-
2 Timotewu 2
1 Xilesvo, wene n’wananga, kuma ntamu atimpsalwini letinga ku Kriste Yesu;
2 nakone lesvi usviyingeliki ku mine amahlweni ka timboni letinyingi, svitamelise vavanuna lava kudumbeka, lava na vone vatakafanelekela kudondzrisa van’wana.
3 Svanga socha dzra Kriste Yesu, pfumela kuxaniseka na hine.
4 Anga kone lweyi anga kulweni ka yimpi lweyi atitsrimbelelaka hi sva mabindzru ya vutomi lebzi, hikusa ajula kunyonxeliwa hi lweyi amutsralisiki avusocheni.
5 Nangweso, nambi le mintlangwini, mani na mani lwakumekaka amphikisanwini wa kutsrutsruma anganyikiwi ngiyana loko angatsrutsrumanga hi kulandzra milawu ya kone.
6 Mudzrimi lwatihitaka afanela kuva wa kusungula kuda mihandzru ya kone.
7 Tsrhama hi kupimisa hi lesvi ndzrisvihlayaka; Hosi yitakunyika kuyingelisisa atimhakeni hinkwatu.
8 Dzrimuka lesvaku Yesu Kriste apfuxiwile akufeni ni lesvaku afa ali wa lixaka dzra Davhida, hi kuya hi madzrungula lamanene lawa ndzrimatwalisaka,
9 lawa ndzrixanisekaka hi nkonta ya wone ndzriva ndzripfaleliwa bohelweni svanga xigevenga. Nambitanu, zritu dzra Xikwembu Nkulukumba adzritsrimbiwanga.
10 Hi mhaka yoleyo, ndzritiyisela ku hinkwasvu hi nkonta ya vahlawuliwa, akuva na vone vatakota kukuma huluku ledzrikotekaka ha Kriste Yesu, ni vuphatimi lebzingahelikiki.
11 Zritu ledzri dzradumbeka: Kunene loko hifi kun’we, hitatlhela hihanya kun’we;
12 loko hitiyisela, hitatlhela hifuma kun’we; loko himulandzrula, na yene atahilandzrula;
13 loko hingahadumbeki, yene atama adumbeka, hikusa ange na kutilandzrula.
14 Vadzrimuxe minchumu leyi, uvadondzrisa amahlweni ka Xikwembu Nkulukumba lesvaku vangaphikisani hi mazritu, hikusa lesvo asvipfuni nchumu, kambe ntsena svovavisa lavayingisetaka.
15 Yenca hinkwasvu lesvi ungasvikotaka akuva utivonekisa ku Xikwembu Nkulukumba svanga mhunu lwayamukelekaka, uva mutizri lwangeke na nchumu wa kudana ha wone, udzritlhamuxela ha hombe zritu dzra xihlayelamfuzri.
16 Kambe ungapele ku minkanetanu ya kuka ndlela, lemingakombikiki xichavu hi Xikwembu Nkulukumba, hikusa mitayengetela kuva vhanu vangachavi Xikwembu Nkulukumba,
17 nakone lesvi misvihlayaka svitanava kufana ni xilondzra xa mudzoko. Himenewu na Filetu i van’we va vone.
18 Vhanu lava vafulazreli xihlayelamfuzri, vaku kupfuka ka vafi kutani kuyencekile, vahonetela lipfumelo dzra van’we.
19 Nambitanu, masungulu lamatiyiki ya Xikwembu Nkulukumba matsrhama na matiyile, ma ni xifungu lexiliki: “Yehovha awavativa lavanga vakwe”, nakone “Mun’wana ni mun’wana lwavitanaka vito dzra Yehovha aatsrhike vubihi.”
20 Kutani, andlwini leyikulu aku na svibza sva gole ni sva silivhela ntsena, kambe ku ni ni sva ntsrandzra ni sva vumba. Nakone svin’we sva svone kunene svi ni ntizro wa lisima, kambe svin’wanyana svi ni ntizro lowungeke wa lisima.
21 Kutani, loko mhunu ativonela ku lesva vugamu, atava xitizro lexitizriseliwaka sva lisima, lexixwengisiwiki, lexipfunaka ku n’winyi wa xone, xilulameliki ntizro wun’wana ni wun’wana lowunene.
22 Xilesvo, tsrutsruma kunavela ka vumpsha, kambe ulandzrelela vululami, lipfumelo, lizrandzru, kuzrula, kun’we ni lavavitanaka Hosi hi mbilu ya kubasa.
23 Nakone ungapfumele kudokadokisana ka kukala nhloko ni ka kukala vutivi, hi kutiva lesvaku kupsala timholova.
24 Hikusa nandzra wa Hosi angafanelanga kulwa, kambe afanela kuva lwewa kunabzala amahlweni ka hinkwavu, lwakotaka kudondzrisa, lwatikhomaka loko ahoxeliwa,
25 adondzrisa hi moya wa kuzrula lavazrandzraka kukaneta, hikusa kumbexana Xikwembu Nkulukumba angavanyika mbilu ya kutisola leyitakavayenca vativa xihlayelamfuzri,
26 akuva miyanakanyu yavu mitlhela mitizra ha hombe, vava vaphonyoka antlhan’wini wa Diyavulosi, hikusa avaphasile akuva vayenca kuzrandzra kwakwe.