-
2 Timotewu 3
1 Kambe svitive lesvaku amasikwini ya vugamu, kutahanyiwa minkama lemibindzraka ngopfu svinene.
2 Hikusa vhanu vatava vhanu lavatizrandzraka, lavazrandzraka mali, lavatikulisaka, lavavulavulaka vubihi hi vambeni, lavangayingisetikiki vapsele, lavangeke na khanimambu, lavangachavikiki Xikwembu Nkulukumba,
3 lavangeke na lizrandzru, lavangapfumelikiki kuzrulisana ni vambeni, lavanga ni mahlevo, lavangatikhomikiki, lava kulebza, lavangazrandzrikiki sva svinene,
4 lavajikelanaka, va nkanu, lavatikukumuxaka, lavazrandzraka kutlanga kutlula kuzrandzra Xikwembu Nkulukumba,
5 lavayencaka ingi vachava Xikwembu Nkulukumba nakuve avahanyi hi vukhongoti. Kutani wene hambana ni vhanu lava.
6 Amakazri ka vhanu va muxaka lowo kuhumelela lavanhingenaka mitini ya van’wana hi kutsuma, vawonga vavasati lavangatiyangakiki, lavabindzriwaka hi svidoho, lavamphuntisiwaka hi kunavela ka kusiyanasiyana,
7 lavatsrhamaka hi kudondzra kambe vangagameli kuxitiva xihlayelamfuzri.
8 Kutani kufana ni lesvi Yani na Yambre vakanetiki Moxe, na vone lava vakaneta xihlayelamfuzri. Miyanakanyu ya vhanu lava mihonekile hi kuhelela, nakone avafaneliwi hi nchumu atimhakeni ta lipfumelo.
9 Kambe vangatitlhasa mbangu, hikusa vumphunta bzavu bzitavoneka hi kukhanya ku vhanu hinkwavu, svanga hesvi sviyencekiki amahlweni ka vhanu lavabizri.
10 Kambe wene ulandzrelelisisi dondzro yanga, ni hanyela dzranga, ni nkongometo wanga, ni lipfumelo dzranga, ni kulehisa kwanga mbilu, ni lizrandzru dzranga, ni kutiyisela kwanga,
11 ni kuxanisiwa loku ndzrikumaniki na kone ni svikazratu lesvi ndzritlhanganiki na svone, sva kufana ni lesvi svingandzriwela le Antiyokiya, le Ikonyu ni le Lixtra. Ndzritiyiselile loko ndzrixanisiwa hi ndlela leyo, nakone Hosi yindzrihuluxile ku svone hinkwasvu.
12 Nangweso, hinkwavu lavanavelaka kuhanya hi kuchava Xikwembu Nkulukumba kun’we na Kriste Yesu na vone vataxanisiwa.
13 Kambe vhanu va kubiha ni vakanganyisi vatatlulisa mpimu hi kubiha, vakanganyisa vatlhela vakanganyisiwa.
14 Nambitanu, wene tsrhama ku lesvi usvidondzriki ni lesvi ukholwisiwiki svone, hi kutiva lava usvidondzriki ku vone,
15 ni lesvaku kusukela na wehe xin’wanana lexahakakubelekiwa, utivi matsralwa ya kuxwenga, lamakotaka kukutlhazrihisa akuva ukuma huluku hi kuva ni lipfumelo ku Kriste Yesu.
16 Matsralwa hinkwawu mahuhuteliwi ha Xikwembu Nkulukumba nakone mapfuna kudondzrisa, kulaya, kululeka, ni kuwupfisa mhunu andleleni ya kululama,
17 akuva mhunu wa Xikwembu Nkulukumba afaneleka ha hombe, ava ni hinkwasvu lesvijulekaka akuva ayenca ntizro wun’wana ni wun’wana lowunene.