BRX

1   Ankameni lowo, van’we va lava afaka vali kone vamudzrungulela ta vagalileya lava Pilatu angapatsrinyeta ngati yavu ni svitlhavelo svavu.

2   Kutani Yesu avayangula, aku ku vone: “N’wipimisa lesvaku vagalileya lavaya afa vali vadohi vakulu kutlula hinkwavu vagalileya hilesvi vakumiwiki hi khombo ledzri kee?

3   Ndzrin’wibzela lesvaku ahi svone lesvo; kambe loko n’wingatisoli, na n’wine n’witahelisiwa kufana na vone.

4   Kumbe n’wimipisa lesvaku lavaya va khume ni ntlhanu na vazrazru lavangaweliwa hi xihondzro xa Silowame, xivadlaya afa vova ni nandzru wa kutlula vhanu hinkwavu lavahanyaka le Yerusalema?

5   Ndzrili ahi svone lesvo; kambe loko n’wingatisoli, hinkwenu n’witahelisiwa kufana na vone.”

6   Agama avabzela xifananiso lexi: “Kavi ni mhunu lweyi afaka a ni nkuwa lowubzaliwiki ansin’wini yakwe ya mavhinya. Kutani abuyi akamba mihandzru ku wone kambe angakumanga nchumu.

7   Kutani abzela mudzrimi wa mavhinya, aku: ‘Lavisa, ledzri kutani i lembe dzra vuzrazru na ndzribuya ndzrikamba mihandzru ku nkuwa lowu, kambe andzringikuma nchumu. Wutsreme! Woheta mbangu wanga mahala!

8   Kutani amuhlamula, aku: ‘Hosi, wutsrhike lembe dzrin’we kukondzra ndzridzrima matlhelweni ka wone ndzribeka ni svinonisi.

9   Loko wupsala mihandzru, svilungile; kambe loko svinge tanu, wutsreme.’”

10   Kutani afa adondzrisa ku dzrin’we dzra masinagoga hi Savata.

11   Kutani, kuhumelela mun’we wansati lweyi afaka a ni moya wa kumuvabzisa kudzringana khume dzra malembe na ntlhanu na mazrazru; kutani afa awovekile nakone afa angasvikoti kuwololoka ni kutsrongo.

12   Loko amuvona, Yesu amuvitana atsrhindzrekela, aku: “Wansati, untsrhunxiwile ku mavabzi yaku.”

13   Kutani amutlhanteka mavoko, atekela kuwololoka, asungula kudzrumisa Xikwembu Nkulukumba.

14   Kambe muzrangeli wa sinagoga ayangula, na ahlundzrukile hilesvi Yesu ahanyisiki mhunu hi Savata, aku ku xitsrhungu: “Ku ni ntlhanu wa masiku na dzrin’we lawa svifanelaka kutizra ha wone. Kutani buyani n’widahiwa hi masiku lawo, kunge hi siku dzra Savata.”

15   Kambe Hosi yimuhlamula, yiku: “Vakanganyisi, xana mun’wana ni mun’wana wenu hi Savata angatlhantlhi homu yakwe kumbe mbongolo yakwe axib’ayeni ayiheleketa yiyanwa mati?

16   Xana lwe wansati, lwanga n’wana wa Abrahamu ni lweyi Sathana ahetiki khume dzra malembe na ntlhanu na mazrazru na amupfalelile, angafaneliwanga hi kuntsrhunxiwa avub’ochweni hi siku dzra Savata?”

17   Kutiloko ahlayi lesvo, valala vakwe hinkwavu vadana, kambe xitsrhungu hinkwaxu afa xinyonxa hi minchumu hinkwayu ya kuxonga leyi afaka amiyenca.

18   Kutani ayengeta, aku: “Xana Mfumu wa Xikwembu Nkulukumba wufana na yini? Ndzringawufanisa na yini?

19   Wufana ni nhleke ya sinapi leyi mhunu ayitekiki ayayibzala ansin’wini yakwe, yikula yihamba muzri, kutani tinyanyana ta tilo titatayaka svisaka amazravini ya wone.”

20   Atlhela aku: “Xana ndzringawufanisa na yini Mfumu wa Xikwembu Nkulukumba?

21   Wufana ni handzrelo leyi wansati ayitekiki ayipfuva ni tizriku dzra kutata muqgomo, mbila hinkwayu yikukumuka.”

22   Kutani afa afambafamba hi madoropa ni svidoropana adondzrisa, na ali ndleleni ya kuya Yerusalema.

23   Kutani mun’we aku ku yene: “Hosi, hi svone lesvaku lavatakahuluka i vatsrongo?” Aku ku vone:

24   “Lwanani hi ntamu akuva n’winhingena hi nyangwa leya kukhuma, hikuva ndzrin’wibzela lesvaku vanyingi vatajula kunhingena kambe vatahluleka.

25   Loko n’winyi wa muti apfuka agoga xipfalu, n’witasala handle n’wigongondzra xipfalu, n’wiku, ‘Hosi, hipfulele.’ Kambe atan’wihlamula, aku: ‘Andzrin’witivi n’wine, mfuzri ni lomu n’witaka ha kone andzrikutivi.’

26   Kutani n’witaku: ‘Hidi na wene hiva hinwa na wene, nakone ubuyi udondzrisa asvitaratwini svezru.’

27   Kambe ataku ku n’wine: ‘Ndzrili andzrikutivi lomu n’witaka ha kone. Sukani la kwanga, hinkwenu n’wine vayenci va lesva kubiha!’

28   Hi kone kutakava ni svidzrilo ni kuketsrela ka menyo yenu, loko n’wivona Abrahamu, Izaki, Yakobe ni vaprofeta hinkwavu amfun’wini wa Xikwembu Nkulukumba, na n’wine n’wicukumeteliwa handle.

29   Mfuzri vatabuya hi le vuxeni ni le mpeladambu, ni le n’walungu ni le nyingitimu vakugee, vada, amfun’wini wa Xikwembu Nkulukumba.

30   Kambe phelasi ku ni lava vugamu vatakava va kusungula, ni lava kusungula vatakava va vugamu.”

31   Kutani hi nkama lowo van’we va vafarisi vamubuyela, vaku: “Huma la ufamba, hikuva Heroda ajula kukudlaya.”

32   Kutani aku ku vone: “Fambani n’wiyabzela buwana ledzriyani, n’wiku: ‘Lavisa, ndzrahahlongola mademona ndzridaha vhanu namunhla ni mundzruku, kutani ndzritava ndzrihetile mundlwana.’

33   Kambe kujuleka ndzrifamba namunhla, mundzruku ni mundlwana, hikuva asvikoteki kuva muprofeta adlayiwa ahandle ka Yerusalema.

34   Yerusalema, Yerusalema, wene lweyi udlayaka vaprofeta, utlhela ukhandla lavazrumeliwaka kwaku hi mazribze: I kangani ndzringajula kuhlengeleta vanaku mbangu wun’we kufana ni huku leyihlengeletaka svicuwana sva yone ahansi ka timpapa ta yone! Kambe wene awusvijulanga.

35   Svosvi ke, yindlu yenu yitasala na yinge na mhunu. Ndzrin’wibzela lesvaku n’wingahatitlhela n’windzrivona kukondzra n’wiku: ‘Akukhensiwe lweyi ataka hi vito dzra Yehovha!’”