-
2 Timotewu 1
1 Pawlu, lweyi, hi kuzrandzra ka Xikwembu Nkulukumba, anga mupostola wa Kriste Yesu, hi kuya hi xidumbiso xa vutomi lebzinga kone ha Kriste Yesu,
2 ku Timotewu, n’wananga lwazrandzrekaka: Ndzrikunavelela vumbilu, ni timpsalu ni kuzrula lesvipfaka ku Xikwembu Nkulukumba, Tatana, ni le ku Hosi yezru Kriste Yesu.
3 Ndzrikhensa Xikwembu Nkulukumba, lweyi ndzrimugandzrelaka kufana ni lesvi vatatana vanga vayencisiki xisvone, hi lipfalu ledzribasiki, na ndzringatsrhiki kukuphata asvikombelweni svanga vusiku ni nhlikanhi.
4 Loko ndzridzrimuka minyembeti yaku, ndzrinavela kukuvona, akuva ndzritatala hi kutsrhava.
5 Hikusa ndzradzrimuka lipfumelo dzraku ledzringeke na vukanganyisi, ledzrizrangiki dzritsrhama ku kokwana waku Loysi, na mamana waku, Ewunisi, kambe ledzri ndzringa ni kudumba ka lesvaku dzri kone ni le ku wene.
6 Hi xivangelo lexi, ndzrikudzrimuxa kuhlanganyeta nyiko ya Xikwembu Nkulukumba leyi ungayikuma ankama lowu ndzringakutlhanteka mavoko.
7 Hikusa Xikwembu Nkulukumba angahinyikanga moya wa vutoya, kambe ahinyiki moya wa ntamu ni wa lizrandzru ni wa miyanakanyu lemitizraka ha hombe.
8 Xilesvo, ungachuke udana hi mhaka ya vumboni bza Hosi yezru kumbe bza ka kwanga, lesvi ndzringa bohelweni hi mhaka ya yone, kambe pfumela kuxaniseka kun’we hi mhaka ya madzrungula lamanene, hi kudumba ntamu wa Xikwembu Nkulukumba,
9 lwahihuluxiki, ahivitana hi kuvitaniwa loka kuxwenga, na kunge hi mhaka ya mintizro yezru, kambe hi nkonta ya nkongometo wakwe ni vumbilu bzakwe, lebzi ahikombiki bzone hi kola ka Kriste Yesu khale ka khaleni,
10 kambe bzikhanyisiwiki svosvi ntsena hi kola ka kuvonekisiwa ka Muhuluxi wezru, Kriste Yesu, lweyi ahelisiki lifu, ahivaningela ndlela ya kukuma vutomi ni kupfumala kubola hi kutizrisa madzrungula lamanene,
11 lawa ndzringabekiwa kuva muzrezri, mupostola ni mudondzrisi wa wone.
12 Hi svosvo svindzriyencaka ndzritiyisela ku lesvi ndzritlhanganaka nasvu. Kambe andzri na tingana, hikusa ndzramutiva lweyi ndzrimupfumeliki, nakone ndzradumba lesvaku awasvikota kubekisa lesvi ndzrimukombeliki kuva andzribekisela svone kuko kutlhasa siku ledzro.
13 Bekisa muxaka wa mazritu lamanga manene lawa umayingeliki ku mine ni lipfumelo ni lizrandzru lesvipfaka ku Kriste Yesu.
14 Bekisa minchumu leminene leyi utamelisiwiki yone hi moya wa kuxwenga, lowutsrhamaka makazri kwezru.
15 Wasvitiva lesvaku hinkwavu vavanuna va le xifundzrankulu xa le Azya vafambi vandzrisiya vusvanga, kupatsra na Filego na Hermoxjeni.
16 Afa ndzrinavelela ndangu wa ka Onezifro lesvaku Hosi yingawutsretsrelela, hikusa andzripepisi mbilu kunyingi, nakone angachukanga adana hi mhaka ya timpencana leti ndzringatsrimbeleliwa ha tone abohelweni.
17 Kambe, enakutlhasa le Roma, afambi andzrijuletela hi xiviti akota andzrikuma.
18 Afa ndzrimunavelela lesvaku Hosi yingamukomba timpsalu amahlweni ka Yehovha asikwini ledzro. Nakone wene wamitiva mintizro hinkwayu leyi amiyenciki le Efesa.