone n’wiyivona ni sva kutlula muprofeta.

27   Hi yelweyi kutsraliwiki ha yene lesvi: ‘Lavisa, ndzrikuzrumelela muzrumiwa wanga amahlweni kwaku, lwatakakululamisela ndlela amahlweni kwaku.

28   Ndzrin’wibzela lesvi: Amakazri ka lavabelekiwiki hi wansati, aku na mhunu lwatlulaka Yohani hi vukulu; ovaku lwentsrongo amfun’wini wa Xikwembu Nkulukumba i nkulu kutlula yene.”

29   (Kutani vhanu hinkwavu ni vahakelisi va tinemba lavayingeliki lesvo, afa vaku Xikwembu Nkulukumba alulamile, hikusa afa vababatisiwi hi babatiso dzra Yohani.

30   Kambe vafarisi ni tintivi ta nawu afa vange na mhaka ni lesvi Xikwembu Nkulukumba afaka asvijula ku vone, hikusa afa vangababatisiwanga ha yene.)

31   “Xisvosvo, xana ndzritavafanisa na yini vhanu va nguva leyi? Vafana na mani?

32   Vafana ni svivanana lesvitsrhamaka abazara svitlanga hi kuvitanana, sviku: ‘Hin’wichayeli xitiloti, kambe an’wikinanga; hidzrilile, kambe n’wine an’wibanga nkosi.’

33   Hi ndlela leyifanaka, Yohani Mubabatisi abuyile, angadi svakuda nambi kunwa vhinyo; kambe n’wili: ‘A ni demona.’

34   N’wana wa Mhunu atlhasile, ada atlhela anwa; kambe n’wine n’wili: ‘Hingavonani mhunu wa magolo ni mpopsi, munghanu wa vahakelisi va tinemba ni vadohi!’

35   Nambitanu, lexikombisaka lesvaku vutlhazri bzilulamile i mihandzru ya bzone hinkwayu.”

36   Kutani mun’we wa vafarisi amukombela kuya akaya kwakwe ayada naye. Kutani anhingena akaya ka mufarisi lweyo atsrhama tafuleni.

37   Kahangayenceka lesvaku wansati mun’we wa doropa ledzro, lweyi afaka ali mudohi, ayingela lesvaku Yesu ale kudeni akaya ka lwewa Mufarisi. Kutani abuya ni ngwama ya kutiyelanyana ya mafuzra ya kunun’hwela,

38   atlhasa ayima antsrhaku kwakwe amilengeni, adzrila, asungula kutsrakamisa milenge ya Yesu hi minyembeti yakwe, ava amisula hi misisi ya nhloko yakwe. Atlhela an’quta milenge ya Yesu hi lizrandzru, amichela mafuzra ya kunun’hwela.

39   Kutani loko lwewa mufarisi angamuzramba asvivona, aku hi le mbilwini: “Loko mhunu lweyi afa ali muprofeta, anha atasvitiva lesvaku wansati lweyi amukhumbaka i mani ni lesvaku atsrhamisi kuyini, hikusa i mudohi.”

40   Kambe Yesu amuyangula, aku: “Simoni, ndzrijula kukubzela mhaka ya kukazri.” Aku: “Hlaya, mudondzrisi!”

41   “Afa ku ni vhanu vabizri lava afaka va ni xikweneti ku mucenekisi wa mali; mun’we afa a ni xikweneti xa ntlhanu wa madzana ya madenari, kasi lwemun’wana afa a ni xikweneti xa ntlhanu wa makume.

42   Lesvi afaka vange na xa kumuhakela ha xone, avadzrivalelile hi vubizri bzavu. Xisvosvo, hi wini ku vone atakamuzrandzra ngopfu?”

43   Simoni ahlamula, aku: “Ndzripimisa lesvaku hi lweyi angamudzrivalela xikweneti xa xikulu.” Aku ku yene: “Upimisi ha hombe.”

44   Agama andzruluka alavisa lwe wansati, aku ku Simoni: “Wamuvona wansati lweyi? Loko ndzrinhingeni akaya kwaku, awundzrinyikanga mati ya kuhlamba milenge. Kambe wansati lweyi atsrakamisi milenge yanga hi minyembeti yakwe atlhela amisula hi misisi yakwe.

45   Awundzrin’qutanga, kambe lwe wansati, kusukela nkama lowu ndzrinhingeniki la ha wone, angatsrhikanga kundzrin’quta milenge hi lizrandzru.

46   Awundzritotanga nhloko hi mafuzra, kambe lwe wansati andzritoti milenge hi mafuzra.

47   Hi svosvo ndzriliki ku wene: Nambilesvi svidoho svakwe svinga svinyingi, svidzrivaleliwile, hikuva azrandzri ngopfu. Kambe lweyi adzrivaleliwiki svidoho svitsrongo, azrandzra kutsrongo.”

48   Agama aku ku lwe wansati: “Svidoho svaku svidzrivaleliwile.”

49   Kutani lava afaka vada naye vasungula kukanela hi xivone, vaku: “I mani mhunu lweyi, lweyi adzrivalelaka ni svidoho?”

50   Kutani aku ku lweyo wansati: “Lipfumelo dzraku dzrikuhuluxile. Tifambele hi kuzrula.”