-
1 Petrosi 3
1 Hi ndlela leyifanaka, n’wine vasati, tibekani hansi ka vanuna venu, kuyencela lesvaku loko ku ni lavayalaka kuyingiseta zritu, vatakokiwa hi mahanyela ya vasati vavu, kunge hi zritu,
2 hilesvi vavoniki ha bzavu mahanyela yenu laya kubasa ni ya xichavu.
3 Kutixongisa kwenu kungave ka minchumu ya le handle, hi malukela ya misisi ya kutlulisa mpimu ni kutibeketela minkazrazra, masindzra ni svitlan’wana sva gole kumbe kuyambala minkhancu,
4 kambe akuve ka lesvi mhunu anga xisvone hi ndzreni, hi kutixongisa lokungabolikiki ka moya wa kuzrula ni wa kutimiyelela, lokunga ka lisima ledzrikulu amahlweni ka Xikwembu Nkulukumba.
5 Hikusa leyi hi yone ndlela leyi afaka vatixongisa ha yone vavasati va kuxwenga lava afaka vadumba Xikwembu Nkulukumba, vatibeka hansi ka vanuna vavu,
6 kufana na Sara lweyi afaka ahamba ayingiseta Abrahamu, amuvitana hosi. N’wine n’windzruluki vana vakwe, hi kuhanya hi kuyenca lesvinene, na n’wingachavisiwi hi nchumu.
7 N’wine vanuna, hi ndlela leyifanaka, tsrhamani na vone hi kuya hi vutivi, n’wivatamela hi xichavu svanga hi xibza lexingatiyangakiki, xa xisati, hikuva na vone vatakuma vumbilu bza kunyikiwa vutomi kun’we na n’wine, akuva svikhongoto svenu svingachuki svisiveliwa.
8 Hi vugamu, hinkwenu vanani ni miyanakanyu min’we, n’witwelana vuzrombe, n’wizrandzranana svanga vamakwavu, n’witsretsrelelana, n’wititsrongahata.
9 N’wingatlheliseleni vubihi hi vubihi kumbe xizruku hi xizruku. Amatsrhan’wini ya lesvo, tlheliselani hi kunavelela vambeni tinjombo, hikusa n’wivitaneliwi kuhanyisa xisvosvi, akuva n’witada pfindla dzra tovoko.
10 Hikusa “mani na mani lwazrandzraka vutomi ni kuvona masiku laya hombe afanela kuvonelela lidzrimi dzrakwe lesvaku dzringayenci lesva kubiha ni milomu yakwe lesvaku mingakaneli madzrimi.
11 Aafulazrele lesvibihiki, ayenca lesvinene; aajule kuzrula akulandzrelela.
12 Hikusa mahlo ya Yehovha ma le henhla ka lavalulamiki, nakone tindleve takwe tiyingiseta xikombelo xavu, kambe vuso bza Yehovha bzihlundzrukela lavayencaka lesva kubiha.”
13 Kunene, xana i mani lweyi atakan’wiyenca sva kubiha loko n’wihisekela lesvinene?
14 Kambe nambiloko n’wichuka n’wixaniseka hi nkonta ya vululami, n’wi ni njombo. Nambitanu, n’wingachaveni lesvi vone vasvichavaka, mfuzri n’wingakazratekeni.
15 Kambe xwengisani Kriste svanga Hosi atimbilwini tenu, minkama hinkwayu n’witsrhama na n’witibekiseli kutihlamulela amahlweni ka mani na mani lwajulaka kutiva ku n’wine xivangelo xa dumbo ledzri n’winga nadzru, kambe n’wiyenca tanu hi moya wa kuzrula ni xichavu.
16 Tsrhamani na n’wi ni lipfalu ledzrinene, akuva lavakanelaka kubiha ha n’wine vadaniseka ku xin’wana ni xin’wana lexi van’wilumbetaka xone, hi kola ka hanyela dzrenu ledzrinene svanga malandzra ya Kriste.
17 Hikusa svayampsa kuxaniseka hi kuyenca lesvinene loko ali kuzrandzra ka Xikwembu Nkulukumba kusvitsrhika sviyenceka, kutlula kuva n’wixaniseka hi kuyenca lesva kubiha.
18 Hikusa Kriste afi kan’we ntsena hi nkonta ya svidoho, ava mululami lwafelaka lavangalulamangakiki, akuva an’witsrhindzretela ku Xikwembu Nkulukumba. Kunene adlayiwile anyameni, kambe ahanyisiwile amoyeni,
19 laha atlheliki ayazrezrela ni mimoya abohelweni,
20 leyi akusunguleni miyaliki kuyingiseta loko Xikwembu Nkulukumba ali kazri ayimela hi kulehisa mbilu asikwini dzra Nowa, na ngalawa yili kazri yiyakiwa, leyi vatsrongo vahulukeliki ku yone hi kola ka mati, anga ntlhanu wa mahika na mazrazru.
21 Babatiso, kunga nchumu lowufanaka ni lesvo, na dzrone dzran’wihuluxa svosvi (kunge hi kususa nsila ya nyama, kambe hi kukombela lipfalu ledzrinene ku Xikwembu Nkulukumba), hi kola ka kupfuxiwa ka Yesu Kriste,
22 lweyi anga xineneni xa Xikwembu Nkulukumba, svanga hesvi ayiki tilweni, kuva kubekiwa hansi kwakwe tintsrumi, ni vuhosi, ni mintamu.