-
Vaheberu 9
1 Kutani ke, xipfumelelanu xa kusungula afa xi ni svileleto sva magandzrelela ya kone ni mbangu wa kuxwenga la misaveni.
2 Hikusa afa kubekisiwi tende, ledzringa ni xilawu xa kusungula, lexi afaka xivitaniwa Mbangu wa Kuxwenga, lomu afaka ku ni svikhomamotsre ni tafula ni makati ya magandzrelo.
3 Kambe antsrhaku ka xisizrelo xa vubizri, afa ku ni xilawu lexivitaniwaka Mbangu wa Kuxwengisisa,
4 lexi afaka xi ni alitari dzra gole dzra kuhisela ku dzrone mizri ya kunun’hwela, ni areka dzra xipfumelelanu ledzri afaka dzrinamekiwi hi gole matlhelo hinkwawu, ledzri afaka ku ni khuwana dzra gole ledzritameliki mana ni nhonga ya Aroni leyingahluka sviluva, kutlhela kuva ni svipepezrele sva xipfumelelanu;
5 Kutani ahenhla ka areka afa ku ni makerubimi laya kuphatima na mafuneketi xifuneketo xa vudzrivalelo hi timpapa ta wone. Kambe svosvi ahi nawu nkama wa kukanela svinyingi hi minchumu leyi.
6 Antsrhaku ka loko minchumu leyo miyakisiwi xilesvo, vaprista vanhingena axilawini xa kusungula xa tende nkama ni nkama akuva vahetisisa vutizreli bzavu lebza kuxwenga;
7 kambe muprista lwenkulu anhingena vusvakwe ku xilawu xa vubizri kan’we hi lembe, na atameli ngati, leyi ayihumexelaka yene hi ntshima ni svidoho lesvi vhanu vasviyenciki hi mphazamu.
8 Kutani moya wa kuxwenga wasvikhanyisa lesvaku ndlela ya kunhingena ambangwini wa kuxwenga afa yingasikombekisiwa na tende dzra kusungula dzrehe kone.
9 Tende ledzri i xifaniso xa nkama lowu, nakone hi kuya hi lulamiselo ledzri, kuhumexiwa magandzrelo ni svitlhavelo. Nambitanu, lesvi asvisvikoti kuyenca lesvaku lipfalu dzra mhunu lwayencaka vutizreli lebza kuxwenga dzrihetiseka.
10 Vhanu vasindzriseka kusviyenca ntsena hi svakuda ni svakunwa ni mikhuva ya kusiyanasiyana ya kutibasisa, kunga lesvi afaka svijuliwa hi nawu hi tlhelo dzra nyama, lesvi svingabekiwa akuva svilandzriwa kuyatlhasa ku nkama wa kululamisa minchumu.
11 Nambitanu, loko Kriste atile svanga muprista lwenkulu wa minchumu leminene lemiyencekiki, atsremakanyi tende dzra kutlula ledzra kusungula hi vukulu ni ledzrihetisekiki, dzra kuka dzringayenciwanga hi mavoko, hi lesvaku, ledzringeke dzra ntumbuluku lowu.
12 Anhingeni ambangwini wa kuxwenga na angatamelanga ngati ya timbuti ni ya svihon’wana, kambe na atameli ngati yakwe hi ntshima, kan’we ntsena, ava ahikumela kuntsrhunxiwa lokungahelikiki.
13 Hikusa loko ngati ya timbuti ni ya tihomu ni nozra wa xithole lesvixuviwaka ahenhla ka lavanyamiki svisvikota kuxwengisa mhunu, hi tlhelo dzra kubasisa nyama,
14 ngopfungopfu ngati ya Kriste, lweyi hi moya lowungahelikiki atinyikeliki na ange na nchumu wa kusoleka ku Xikwembu Nkulukumba, yitabasisa lipfalu dzrezru amintizrweni lemifiki akuva hikota kugandzrela Xikwembu Nkulukumba lwahanyaka!
15 Kutani hi xivangelo lexi, i mutlhanganisi wa xipfumelelanu leximpsha, akuva lavavitaniwiki vavona kuhetiseka ka xidumbiso xa pfindla ledzringahelikiki, lesvi kuhumeleliki lifu dzra kuvahuluxa hi tizrulo asvidohweni lesvi vasviyenciki hansi ka xipfumelelanu xa kusungula.
16 Hikusa lomu kunga ni xipfumelelanu, lifu dzra lweyi ahambiki xipfumelelanu xa kone kujuleka dzritivisiwa,
17 hikusa xipfumelelanu xitizra loko ku ni lifu, hikuva axitizri loko lweyi ahambiki xipfumelelanu ahahanya.
18 Xilesvo, xipfumelelanu xa kusungula axisungulanga kutizra na kunge na ngati.
19 Hikusa loko Moxe aheti kubzela vhanu hinkwavu svileleto hinkwasvu sva Nawu, ateki ngati ya svihon’wana ni ya timbuti, ni mati, ni voya bza libungu, ni hisopo, axuva buku ni vhanu hinkwavu,
20 aku: “Leyi hi yo ngati ya xipfumelelanu lexi Xikwembu Nkulukumba an’wileletiki kuxibekisa.”
21 Hi ndlela leyifanaka, axuvi tende ni svibza hinkwasvu sva vutizreli bza kuxwenga hi ngati.
22 Nangweso, hi kuya hi Nawu, kusuhi ni minchumu hinkwayu mibasisiwa hi ngati, nakone loko kungahalatiwi ngati, aku na kudzrivaleliwa ka svidoho.
23 Xilesvo, afa kujuleka lesvaku svifaniso sva minchumu ya le tilweni svibasisiwa hi tindlela leti, kambe minchumu ya le tilweni mijula svitlhavelo lesva kuyampsa ngopfu kutlula lesvo.
24 Hikusa Kriste anganhingenanga ambangwini wa kuxwenga wa kuhambiwa hi mavoko, lowunga xifaniso xa lowa ntshimantshima, kambe anhingeni atilweni hi ntshima, akuva ahumelela amahlweni ka Xikwembu Nkulukumba hi nkonta yezru,
25 nakone asvijulanga lesvaku atinyikela kunyingi, kufana ni loko muprista lwenkulu anhingena ambangwini lowa kuxwenga lembe ni lembe na atameli ngati leyingeke yakwe.
26 Hikusa, afa svitajula lesvaku axaniseka kunyingi kusukela akutumbuluxiweni ka misava. Kambe svosvi ahumeleli kan’we ntsena akuheleni ka nguva ya Moxe akuva atahelisa xidoho hi kutinyikela ava xitlhavelo.
27 Kutani svanga hesvi vhanu vafanelaka kufa kan’we ntsena, kambe antsrhaku ka kone kubuya yavanyiso,
28 na yene Kriste anyikeliwi kan’we ntsena akuva azrwala svidoho sva lavanyingi. Kutani loko ahumelela dzra vubizri, angahativa hi mhaka ya xidoho, kambe atavoniwa hi lavamulaviselaka hi kuhiseka akuva avahuluxa.