BRX

1   Kutani afa kutsrhindzrekela Nkhuvu wa Makati ya Kuka Handzrelo, lowuvitaniwaka Paxkwa.

2   Kutani vaprista lavakulu ni vatsrali afa vajuletela tindlela ta kumudlaya, hikuva afa vachava xitsrhungu.

3   Kutani Sathana anhingena ambilwini ya Yuda, lwavitaniwaka Iskariyota, lweyi afaka ali mun’we wa lava khume na vabizri.

4   Lesvi asukiki ayakanela ni vaprista lavakulu ni vazrangeli va vazrindzri va tempele hi ndlela leyi angamunyiketaka ku vone ha yone.

5   Vanyonxa, vatwanana kumunyika mali.

6   Kutani avatiyisa lesvaku atasviyenca lesvo, ava asungula kujuletela nkama wa hombe wa kumunyiketa ku vone na kunge na xitsrhungu.

7   Kutani kutlhasa siku dzra Makati ya Kuka Handzrelo, ledzri kufanelaka kudlayiwa hamba ya Paxkwa.

8   Kutani Yesu azrumela Petrosi na Yohani, aku: “Fambani n’wiyahilulamisela Paxkwa hitada.”

9   Vaku ku yene: “Unavela akuva hiyadzrilulamisela kwini?”

10   Aku ku vone: “Lavisani, loko n’winhingena adoropeni, n’witatlhangana ni mhunu na azrwali hotsro ya mati. Mulandzrani amutini lowu atakanhingena ku wone.

11   N’witatlhasa n’wibzela n’winyi wa muti, n’wiku: ‘Mudondzrisi ali: “Yi kwini yindlu ya vayeni leyi ndzringadelaka kone Paxkwa ni vadondzrisiwa vanga?”’

12   Kutani atan’wikomba yindlu ya yikulu, ya le henhla, leyinga ni svibza hinkwasvu sva muti. Dzrilulamiselani kone.”

13   Kutani loko vasuka, vayakuma svanga hesvi avabzelisiki xisvone, valulamisela Paxkwa.

14   Kutani loko nkama wutlhasile, atsrhama alalela ni vapostola.

15   Kutani aku ku vone: “Ndzrisvinaveli ngopfu svinene kuda Paxkwa ledzri na n’wine na ndzringasixaniseka;

16   hikusa ndzrin’wibzela lesvaku ndzringatitlhela ndzridzrida kuko svihetiseka amfun’wini wa Xikwembu Nkulukumba.”

17   Kutani ateka xinwelo, akhensa, aku: “Tekani lesvi n’wisiyelana ha svone,

18   hikusa ndzran’wibzela lesvaku, kusukela svosvi, ndzringatitlhela ndzrinwa sva kuhambiwa hi mavhinya kuko kutlhasa Mfumu wa Xikwembu Nkulukumba.”

19   Kutani ateka kati, akhensa, adzrikhemelela, avanyika, aku: “Lesvi i mizri yanga, lemitakanyikeliwa kupfuna n’wine. Yencani lesvi akuva n’windzridzrimuka ha svone.”

20   Atlhela ayenca lesvifanaka hi xinwelo loko vagami kulalela, aku: “Lesvi i xipfumelelanu leximpsha hi kola ka ngati yanga, leyitakahalatiwa kupfuna n’wine.

21   “Kambe lavisani, voko dzra lweyi andzridlayisaka dzri kola na mine tafuleni.

22   Hikusa, N’wana wa Mhunu mpela awafamba hi la svikongomiki ha kone. Kambe a ni khombo dzrikulu sva kunhasi lweyi adlayisiwaka ha yene!”

23   Kutani vasungula kudokadokisana hi lesvaku i mani ku vone lweyi afaka ajula kuyenca svolesvo.

24   Kambe kutlhela kutumbuluka mholova amakazri kwavu hi mhaka ya lesvaku i mani ku vone lweyi afaka avoneka na ali lwenkulu ku vone hinkwavu.

25   Kambe aku ku vone: “Tihosi ta matiko tamabindzrisela, ni lavafumaka vavitaniwa vayenci va lesvinene.

26   Kambe n’wine an’wi tanu. Kambe lwenkulu amakazri kwenu aave svanga lwentsrongo, ni lwazrangelaka svanga lwatizrelaka.

27   Hikusa i mani lwenkulu? Hi lwatsrhamaka ada kumbe hi lwatizrelaka? Xana ahi yene lwatsrhamaka ada? Kambe amakazri kwenu, mine ndzri svanga hi lwatizrelaka.

28   “Kambe n’wine hi n’wine n’witiyiseliki na mine amindzringweni yanga.

29   Kutani ndzrihamba xipfumelelanu na n’wine akuva n’winyikiwa mfumu, svanga hesvi Tatana wanga na yene ahambiki xipfumelelanu na mine,

30   akuva n’wida n’wiva n’winwa atafuleni dzranga amfun’wini wanga, ni kutsrhama asvitsrhan’wini sva vuhosi n’wiyavanyisa tinxaka leta khume na tibizri ta Yisrayele.

31   “Simoni, Simoni, lavisa, Sathana afa ajula lesvaku n’wine hinkwenu n’wihehezriwa svanga tizriku.

32   Kambe ndzrikukombelelile lesvaku lipfumelo dzraku dzringachuki dzrihela; kutani wene, loko utlhelile, tiyisa vamakwenu.”

33   Kutani Petrosi aku ku yene: “Hosi, mine ndzritibekiseli kufamba na wene abohelweni ni le kufeni.”

34   Kambe aku: “Petrosi, ndzrikubzela lesvaku nkuku wungatiyimba namunhla, na ungasindzrilandzrula kuzrazru uku awundzritivi.”

35   Atlhela aku ku vone: “Ankama lowu ndzringan’wizruma na n’winge na xipachi xa mali ni nkwama wa svakuda ni masandhazi, xi kone lexi n’wixipfumaliki kee?” Vaku: “A xi kone!”

36   Agama aku ku vone: “Kambe svosvi lweyi anga ni xipachi xa mali aaxiteke, ni wo nkwama wa svakuda. Nakone lweyi angeke na lipanga aaxavise nkhancu wakwe atadzrixava.

37   Hikusa ndzrin’wibzela lesvaku lesvitsraliwiki svifanela kuhetiseka ku mine: ‘Ankontiwe ni vabihi.’ Hikusa kuhetiseka lesvikanelaka ha mine.”

38   Kutani vaku: “Hosi, lavisa, hi leti timpanga tibizri.” Aku ku vone: “I tinyingi.”

39   Kutiloko asukile, svanga hesvi afaka atolovelisi xisvone, aya Nhaveni ya Minhlwazri, kutani vadondzrisiwa na vone vamulandzra.

40   Loko atlhasi kone, aku ku vone: “Khongotani akuva n’wingachuki n’winhingena ndzringweni.”

41   Agama atsrhindzreka kulenyana navu, ka ku ungacukumetela zribze kone, akhinsama hi matsrolo akhongota,

42   aku: “Tatana, loko usvijula, susa xinwelo lexi ku mine. Kambe kungayenceke kuzrandzra kwanga kambe akuyenceke kuzrandzra kwaku.”

43   Kutani kuhumelela ntsrumi ku yene na yipfa hi le tilweni, yimutiyisa.

44   Kambe lesvi afaka akazrateka svinene, akhongota hi ntamu svinene; kutani nyuku wakwe wufana ni mantsrhonsi ya ngati lamalwakelaka amisaveni.

45   Loko aheta kukhongota, asekeleka ayela vadondzrisiwa, ayavakuma na vakhutsriyelile hi kutwa mbilu kuvavisa.

46   Aku ku vone: “N’wikhutsriyelela yini? Pfukani n’wikhongota, akuva n’winganhingeni andzringweni.”

47   Ati na ahavulavula, kotlhasa xitsrhungu na xizrangeliwa hi lwavitaniwaka Yuda, mun’we wa lava khume na vabizri; atsrhindzrekela ku Yesu akuva amun’quta.

48   Kambe Yesu aku ku yene: “Yuda, hi wene lweyo unyikelaka N’wana wa Mhunu hi kumun’quta?”

49   Kutani loko lavanga matlhelweni ka Yesu vavona lesvi afaka svijula kuyenceka, vaku: “Hosi, hivaba hi timpanga kee?”

50   Kutani mun’we wa vone aba mun’we wa nandzra wa muprista lwenkulu, amususa ndleve ya xinene.

51   Kambe Yesu ayangula, aku: “Gama kolahu.” Agama akhumba ndleve ya nandzra lweyo, amudaha.

52   Yesu agama aku ku vaprista lavakulu ni vazrangeli va vazrindzri va tempele lava afaka vateli kutamukhoma: “Mibuyi ni timpanga ni tindhuku ingi ndzrova muyivi?

53   Siku ni siku afa ndzrili na n’wine atempeleni, kambe an’windzriyencanga nchumu. Kambe lowu i nkama wenu ni ntamu wa munyama.”

54   Kutani vamukhoma vafamba naye, vamuyisa akaya ka muprista lwenkulu; kambe Petrosi afa amulandzra he kule.

55   Kutani vatsrhivela ndzrilo amakazri ka nkitazri vatsrhamisa; Petrosi ayatsrhamisa na vone.

56   Kambe mun’we wa nhwanyana lweyi afaka ali xitizri amuvona na atsrhami awozra ndzrilo; amupondzrolela mahlo, aku: “Lweyi na yene a na yene.”

57   Kambe aphikisa, aku: “Wansati, Andzrimutivi.”

58   Antsrhaku ka nkamanyana mun’wana amuvona, aku: “Na wene u mun’we wavu.” Kambe Petrosi aku: “Nandzruwe, andzri yene.”

59   Kutani loko kuhundzri kolomu ka wora, mun’wana ahlaya hi kuphikelela, aku: “Kunenenene lweyi na yene afa ali na yene, hikusa na yene i mugalileya!”

60   Kambe Petrosi aku: “Nandzruwe, ni lesvi ukanelaka ha svone andzrisvitivi.” Hi nkama wolowo, na ahakanela, nkuku wuku: “Kikiligoo!”

61   Kutani Hosi yindzruluka yilangusa Petrosi, kutani adzrimuka lesvi Hosi yingasvihlaya loko yiku ku yene: “Na nkuku wungasiyimba namunhla, wene utandzrilandzrula kuzrazru.”

62   Kutani ahuma handle ayadzrila hi xiviti.

63   Kutani vavanuna lava afaka vakhomi Yesu vasungula kumumpfhava, na vamuba;

64   kutani vamufuneketa vuso, vamutisa, vaku: “Pfhumbata! Hi mani lweyi akubiki?”

65   Nakone afa ku ni svin’wana sva kutala lesvi afaka vamuzruketela ha svone.

66   Kutani loko bzixile, kuhlengeletana vakulu va tiko, vaprista lavakulu ni vatsrali, vamuyisa Hubzeni yavu, vaku:

67   “Hingahibzela, xana u Kriste?” Kambe aku ku vone: “Nambiloko ndzron’wibzela, n’wingepfumeli ni kutsrongo.

68   Ni loko ndzron’wivutisa, n’wingehlamuli ni kutsrongo.

69   Kambe kusukela svosvi N’wana wa Mhunu atatsrhamisa avokweni ledzra ntamu dzra xinene dzra Xikwembu Nkulukumba.”

70   Kutani hinkwavu vaku: “Sviliki, u N’wana wa Xikwembu ka!” Aku ku vone: “Hi n’wine n’wihlayaka ha bzenu lesvaku ndzri yene.”

71   Kutani vaku: “Hahajulela yini vumboni? Hikusa hisviyingelile ha bzezru na svihuma non’wini wakwe.”