BRX

1   Agama akanela ni vadondzrisiwa, aku: “Afa ku ni mun’we wa xipfundzri lweyi afaka a ni mulaviseli wa yindlu. Siku dzrin’we vamuzrambelile vaku afa atlanga hi minchumu ya n’winyi wakwe.

2   Kutani amuvitana, aku: ‘I mpsini lesvi ndzrisviyingelaka ha wene? Buyisa mabuku ya tinkonta, hikusa awehe na kutama ulavisela yindlu yanga.’

3   Kutani mulaviseli wa yindlu apimisa lesvi he ndzreni ka mbilu: ‘Xana ndzritayenca yini, lesvi n’winyi wanga andzritekelaka vulaviseli? Andzri na ntamu wa kuba focholo, nakone svandzridanisa kuhanya hi kukombela.

4   Aham! Ndzrasvitiva lesvi ndzringasviyencaka, akuva loko ndzrihlongoliwa antizrweni wa vulaviseli, vhanu vatandzriyamukela amakaya kwavu.’

5   Kutani avitana ha mun’wemun’we wa lava afaka va ni xikweneti ku n’winyi wakwe, aku ku lwewa kusungula: ‘Hi xini xikweneti lexi ufanelaka kuhakela n’winyi wanga?’

6   Aku: ‘I dzana dzra svingumbungumbu sva mafuzra.’ Aku ku yene: ‘Teka papela dzraku, uhangwesa utsrhama, utsrala ntlhanu wa makume.’

7   Agama aku ku lwemun’wana: ‘Wene ke, hi xini xikweneti lexi ufanelaka kuxihakela?’ Aku: ‘I dzana dzra matambori ya tizriku.’ Aku ku yene: ‘Teketa papela dzraku, utsrala ntlhanu wa makume na makume mazrazru.’

8   Kutani n’winyi wakwe adzrumisa mulaviseli lwiya nambesvi afaka angalulamanga, hikuva ayenci hi vutlhazri; hikusa vana va misava leyi vatlhazrihile kutlula vana va livaningo ka kuhanyisana ni vhanu va nguva yavu.

9   “Na mine, ndzrili ku n’wine: Tihambelani vanghanu hi vukosi lebzingalulamangakiki, kuyencela lesvaku loko bzihela, vatan’wiyamukela avuyakweni lebzitsrhamaka hi masiku.

10   Lweyi adumbekaka ku lesvitsrongo awadumbeka ni ku lesvinyingi, ni lweyi angadumbekikiki ku lesvitsrongo ni ku lesvinyingi angadumbekanga.

11   Xisvosvo, loko n’wingadumbekanga ku vukosi lebzingalulamangakiki, i mani atakan’witamelisa lesvinga sva xihlayelamfuzri?

12   Nakone loko n’wingadumbekanga ku minchumu leyilumbaka mhunu mun’wana, i mani atakan’winyika lesvinga svenu?

13   Anga kone nandzra lweyi angakotaka kutizrela tihosi tibizri, hikusa atasindzriseka kunyenya yin’we azrandzra leyin’wana, kumbe atanamazrela yin’we adzrela leyin’wana. N’wingesvikoti kuva svikazrawa sva Xikwembu Nkulukumba ni sva mali.”

14   Kutani vafarisi, lava afaka vazrandzra mali, afa vayingiseta mazritu lawa hinkwawu; kutani vasungula kumuhleka.

15   Kutani aku ku vone: “N’wine hi n’wine n’witiyencaka valulami amahlweni ka vhanu, kambe Xikwembu Nkulukumba awatitiva timbilu tenu. Hikusa lesvi vhanu valiki i sva lisima svanyenyentsa amahlweni ka Xikwembu Nkulukumba.

16   “Nawu ni vaprofeta svivi kone kuyagamela ku Yohani. Kusukela ankameni wolowo, Mfumu wa Xikwembu Nkulukumba wazrezriwa, kutani hinkwavu vakunyuluta akuva vanhingena ku wone.

17   Kunene, svanabzala kuva tilo ni misava svinyamalala kutlula kuva ntsrhati wa kukazri wa mazritu ya Nawu wuba hansi.

18   “Mani na mani lwadlayaka vukati ni nsati wakwe, agama ateka mun’wana, ayenca vumbuye; na mani na mani lwachataka ni wansati lweyi atsrhikiwiki hi nuna ayenca vumbuye.

19   “Kayenceki lesvi: Afa ku ni mhunu mun’we lweyi afaka ali xipfundzri, lweyi afaka ayambala mpahla ya tihosi ni linyu dzra kuxonga, atsrhama hi kutikholisa siku ni siku avuton’wini bzakwe bza mhunu lwanga nasvu.

20   Kutani xisiwana xin’wana lexi afaka xivitaniwa Lazaru afa xihamba xibekiwa anyangweni yakwe, na xitali hi svilondzra,

21   na xinavela kuxuzra hi matlhantlha lawa afaka mawa hi le tafuleni dzra xipfundzri, kambe nambi timbzana afa tibuya timunampsetela svilondzra.

22   Kutani xisiwana xifa, xitlakuliwa hi tintsrumi xiyisiwa axifuveni xa Abrahamu. Na yene lwewa xipfundzri afa ava alahliwa.

23   “Kutani loko ali Xizreni, na axaniseka, atlakuxa nhloko avona Abrahamu hi le kule na Lazaru atlhelweni kwakwe.

24   Kutani abandlukana aku: ‘Tatana Abrahamu, ndzritwele vuzrombe uzruma Lazaru apeta vugamu bza litiho dzrakwe amatini atatandzriholisa lidzrimi, hikusa ndzraxaniseka hi ndzrilo lowu.’

25   Kambe Abrahamu aku: ‘N’wananga, dzrimuka lesvaku uyamukelile lesvinene hinkwasvu avuton’wini bzaku hinkwabzu, kambe Lazaru ayamukeli lesva kubiha. Kambe svosvi awachaveleliwa halenu, kambe wene waxaniseka.

26   Nangweso, handle ka lesvo hinkwasvu, kubekiwi xikhele lexikulu amakazri kwezru na n’wine, akuva lavajulaka kutsremakanya vasuka halenu vaya halanu vangasvikoti, ni lavajulaka kutsremakanya vasuka halanu vata halenu vangasvikoti.’

27   Agama aku: ‘Xilesvo ke, tatana, ndzrakukombela lesvaku umuzruma aya kaya ka tatana wanga,

28   hikusa ndzri ni ntlhanu wa vamakwezru, akuva ayavabekela vumboni lesvaku na vone vangabuyi ku mbangu lowu wa kuxaniseka.’

29   Kambe Abrahamu aku: ‘Va na Moxe ni vaprofeta. Avayingisete vone!’

30   Kutani aku, ‘Ihina, svingave tanu, tatana Abrahamu, kambe loko mun’we wa lavafiki avayela, vatatisola.’

31   Kambe aku ku yene: ‘Loko vangayingiseti Moxe ni vaprofeta, nambi kopfuka mhunu wa kukazri ku vafi, vangaka vangakholwi.’”