-
2 Petrosi 1
1 Simoni Petrosi, nandzra ni mupostola wa Yesu Kriste, ku lavakumiki lipfumelo dzra kufana ni dzrezru hi lisima hi kola ka vululami bza Xikwembu Nkulukumba wezru ni bza Muhuluxi wezru, Yesu Kriste:
2 Ndzrin’winavelela kuva n’wiyengeteleliwa vumbilu ni kuzrula hi vutivi bza Xikwembu Nkulukumba ni bza Yesu, Hosi yezru,
3 hikusa ntamu wa vukwembu bzakwe wuhinyiki minchumu hinkwayu lemiyisaka avuton’wini ni le kuchaveni ka Xikwembu Nkulukumba hi kola ka vutivi bza lweyi ahivitaniki hi kuphatima kwakwe ni vunene.
4 Hi kola ka minchumu leyi, ahinyiki svidumbiso lesva lisima ni lesvikulu, kuyencela lesvaku hi kola ka svone, n’wingava van’we va lavayaveliwaka ntumbuluku wa vukwembu, hesvi n’wiphonyokiki akuboleni ka misava lokuvangiwaka hi kunavela loka kubiha.
5 Hi nkonta ya lesvo, tikazratani svinene akuva n’wiyengetela vunene alipfumelweni, avuneneni yengetelani vutivi,
6 avutivini yengetelani kutikhoma, akutikhomeni yengetelani kutiyisela, akutiyiseleni yengetelani kuchava ka Xikwembu Nkulukumba,
7 akuchaveni ka Xikwembu Nkulukumba yengetelani lizrandzru dzra vukwavu, alizrandzrwini dzra vukwavu yengetelani lizrandzru dzra kuzrandzra vhanu hinkwavu.
8 Hikusa loko minchumu leyi mili kone ku n’wine mitlhela mikhapakhapa, mitayenca lesvaku n’wingavi vhanu va kutsrhama hi mavoko kumbe lavangeke na mihandzru avutivini lebzi n’winga nabzu ha Hosi yezru, Yesu Kriste.
9 Hikusa mani na mani lwapfumalaka minchumu leyi angavoni, asvonya mahlo lesvaku mangavoni livaningo, nakone adzrivalile lesvaku abasisiwi svidoho svakwe lesva khale.
10 Xilesvo, vamakwezru, khinyelani svinene akuva n’witiyisa kuvitaniwa kwenu ni kuhlawuliwa kwenu, hikusa loko n’wiyenca lesvo, n’wingatichuka n’wiwela xidohweni ni siku ni dzrin’we.
11 Kunene, hi ndlela leyi, n’witanyikiwa hi kuhindzrahindzra kunhingena amfun’wini lowungahelikiki wa Hosi yezru ni Muhuluxi wezru Yesu Kriste.
12 Xilesvo, minkama hinkwayu ndzritsrhama na ndzritibekiseli kun’widzrimuxa minchumu leyi, nambilesvi n’wimitivaka ni lesvi n’witiyisiwiki axihlayelamfuzrini lexinga ku n’wine.
13 Kambe ndzrivona svili svinene, kuva na ndzrehe ntsrongeni lowu, ndzrin’wihlakahla hi kun’widzrimuxa,
14 hi kutiva lesvaku hi kuhangwesa ntsronga wanga wutasusiwa, svanga hesvi na yene Hosi yezru Yesu Kriste andzrikhanyiseliki ha kone.
15 Minkama hinkwayu ndzritatihita kuyencela lesvaku n’witadzrimuka minchumu leyi loko ndzritava na ndzrifambile.
16 Loko hin’witivisi ntamu ni kutlhasa ka Hosi yezru Yesu Kriste, ahisviyencanga hi kulandzra svihitana sva kutsikiwa hi vutlhazri, kambe hine hivoni vukulu bzakwe hi mahlo yezru hi ntshima.
17 Hikusa ayamukeli xihluwa ni kuphatima lokupfaka ku Xikwembu Nkulukumba, Tatana, loko abzeliwi mazritu ya kufana ni lawa hi kuphatima lokukulu: “Lweyi i N’wananga, lweyi ndzrimuzrandzraka, lweyi ndzrimunyonxelaka.”
18 Ina, mazritu lawa mayingeliwi na mapfa hi le tilweni na hili na yene anhaveni leya kuxwenga.
19 Kutani hi ni zritu dzra vuprofeta ledzritiyisiwiki, nakone n’wiyenca svone loko n’widzrizreyela ndleve, svanga motsre lowuvaningaka ambangwini lowunga ni munyama, anga atimbilwini tenu, kukondzra bzixa, na yone nyeleti ya mixo yihuma.
20 Hikusa, xa kusungula, n’wasvitiva lesvaku aku na vuprofeta bza Matsralwa lebzipfaka ku ntlhamuxelo wa mhunu wa kukazri.
21 Hikusa vuprofeta abzisamanga bzibuyisiwa hi kuzrandzra ka mhunu, kambe vhanu vavulavuli lesvipfaka ku Xikwembu Nkulukumba na vasusumeteliwa hi moya wa kuxwenga.