BRX

1   Ankameni lowo, loko kuhlengeletana vhanu va ntsrandzravahlayi, lava afaka vapatsra ni kukandzretelana hi kutala kwavu, asungula kukanela ni vadondzrisiwa vakwe kusungula, aku: “Tivonelani ku handzrelo ya vafarisi, bzinga vukanganyisi bzavu.

2   Kambe aku na nchumu lowufihliwiki lowungatikipaluxiwa alivaleni, nakone aku na nchumu wa xihundla lowungatikitibziwa.

3   Xisvosvo, xin’wana ni xin’wana lexi n’wixihlayaka amunyameni xitayingeliwa alivaleni, ni lesvi n’wihlevetelanaka svone atindleveni atindlwini letipfalekiki svitahuweleliwa ahenhla ka tiyindlu.

4   Kutani ndzribzela n’wine n’winga vanghanu vanga, lesvaku n’wingachaveni lavadlayaka mizri vagama vangahakoti kuyenca svin’wana sva kutlula svosvo.

5   Kambe ndzritan’wikomba lweyi n’wifanelaka kuchava yene: Chavani lwewa kuva, antsrhaku ka kudlaya mhunu, a ni ntamu wa kumucukumetela Xikheleni xa Kusuvisiwa. Ina, ndzrin’wibzela lesvi: Chavani Yelweyo.

6   Xana ntlhanu wa svinjingilitana asvixavisiwi hi minkinyenta mibizri? Kambe Xikwembu Nkulukumba angadzrivali ni xin’we xa svone.

7   Kambe nambi misisi ya tinhloko tenu mikontiwile hinkwayu. N’wingachaveni; n’wi ni lisima dzra kutlula svinjingiritana sva kutala.

8   “Nakone ndzrili ku n’wine: Mani na mani lwapfumelaka lesvaku awandzritiva amahlweni ka vhanu, N’wana wa Mhunu na yene atapfumela lesvaku awamutiva amahlweni ka tintsrumi ta Xikwembu Nkulukumba.

9   Kambe mani na mani lwandzriyalaka amahlweni ka vhanu atayaliwa amahlweni ka tintsrumi ta Xikwembu Nkulukumba.

10   Nakone mani na mani lwahumexaka zritu dzra kusola N’wana wa Mhunu, atadzrivaleliwa, kambe lweyi azrukaka moya lowa kuxwenga angatidzrivaleliwa.

11   Kutani loko van’wiyisa amahlweni ka masinagoga, ni vafumi, ni vuhosi, n’wingahlatiyeleni hi lesvi n’witakavulavulisa xisvone kumbe lesvi n’witakasvihlaya loko n’witilwela,

12   hikusa moya lowa kuxwenga wutan’widondzrisa hi nkama wolowo lesvi n’wifanelaka kusvihlaya.”

13   Kutani mun’we aku amakazri ka xitsrhungu: “Mudondzrisi, bzela makwezru ayavelana na mine pfindla.”

14   Aku ku yene: “Nandzruwe, i mani angandzribeka muyavanyisi kumbe wa kutsrema timhaka tenu?”

15   Agama aku ku vone: “Basopani n’witlhela n’witivonela makwanga hinkwawu, hikuva nambiloko mhunu a ni minchumu ya kutala, vutomi bzakwe abzipfeli minchun’wini leyi anga nayu.”

16   Agama avahambela xifananiso, aku: “Masimu ya wanuna wa kukazri lweyi afaka ali xipfundzri mapfuni ngopfu.

17   Kutani asungula kupimisa lesvi andzreni kwakwe: ‘Xana ndzritayenca yini lesvi ndzringeke na mbangu wa kubeketela lesvi ndzrisvitsrhoveliki amasin’wini?’

18   Agama aku: ‘Ndzritayenca lesvi: ndzritahohlota svintlhanta svanga ndzriyaka lesva svikulu, ndzribeketela kone tizriku dzranga hinkwadzru ni minchumu yanga hinkwayu,

19   ndzrigama ndzriku ku hika dzranga: “We hika, u ni minchumu minyingi leminene lemibekiseliwiki malembe ya kutala. Wisa, uda, unwa, utikholisa.”’

20   Kambe Xikwembu Nkulukumba aku ku yene: ‘Ximphunta ndzriwene, vusiku bzolebzi vatajula hika dzraku. Kutani lesvi usvibeketeliki svitasala na mani?’

21   Svi tanu ku mhunu lweyi atihlengeletelaka vukosi kambe angeke na vunghanu bzikulu na Xikwembu Nkulukumba.”

22   Agama aku ku vadondzrisiwa vakwe: “Hi svosvo ndzrin’wibzelaka ha svone, ndzriku: n’wingahlatiyeleni hi vutomi bzenu lesvaku n’witada yini, kumbe hi mizri yenu lesvaku n’witayambala yini.

23   Hikusa vutomi bzi ni lisima kutlula svakuda ni mizri mi ni lisima kutlula sviyambalu.

24   Lavisisani magwavava: Amabzali mfuzri amatsrhoveli; ama na matsrhala kumbe svintlhanta; kambe Xikwembu Nkulukumba awamadisa. N’wine n’wi ni lisima ledzrikulu ngopfu kutlula tinyanyana.

25   I mani ku n’wine lweyi hi kutsrhama hi kupimisa hi svikazratu angayengetelaka masiku yakwe ya kuhanya hi wora dzrin’we?

26   Kutani ke, loko n’wingasvikoti kuyenca nchumu lowutsrongo, n’wihlatiyelela yini hi minchumu lemin’wana?

27   Lavisisani lesvi magon’hwa makulisaka xisvone: Amatizri nakone amazrungi mpahla; kambe ndzrin’wibzela lesvaku nambi Salomoni akuphatimeni kwakwe hinkwaku angasamanga ayambala kufana ni dzrin’we dzra wone.

28   Xilesvo, loko Xikwembu Nkulukumba ayambexisa xilesvi bzanyi anhoveni, lebzinga kone namunhla, mundzruku bzicukumetiwa andzrilweni bzipsha, ngopfungopfu atayambexa n’wine, va lipfumelo dzritsrongo!

29   Kutani n’wingatsrhameni hi kuhlatiyela hi lesvi n’witakada svone ni lesvi n’witakanwa svone, mfuzri n’wingatsrhameni hi kukazrateka miyanakanyu;

30   hikusa lesvi hinkwasvu hi lesvi matiko matikazrataka ha svone, kambe Tatana wenu awasvitiva lesvaku n’wasvivilela lesvo.

31   Kambe tikazratani hi Mfumu, kutani minchumu leyo n’witayengeteleliwa yone.

32   “Ungachave, we ntlhambinyana, hikusa svinyonxisi Tatana wenu kun’winyika Mfumu.

33   Xavisani minchumu yenu n’wihanana sva kupfuna svisiwana. Tihambelani svipachi sva mali lesvingagugikiki, ni vukosi lebzingahelikiki amatilweni, lomu kunganhingenikiki muyivi ni lomu minchumu mingadiwikiki hi tinsumba.

34   Hikusa lomu vukosi bzenu bzinga kone, hi lomu na tone timbilu tenu titakava kone.

35   “Tsrhamani na n’witibekiseli kutizra mfuzri na mimotsre yenu mitlhavikiwile,

36   n’wifana ni malandzra lamayimelaka n’winyi wa wone, lesvaku ankama wini na wini lowu atlhelaka ha wone hi le muchatwini, loko atlhasa aba xipfalu, matekela kumupfulela.

37   Ma ni njombo malandzra lawo, lawa loko n’winyi wa wone atlhasa, amakumaka na mavona! Ndzrihlayela mfuzri ndzrili ku n’wine: Atacinca mpahla amatsrhamisisa kudeni, abuya amabekela svakuda ni mati.

38   Kutani loko atlhasa makazri ka vusiku kumbe loko bziya kuxeni amakuma na malungile, njombo ya wone!

39   Kambe tivani lesvi, loko n’winyi wa yindlu afa etiva lesvaku muyivi afa atata hi nkama muni, inhaka angatsrhikanga yindlu yakwe yitlhanyiwa.

40   Na n’wine, tsrhamani na n’wilungile, hikuva N’wana wa Mhunu atatlhasa hi nkama lowu n’wingawuyimelangakiki.”

41   Kutani Petrosi aku: “Hosi, xana xifananiso lexi uxibzela hine ntsena kumbe ni hinkwavu?”

42   Kutani Hosi yiku: “Svone, i mani mulaviseli lwewa kudumbeka ni wa kutlhazriha lweyi n’winyi wakwe atakamubeka akuva alavisela malandzra yakwe lesvaku amanyika mpimu wa wone wa svakuda hi nkama wa kone?

43   A ni njombo nandzra lweyo, lweyi loko n’winyi wakwe atlhasa, amukumaka na ayenca tanu!

44   Ndzrihlayela mfuzri ndzrili ku n’wine: Atamubeka akuva alavisela minchumu yakwe hinkwayu.

45   Kambe loko nandzra lweyo ochuka apimisa lesvi mbilwini yakwe: ‘N’winyi wanga awahlwela kubuya’, kutani asungula kuba malandzra ya xinuna ni ya xisati, ni kuda, anwa atlhela apopsa,

46   n’winyi wa nandzra lweyo atatlhasa hi siku ledzri angamuyimelangakiki ha dzrone ni nkama lowu angawutivikiki, amukwapa svinene ava amunyika lesvitakakumiwa hi lava vangadumbekikiki.

47   Kutani nandzra lweyo lwativaka kuzrandzra ka n’winyi wakwe, kambe angatibekiseli nambi kuyenca kuzrandzra ka n’winyi wakwe, atapshitiwa hi minkhavi minyingi.

48   Kambe lweyi ayenciki minchumu lemifanelaka hi minkhavi na angasvitivi atapshitiwa hi minkhavi mitsrongo. Hikusa lweyi anyikiwiki svinyingi atalondzriwa svinyingi, ni lweyi atamelisiwiki svinyingi atavutisiwa svinyingi kutlula van’wana.

49   “Ndzribuyi ndzrintlhontlha ndzrilo la misaveni, nakone ndzringanavela yini handle ka kuwuvona na wupfuzra kutani?

50   Hikusa ndzri ni babatiso ledzri ndzrifanelaka kubabatisiwa ha dzrone, nakone mbilu yanga yikameki sva kunhansi loko dzringasiyenceka!

51   Xana n’wipimisa lesvaku ndzriteli kubuyisa kuzrula amisaveni? Ndzrin’wibzela lesvaku andzritelanga svone, kambe ndzriteli kutavanga kuyavana.

52   Hikusa kusukela svosvi kutava ni ntlhanu amutini lowuyavaniki, vazrazru vatalwa ni vabizri, lavabizri valwa ni lavazrazru.

53   Tatana ni n’wana vatahambana, tatana alwa ni n’wana, n’wana alwa ni tatana, mamana alwa ni n’wanakwe wa xisati, ni n’wana wa xisati alwa ni mamana wakwe, mamana wa jaha alwa ni n’wingi ni n’wingi alwa ni mamana wa jaha.”

54   Agama akanela ni svitsrhungu, aku: “Loko n’wivona tlavi dzritlhantuka hi le mpeladambu, n’witekela kuhlaya lesvi: ‘Xata xidzedze’, kutani sviyencekisa xisvosvo.

55   Ni loko n’wivona moya wuhunga hi le nyingitimu, n’wili: ‘Kutahisa’, svigama sviyenceka.

56   Vakanganyisi, n’wikota kutwisisa lesvaku matsrhamela ya misava ni ya tilo man’wibzela yini kambe sviyencekisa kuyini n’wingawutivi nkama lowu n’wihanyaka ku wone?

57   Nangweso, hayini n’wingayavanyisi ha bzenu lesvilulamiki?

58   Hikusa loko wene ni lweyi uholovisanaka naye n’wiya vuhosini, na n’wehe ndleleni, dzringisa kuheta mholova na yene, hikusa angachuka akukokakoka akuyisa ku muyavanyisi, kutani muyavanyisi akunyiketa ku mukhatisi, mukhatisi akupfalela bohelweni.

59   Ndzrikubzela lesvi: Ungaka ungahumi kone na ungahakelanga nkinyenta wa vugamu.”