-
Tito 1
1 Mine Pawlu, nandzra wa Xikwembu Nkulukumba ni mupostola wa Yesu Kriste, hi kutwanana ni lipfumelo dzra vahlawuliwa va Xikwembu Nkulukumba ni vutivi bza kuhetiseka bza xihlayelamfuzri, lebzitwananaka ni kuhanya hi kuchava Xikwembu Nkulukumba,
2 ni lebziseketeliwiki akulaviseleni ka vutomi lebzingahelikiki lebzi Xikwembu Nkulukumba, lwangeke na kuhemba, abzidumbisiki khale ka khaleni,
3 lweyi mfuzri, hi nkama wakwe, apfuleteliki zritu dzrakwe hi ntizro wa kuzrezra lowu ndzringazrwexiwa wone hi kulandzra xileleto xa Muhuluxi wezru, anga Xikwembu Nkulukumba;
4 ndzritsralela wene Tito, n’wananga wa xihlayelamfuzri hi kulandzra lipfumelo ledzri hinga nadzru: Ndzrikunavelela vumbilu ni kuzrula lesvipfaka ku Xikwembu Nkulukumba ni Tatana wezru na Kriste Yesu, Muhuluxi wezru.
5 Lexi ndzrikusiyeliki xone Kreta i kuva ululamisa minchumu leyi afaka mahakiyela ni kubeka vakulu adoropeni dzrin’wana ni dzrin’wana, hi laha ndzrikuleletiki ha kone:
6 loko ku ni mhunu lwangeke na xisandzru, nuna wa nsati mun’we ntsena, lwanga ni vana lavanga vapfumeli, lavavangalumbetiwikiki kuva ni mahanyela ya futa kumbe xiyalisu.
7 Hikusa svajuleka akuva mulaviseli, svanga mutameli wa yindlu ya Xikwembu Nkulukumba, ava lwangeke na xisandzru, lwangeke na nkanu, angavi lwewa kuhangwesa ahlundzruka, angavi wa kuzrandzra kunwa, angavi wa kubanana, angavi lwewa kuzrandzra mali ya kuyikuma hi kukanganyisa,
8 kambe ava lwazrandzraka kuyamukela vayeni, lwazrandzraka lesvinene, lwayencaka minchumu ya kutwisiseka, lwalulamiki, lwabasiki, lwatikhomaka,
9 lwanamazrelaka azritwini ledzra kudumbeka loko adondzrisa, akuva atakota kukuca hi dondzro leyinene ni kutshinya lavakanetaka.
10 Hikusa ku na vanyingi vakalaka vangasvizrandzri kuyingiseta, vazrandzraka kuvulavula sva kuka ndlela, vahanyaka hi kukanganyisa vambeni, ngopfungopfu va lixaka dzra lavangasoka,
11 lava kujulekaka lesvaku vapfaliwa milomu, hikusa vafamba vahohlota mindangu hinkwayu hi kudondzrisa minchumu leyi vangafanelikiki kumidondzrisa, hi kufela mali ya kukanganyisa.
12 Mun’we wa vone, anga muprofeta wavu, akoti aku: “Vakreta vazrandzra kuhemba minkama hinkwayu, i svivandzrana lesva kulebza ni van’wamagolo va kuzrandzra kuda na vetsrhama hi mavoko.”
13 Vumboni lebzo bzitiyile. Xilesvo, vakhwavele svinene akuva vatakota kuhanya ha hombe alipfumelweni,
14 vangayingiseti svihitana sva xiyuda ni svileleto sva vhanu lavafulazrelaka xihlayelamfuzri.
15 Minchumu hinkwayu mibasile ku lavabasiki; kambe ku lavanyamiki ni lavangeke na lipfumelo, aku na lexibihiki, hikusa miyanakanyu yavu ni lipfalu dzravu svinyamile.
16 Vali vamutiva Xikwembu Nkulukumba, kambe vamulandzrula hi mintizro yavu, hikusa vanyenyentsa nakone va ni nkanu, xilesvo avafaneleki kuyenca ntizro ni wun’we lowunene.