BRX

1   Agama anhingena Yeriko ahundzra hi kone.

2   Kutani kuhumelela wanuna mun’we lweyi vito dzrakwe afaka ali Zakewu, lweyi afaka ali muzrangeli wa vahakelisi va tinemba ni lweyi afaka ali xipfundzri.

3   Kutani, afa ajula kuvona Yesu lesvaku i mani, kambe afa ahluleka kumuvona hi mhaka ya xitsrhungu, hikusa afa agomile.

4   Kutani atsrutsruma, apfa azranga ayakhandzriya ankuweni wa kukazri akuva atakota kumuvona, hikusa afa atahundzra hi kone.

5   Kutani loko Yesu atlhasi ku mbangu lowo, alangusa henhla aku ku yene: “Zakewu, hangwesa uxika, hikusa namunhla kujuleka ndzritsrhama akaya kwaku.”

6   Kutani ahangwesa axika, ayamuhoyozela hi kutsrhava.

7   Loko vasvivona, vhanu hinkwavu van’unun’uta, vaku: “Anhingeni atsrhama akaya ka mhunu wa svidoho.”

8   Kambe Zakewu asekeleka, aku ku Hosi: “Lavisa, Hosi, ndzrinyika svisiwana hamfu ya minchumu yanga, nakone xin’wana ni xin’wana lexi ndzringaxikuma hi kukanganyisa, ndzritaxitlhelisa kamune.”

9   Kutani Yesu aku ku yene: “Namunhla kuhuluka kunhingeni amutini lowu, hikuva na yene i n’wana wa Abrahamu.

10   Hikusa N’wana wa Mhunu abuyeli kutatajuletela ni kuhuluxa lesvilahlekiki.”

11   Na vahayingiseta mazritu lawo, avahambela xifananiso xin’wana, hikuva lesvi afaka ali kusuhi na Yerusalema, vhanu afa vapimisa lesvaku Mfumu wa Xikwembu Nkulukumba afa wutahumelela sva kola ni kola.

12   Kutani aku: “Mhunu wa xiyimu xa kuchaviseka asuki aya ku tiko dzra le kule kuyayamukela vuhosi atagama abuya.

13   Lesvi avitaniki malandzra yakwe ya khume, amanyika khume dzra timpondho, aku ku wone: ‘Salani n’wihamba bindzru hi mali leyi ndzriko ndzribuya.’

14   Kambe vhanu va tiko dzrakwe afa vamuvenga; loko afambile, vasala vazruma ntlawa wa madoda antsrhaku kwakwe, maku: ‘Lweyi ahimujuli ahifuma.’

15   “Kutani loko abuyile antsrhaku ka kunyikiwa vuhosi, avitana malandzra lawa afaka amasiyeli mali, akuva atativa lesvi masvibindzruliki loko matizrile hi yone.

16   Kutani kutsrhindzrekela lwewa kusungula, aku: ‘Hosi, mpondho yaku yihumexi khume dzra timpondho tin’wana.’

17   Aku ku yene: ‘I sva hombe, nandzra lwenene! Lesvi udumbekiki ku lesvitsrongo, ndzritakubeka uzrangela khume dzra madoropa.’

18   Kutani kunhingena lwewa vubizri, aku, ‘Hosi, mpondho yaku yihambi ntlhanu wa timpondho.’

19   Ni ku yelweyo aku: ‘Na wene utazrangela ntlhanu wa madoropa.’

20   Kambe kunhingena mun’wana, aku: ‘Hosi, hi leyi mpondho yaku leyi ndzringayitsrondzriyela hi panu ndzriyitsrhika.

21   Hikusa afa ndzrichava wene, hikuva u mhunu wa kukazrata; uteka lesvi ukaka ungasvibekanga, utsrhovela lesvi ukaka ungasvibzalanga.’

22   Aku ku yene: ‘Ndzritakuyavanyisa hi mazritu lamahumaka anon’wini waku, nandzra wa kubiha. Musi, afa usvitiva lesvaku ndzri mhunu wa kukazrata, ni lesvaku ndzriteka lesvi ndzrikaka ndzringasvibekanga nakone ndzritsrhovela lesvi ndzrikaka ndzringasvibzalanga, ahi svone?

23   Kutani hayini ungabekanga mali yanga abanku? Anha ndzritabuya ndzriyikuma na yili yinyingi.’

24   Kutani abzela lava afaka vayimi kusuhi, aku: ‘Mutekelani mpondho leyi n’wiyinyika lwanga ni khume dzra timpondho!’

25   Kambe vaku ku yene: ‘Hosi, lweyi a ni khume dzra timpondho!’—

26   ‘Ndzrin’wibzela lesvaku mani na mani lwanga nasvu, atanyikiwa svin’wana, kambe lweyi angeke na nchumu; nambi lesvi anga nasvu atatekeliwa svone.

27   Nangweso, valala vanga lava, lava afaka vangasvijuli kufumiwa hi mine, vabuyisani la n’wivadlaya amahlweni kwanga.’”

28   Loko aheti kuhlaya lesvo, asuka aya mahlweni ni liyendzro dzrakwe, atlhantukela Yerusalema.

29   Kutani loko atlhasi kusuhi na Betifaxje na Betanya anhaveni leyivitaniwaka Nhava ya Minhlwazri, azruma vadondzrisiwa vabizri,

30   aku: “Nhingenani axidoropaneni lexi n’wilavisaniki naxu. Loko n’winhingenile, n’witakuma ximbongolwana na xitsrimbiwile, lexi kungeke na mhunu lweyi asamiki afamba ha xone. Xitlhantlhani n’wixibuyisa halenu.

31   Kutani loko mhunu wa kukazri an’wivutisa, aku: ‘N’wixitlhantlhela yini?’, muhlamulani, n’wiku: ‘Hosi yaxijula.’”

32   Kutani lavazrumiwiki vafamba, vayaxikumisa xisvosvi ahlayisiki xisvone.

33   Kambe, ankama lowu vatlhantlhaka ximbongolwana, vinyi va xone vaku ku vone: “N’wixitlhantlhela yini ximbongolwana lexo?”

34   Vadondzrisiwa vaku: “Hosi yaxijula.”

35   Kutani vaxiyisa ku Yesu, vayandlalela sviyambalu svavu ahenhla ka ximbongolwana, vatsrhamisisa Yesu ahenhla ka xone.

36   Ati awafamba, vabeketela sviyambalu svavu axitaratwini.

37   Kutiloko atsrhindzrekeli xitaratwini lexifulamelaka Nhava ya Minhlwazri, xitsrhungu hinkwaxu xa vadondzrisiwa xisungula kutsrhava, xidzrumisa Xikwembu Nkulukumba hi zritu ledzritlakukiki hi mhaka ya mahlolana hinkwawu lawa ximavoniki,

38   xiku: “Akukhensiwe Hosi leyitaka hi vito dzra Yehovha! Kuzrula atilweni, ni kuphatima ahenhlahenhla!”

39   Kambe van’we va vafarisi lava afaka vali makazri ka svitsrhungu vaku: “Mudondzrisi, khwavela vadondzrisiwa vaku.”

40   Kambe avayangula, aku: “Ndzrin’wibzela lesvaku loko lava vomiyela, mazribze matahuwelela.”

41   Kutiloko atsrhindzrekelile, avona doropa dzra Yerusalema, adzridzrilela,

42   aku: “Mawaku loko namunhla afa usvitivile lesvitisaka kuzrula! Kambe ufihleliwile svone akuva ungasvivoni.

43   Hikuva matakutlhasela masiku lawa valala vaku vatakadzimetela timhandzre matlhelweni yaku hinkwawu vakupfalela, vakumanya matlhelo hinkwawu.

44   Vatakuhohlota, wene ni vanaku lavatsrhamaka andzreni kwaku; vangatisiya zribze ahenhla ka zribze kwaku, hikuva awuwuvonanga nkama wa kukambeliwa kwaku.”

45   Agama anhingena atempeleni ahlongola lava afaka vaxavisa kone,

46   aku ku vone: “Kutsraliwi lesvi: ‘Yindlu yanga yitava yindlu ya xikhongoto’, kambe n’wine n’wiyiyenci mhakwa ya vayivi.”

47   Kutani afa adondzrisa siku ni siku atempeleni, kambe vaprista lavakulu ni vatsrali ni vakulu va tiko afa vajuletela ndlela ya kumudlaya;

48   kambe afa vangayikumi ndlela ni ya yin’we ya kumudlaya, hikusa vhanu hinkwavu afa vangasukelani naye, vatsrhama vamuyingiseta.