-
Luka 4
1 Kutani Yesu asuka hi Yordani na atali hi moya wa kuxwenga, akongomisiwa hi moya kuya amananga,
2 aheta mune wa makume ya masiku, ava adzringiwa hi Diyavulosi. Aheti masiku lawo na angadi nchumu; xilesvo loko magamile, atwi ndlala.
3 Kutani Diyavulosi aku ku yene: “Loko uli n’wana wa Xikwembu Nkulukumba, bzela zribze ledzri dzrihamba kati.”
4 Kambe Yesu amuhlamula, aku: “Kutsraliwi lesvi: ‘Mhunu angafanelanga kuhanya hi svakuda ntsena.’”
5 Kutani Diyavulosi amuteka ayamukomba mimfumu hinkwayu ya misava hi nkamanyana.
6 Kutani Diyavulosi aku ku yene: “Ndzritakunyika vuhosi lebzi hinkwabzu ni kuphatima ka bzone, hikuva ndzrinyiketiwi bzone, kutani ndzribzinyika lweyi ndzrimuzrandzraka.
7 Xisvosvo, loko wene undzrikhinsamela, lesvi hinkwasvu svitava svaku.”
8 Kutani Yesu aku ku yene: “Kutsraliwi lesvi: ‘Khinsamela Yehovha, Xikwembu xaku, ugandzrela yene ntsena.’”
9 Agama amuyisa Yerusalema, amuyimisa axihlungwini xa tempele, aku ku yene: “Loko uli n’wana wa Xikwembu Nkulukumba, dladlama ahansi,
10 hikusa kutsraliwi lesvi: ‘Ataleleta tintsrumi tikubuyela, titatakuxizrelela’,
11 Nangweso, ‘Titakuqhamukela hi mavoko ya tone, lesvaku ungachuki utitlirinya nkondzro hi zribze.’”
12 Kutani Yesu amuhlamula, aku: “Kuhlayiwi lesvi: ‘Ungachuke udzringa Yehovha, Xikwembu Nkulukumba waku.’”
13 Kutani loko Diyavulosi aheti kumudzringa hi tindlela hinkwatu, amutsrhika kuko kutlhasa mukhandlu wun’wana.
14 Kutani Yesu atlhelela Galileya hi ntamu wa moya; kutani ndhuma yakwe yihangalaka amugangeni hinkwawu.
15 Kutani afa adondzrisa amasinagogeni yavu, atlhela adzrumisiwa hi hinkwavu.
16 Agama aya Nazareta, lomu angakulela kone. Kutani hi kulandzra ntolovelo wakwe hi siku dzra Savata, anhingena asinagogeni, agama asekeleka akuva adondzra buku.
17 Lesvi vamunyiketiki buku dzra muprofeta Ezaya; kutani loko adzripfulile, akuma lomu afaka kutsraliwi lesvi:
18 “Moya wa Yehovha wule henhla kwanga, hikuva andzritotile akuva ndzribzela svisiwana madzrungula lamanene. Andzrizrumeli kutativisa vabohiwa lesvaku vatantsrhunxiwa, ni lavangavonikiki lesvaku vatatlhela vavona, ni kuntsrhunxa lavakandzreteliwaka,
19 ni kutwalisa lembe ledzrinyonxisaka dzra Yehovha.”
20 Agama apfala buku, adzritlhelisela mupfunisi wa sinagoga, ayatsrhama. Kutani hinkwavu lava afaka vali asinagogeni vamupondzrolela mahlo.
21 Kutani asungula kuvabzela lesvi: “Namunhla, tsralwa ledzri n’wahakakudzriyingela dzrihetisekile.”
22 Kutani hinkwavu vamuyimelela, vahlamala hi mazritu ya kunandzrika lamahumaka anon’wini wakwe, vaku: “Xana lweyi ahi yene n’wana wa Yosefa?”
23 Kutani aku ku vone: “Kunene n’witandzribzela xihlayahlaya lexi: ‘Mudahi, tidahe. Hinkwasvu lesvi hisviyingeliki lesvaku sviyencekile le Kapernawume, sviyence ni kola tikweni dzraku.’”
24 Agama aku: “Ndzrihlayela mfuzri ndzrili ku n’wine: Aku na muprofeta lwanyonxeliwaka atikweni dzrakwe.
25 Ndzrin’wibzela mhaka leyi leyitiyiki: Amasikwini ya Eliya afa ku ni mafelwa manyingi atikweni dzra Yisrayele loko tilo dzripfaliwile hi malembe mazrazru ni ntlhanu wa tihweti na yin’we, kuva ni ndlala leyikulu atikweni hinkwadzru.
26 Kambe Eliya angazrumeliwanga ku mufelwa ni mun’we wa vone, loko kunge ntsena ku mufelwa wa le Zarefati, atikweni dzra Sidoni.
27 Nangweso, ankameni wa muprofeta Elixa afa ku ni vhanu vanyingi va nhlokonho le Yisrayele. Kambe akubasisiwanga ni mun’we wa vone, loko ange Nahamani, lwewa musirya.”
28 Kutani loko vayingela lesvo, hinkwavu lava afaka vali asinagogeni vatala hi mahlundzru,
29 kutani vasekeleka vamuhumexa adoropeni, vamuyisa axiweni xa nhava leyi doropa dzravu afaka dzriyakiwi ahenhla ka yone, lesvaku vatamucukumetela ahansi.
30 Kambe aphondla hi le makazri kwavu, atifambela.
31 Agama afulamela Kapernawume, dzrin’we dzra madoropa ya Galileya. Kutani avadondzrisa hi siku dzra Savata;
32 kutani vhanu afa vahlamala hi madondzrisela yakwe hikuva mazritu yakwe afa ma ni ntamu.
33 Kutani asinagogeni afa ku ni mhunu lweyi afaka a ni moya lowunyamiki, wa demona; kutani demona dzribonga hi zritu dzra kutlakuka, dzriku:
34 “Ha! Hikuhoneli yini, wene Yesu wa Nazareta? Xana uteli kutatahihelisa? Ndzrasvitiva lesvaku u mani: U Muxwengi wa Xikwembu Nkulukumba!”
35 Kambe Yesu adzrikhwavela, aku: “Miyela, uhuma ku yene!” Kutani dzrimutlatlalata amakazri ka vhanu, dzrigama dzrihuma ku yene na dzringamuvavisanga.
36 Kutani hinkwavu vatala hi kuhlamala, vasungula kubzelana lesvi: “Hi ledzra kuyini zritu ledzri? Hikusa nambi mimoya leminyamiki, oyenca hi kumileleta kufana ni hosi, mihuma!”
37 Kutani ndhuma yakwe yihangalaka amimbangwini hinkwayu ya le kusuhi.
38 Agama asuka asinagogeni, anhingena akaya ka Simoni. Kutani mamana wa nsati wa Simoni afa avabza hi kuhiseta lokukulu ka mizri, kutani vamukombela lesvaku amupfuna.
39 Kutani akazrama ahenhla kwakwe abzela kuhiseta ka mizri lesvaku kusuka; kutani kumutsrhika. Atekela kupfuka avayencela lesvi ni lesviyani.
40 Kambe loko dambu dzripela, hinkwavu lava afaka vavabzeliwa vamubuyisela vhanu lavanga ni mavabzi ya tinxakanxaka. Kutani atlhanteka mavoko ku mun’wana ni mun’wana wavu, avadaha.
41 Ni mademona afa mahuma ku vhanu vanyingi, na mabandlukana, maku: “Wene u n’wana wa Xikwembu Nkulukumba!” Kambe amakhwavela, angamatsrhiki mavulavula, hikusa afa mamutiva lesvaku hi yene Kriste.
42 Kutani, loko bzixile, ahuma aya ku mbangu wa mananga. Kambe svitsrhungu svimujuletela sviva svimuyela lomu afaka ali kone, svimukhomeletela lesvaku angasuki asvisiya.
43 Kambe aku ku svone: “Kujuleka ndzriyazrezra madzrungula lamanene ya Mfumu wa Xikwembu Nkulukumba ni le madoropeni man’wana, hikuva hi svosvo ndzringazrumeliwa svone.”
44 Kutani ayazrezra amasinagogeni ya le Yudeya.