BRX

1   Kutani antsrhaku ka lesvo, Hosi yihlawula van’wana va ntlhanu wa makume na mabizri, yivazruma hi vabizribizri amahlweni ka yone amadoropeni hinkwawu lawa yone hi ntshima afaka yitagama yiya ku wone.

2   Yigama yiku ku vone: “Kunene, ntsrhovelo i wukulu, kambe vatizri i vatsrongo. Xisvosvo, kombelani N’winyi wa ntsrhovelo azrumela vatizri antsrhovelweni.

3   Fambani! Lavisani, ndzrin’wizruma kufana ni tihamba amakazri ka mahava.

4   N’wingatekeni xipachi xa mali kumbe nkwama wa manghunghu kumbe tintangu, mfuzri n’wingaloseni mhunu andleleni.

5   Kwini na kwini lomu n’witakanhingena amutini wa kukazri, zrangani hi kuhlaya lesvi: ‘Hinavelela muti lowu kuzrula!’

6   Kutani loko ku ni n’wana wa kuzrula, kuzrula kwenu kutatsrhama na yene. Kambe loko ange kone, kutatlhelela kwenu.

7   Kutani tsrhamani amutini wolowo, n’wida lesvi van’wiphamelaka svone, hikusa mutizri afaneliwa hi muholo wakwe. N’wingasukasukeni ku muti lowu n’wiya ku wun’wana.

8   “Nangweso, adoropeni dzrini na dzrini ledzri n’witakanhingena ku dzrone, loko van’wiyamukela, danani lesvi van’wiphamelaka svone,

9   n’widaha timbabzi ta dzrone, n’witlhela n’wivabzela lesvi: ‘Mfumu wa Xikwembu Nkulukumba wutsrhindzrekeli kusuhi na n’wine.’

10   Kambe adoropeni dzrini na dzrini ledzri n’witakanhingena ku dzrone, loko vangan’wiyamukeli, humani n’wiyayima svitaratwini sva dzrone, n’wiku:

11   ‘Nambi ntsrhuzri wa doropa dzrenu lowunamazreliki minkondzrweni yezru, hawuphumuna. Nambitanu, tsrhamani na n’wisvitiva lesvaku Mfumu wa Xikwembu Nkulukumba wutsrhindzrekelile.’

12   Ndzrin’wibzela lesvaku lesviyencekeliki Sodoma svitayampsa kutlula doropa ledzro asikwini ledzro.

13   “Yowee, Korazini! Yowee, Betsayda! Hikuva loko mahlolana lamayenciwiki kwaku afa meyenciwa Tire na Sidoni, inhaka vatisoli khale svinene na vayambali masaka, vatsrhama ni le nozreni.

14   Nambitanu, asikwini dzra yavanyiso svitayampsela Tire na Sidoni kutlula wene.

15   Na wene Kapernawume, ungaka ungatlakuxeliwi atilweni; utafulametiwa Xizreni!

16   “Lweyi an’wiyingisetaka ayingiseta na mine. Ni lweyi an’widzrelaka na mine awandzridzrela. Kambe lweyi adzrelaka mine adzrela ni yelweyi andzrizrumiki.”

17   Kutani lava ntlhanu wa makume na mabizri vabuya na vatali hi kutsrhava, vaku: “Hosi, nambi mademona himahlulile hi kutizrisa vito dzraku.”

18   Kutani aku ku vone: “Ndzrivona Sathana na awile hi le tilweni kufana ni lihati.

19   Lavisani, ndzrin’winyiki ntamu wa kupsanya tinyoka ni mibalana, ni wa kuhlula ntamu hinkwawu wa nala, kutani aku na nchumu lowutakan’wivavisa.

20   Nambitanu, n’wingatsrhaveni hilesvi n’wihlulaka mademona, kambe tsrhavani hilesvi mavito yenu matsraliwiki amatilweni.”

21   Hi nkama wolowo atala hi kutsrhava ka moya lowa kuxwenga, aku: “Khanimambu, Tatana, Hosi ya tilo ni misava, hilesvi ufihleliki tintlhazri ni tintivi minchumu leyi, umipfuletela svivanana. Ina, we Tatana, hikuva lesvi hi lesvi svikunyonxisiki.

22   Kutani hinkwasvu svinyiketiwi mine hi Tatana, nakone aku na mhunu lwativaka N’wana handle ka Tatana, nakone aku na mhunu lwativaka Tatana handle ka N’wana na mani na mani lweyi N’wana anyonxelaka kumukomba Tatana wakwe.”

23   Agama andzruluka alavisa vadondzrisiwa akanela na vone hi tlhelo, aku: “Ma ni njombo mahlo lamavonaka lesvi n’wisvivonaka.

24   Hikusa ndzrin’wibzela lesvaku vaprofeta vanyingi ni tihosi vanaveli kuvona lesvi n’wisvivonaka kambe avasvivonanga, ni kuyingela lesvi n’wisviyingelaka kambe avasviyingelanga.”

25   Kutani kuhumelela ntivi yin’we ya nawu yitlhasa yiyima, yimudzringa, yiku: “Mudondzrisi, xana ndzrifanela kuyenca yini akuva ndzrikuma vutomi lebzingahelikiki?”

26   Ayihlamula aku: “Kutsraliwi yini Nawini? Udondzra lesvaku yini?”

27   Yihlamula yiku: “‘Zrandzra Yehovha, Xikwembu Nkulukumba waku, hi mbilu yaku hinkwayu ni hi hika dzraku hinkwadzru ni hi ntamu waku hinkwawu ni hi miyanakanyu yaku hinkwayu’. Ntlhantakubizri, ‘zrandzra walekwenu svanga hi lesvi utizrandzrisaka xisvone.’”

28   Kutani aku ku yene: “Uhlamuli svone; yenca svosvo utakuma vutomi.”

29   Kambe hi kujula kutiyenca n’wamunene, ntivi ya nawu yiku ku Yesu: “Walekwezru hi ntshimantshima i mani?”

30   Kutani Yesu ahlamula, aku: “Mhunu wa kukazri afa afulamela hi le Yerusalema aya Yeriko. Kutani adumeliwa hi svigevenga, svimuhlivila mpahla, svimubukutela, svigama svifamba, svimusiya na ali kusuhi ni kufa.

31   Kutani, njombo ya kone, muprista wa kukazri ofulamela hi xitaratu lexo, kambe loko amuvona, agega, afamba hi tlhelo ledzrin’wana.

32   Hi ndlela leyifanaka, mun’we wa mulevhi loko ahundzri hi kone amuvona, agega, afamba hi tlhelo dzrin’wana.

33   Kambe mun’we wa musamariya lweyi afaka atiyela lomu atiyelaka kone, ahuma hi yene; loko amuvona, amutwela vuzrombe.

34   Kutani amutsrhindzrekelela amubandhicha svilondzra, asvichela mafuzra ni vhinyo. Agama amukhwelisa ku mbongolo yakwe amuheketa amutini wa kuyamukela vayeni, amuhlayisa.

35   Kutani mundzruku ka kone ahumexa madenari mabizri ahakela n’winyi wa muti wa vayeni, aku: ‘Ndzrihlayisele mhunu lweyi, kutani xini na xini lexi utakaxitizrisa xa kuhundzra mali leyi, ndzritatakuhakela loko ndzrithlela.’

36   Uvona lesvaku hi wini ku lavazrazru angakombisa lesvaku avona mhunu lweyi adumeliwiki hi svigevenga svanga walekwavu?”

37   Kutani aku: “Hi lweyi amuyenceliki timpsalu.” Yesu kutani aku ku yene: “Famba uyayenca svosvo na wene.”

38   Kutani loko vali kazri vafamba, anhingena axidoropaneni xa kukazri. Kutani mun’we wansati lwavitaniwaka Marta amuhoyozela akaya kwakwe.

39   Marta afa ali ni makwavu lwavitaniwaka Mariya. Yelweyo atlhasi atsrhama kusuhi ni minkondzro ya Hosi ayingiseta lesvi afaka yikanela ha svone.

40   Kambe Martha afa ahingeletiwa hi mintizro ya kutala. Kutani abuyela Yesu, aku: “Hosi, xana awu na mhaka lesvi makwezru andzrisiyiki ndzritizra vusvanga? Mubzele abuya andzripfuna.”

41   Kutani Hosi yimuhlamula yiku: “Marta, Marta, ukazrateka utlhela utinyika ntizro hi minchumu ya kutala.

42   Kambe lesvijulekaka ahi svinyingi; nambi xin’we xayanela. Hikusa Mariya atilangeli nchumu lowunene, nakone anga kone lwatakamuwutlela wone.”