-
2 Timotewu 4
1 Amahlweni ka Xikwembu Nkulukumba ni ka Kriste Yesu, lweyi atakayavanyisa lavahanyaka ni lavafiki hi nkama lowu atakavonekisiwa ha wone ni hi Mfumu wakwe, ndzrikuleleta lesvi:
2 Zrezra zritu; tizra hi xihatla hi nkama lowunene ni nkama lowungeke wunene; tshinya, ukhwavela, utsratsriya na ulehisa mbilu svinene utlhela utizrisa madondzrisela lamanene.
3 Hikusa kutava ni nkama lowu vhanu vatakakala vangahajuli kuyingela nchumu hi dondzro leyinene, kambe hi kulandzra kunavela kwavu, vatatijulela vadondzrisi lavakanelaka lesvi vazrandzraka kusviyingela.
4 Vatatsrhiketa kuyingiseta xihlayelamfuzri, vafamba vayingiseta svihitana.
5 Kambe, wene tsrhama na upfukile hi matlhelo hinkwawu, utiyisela ku minchumu ya kubindzra, uyenca ntizro wa muzrezri wa madzrungula lamanene, uhetisisa vutizreli bzaku.
6 Hikusa kutani ndzrisunguli kuchululiwa kufana ni bzala bza magandzrelo, nakone nkama wa kuntsrhunxiwa kwanga wu kusuhi.
7 Ndzrilwi yimpi leyinene, ndzritsrutsrumi mpfhuka kuyatlhasa avugan’wini, ndzribekisi lipfumelo.
8 Kusukela svosvi, ndzribekiseliwi ngiyana ya vululami, leyi Hosi, muyavanyisi wa kululama, yitakandzrinyika yone svanga hakelo asikwini ledzro, na ange mine ntsena, kambe ni hinkwavu lavazrandzriki kuvona kutlhasa ka yone.
9 Yenca hinkwasvu akuva undzritlhasela hi kuhangwesa.
10 Hikusa Demasi afambi andzrisiya vusvanga hikusa azrandzra misava ya svosvi; kutani ayi Tesalonika. Kresense ayi Galatiya, kasi Tito ayi Dalmatiya.
11 Luka hi yene ntsena anga na mine. Teka Marku ubuya naye, hikusa andzripfuna svinene avutizrelini.
12 Kambe Tikiku ndzrimuzrumi aya Efesa.
13 Loko ubuya, buya ni mujasi lowu ndzriwusiyiki le Trowasi na Karpu, ni mabuku, ngopfungopfu laya svikhumba.
14 Alexandre, lwewa kutizra hi tinsimbi ta nsuku andzriyenceli nsele leyikulu. Yehovha atamuhakelisa hi kuya hi sviyenco svakwe.
15 Na wene ufanela kutivonela ku yene, hikusa alwisani ni zritu dzrezru kutlulisa mpimu.
16 Loko ndzritilwela ku khambi dzra kusungula, akuvanga na mhunu lwayimiki na mine, kambe hinkwavu ka vone vafambi vandzrisiya. Afa ndzrinavela lesvaku vangahakelisiwi hi mhaka leyi.
17 Kambe Hosi yindzriseketelile, yindzrinyika ntamu, akuva ntizro wa kuzrezra wukota kuyenciwa hi kuhelela hi kutizrisa mine, ni kuva matiko hinkwawu mayingela madzrungula lamanene. Nakone ndzrihuluxiwile anon’wini wa ndzrawu.
18 Hosi yitandzrihuluxa amintizrweni hinkwayu leya kubiha nakone yitandzrihuluxa akuva ndzrikuma Mfumu wa yone wa matilo. Ndzrili ayidzrumisiwe hi masiku ni masiku! Amen.
19 Ndzridzrungulele Priska na Akwila ni ndangu wa Onezifro.
20 Eraxtu asale Korinte, kambe ndzrisiyi Trofimo na avabza le Miletu.
21 Yenca hinkwasvu lesvi ungasvikotaka akuva utlhasa na kungasisungula vuxika. Eblu awakudzrungula; na yene Pudense, na Linu, na Klawdya, ni vamakwezru hinkwavu, vakudzrungula.
22 Hosi ayive ni moya lowu unga nawu. Vumbilu bza yone abzive na wene.