-
1 Timotewu 6
1 Kujuleka lesvaku lavanga hansi ka ntizro wa wukazrawa vavona vinyi va vone svanga lavafaneliwaka hi xichavu hinkwaxu, kuyencela lesvaku kungachuki kuzrukiwa vito dzra Xikwembu Nkulukumba ni dondzro yakwe.
2 Ni lava vinyi vavu vanga vapfumeli avafanelanga kuvayeyisa hilesvi vanga vamakwavu. Kambe, amatsrhan’wini ya lesvo, vafanela kuvatizrela hi nkhinkhi, hikusa lavapfunekaka hi ntizro wavu lowunene i vapfumeli lavazrandzrekaka. Vadondzrise minchumu leyi, uvatsratsriya.
3 Loko mhunu wa kukazri adondzrisa dondzro yin’wana nakone angapfumelelani ni dondzro leyinene, leyipfaka ku Hosi yezru, Yesu Kriste, nambi ni dondzro leyitwananaka ni vutomi bza kuchava Xikwembu Nkulukumba,
4 awatikukumuxa nakone angatwisisi nchumu; kambe avabza hi kuphikisana ni kudokadokisana hi mazritu, minga minchumu lemivangaka matsrhoho, kuholovisana, mahlevo, kulavisana hi tihlo dzra ndzrololo,
5 kutsrhama hi kulwa hi minchumu ya kuka minganyawuli amakazri ka vhanu lavahonekiki miyanakanyu ni lavatsroniwiki xihlayelamfuzri, lavayanakanyaka lesvaku vutomi bza kuchava Xikwembu Nkulukumba i ndlela ya kukuma bindzru.
6 Ina, vutomi bza kuchava Xikwembu Nkulukumba ni kunyonxa hi lesvi mhunu anga nasvu i bindzru dzrikulu.
7 Hikusa ahitanga na nchumu amisaveni, nakone mfuzri hingatizrwala nchumu hifamba nawu.
8 Xilesvo, loko hi ni svakuda ni sva kuyambala, hitaku svosvo i svinyingi.
9 Kambe lavajulaka kuva svipfundzri vawela ndzringweni ni le ntlhan’wini, ni le kunaveleni kunyingi loka kumphunta ni lokudlayisanaka, lokupetaka vhanu akhombzeni ni le kufeni.
10 Hikusa kuzrandzra mali i limitsru dzra hinkwasvu sva kubiha, nakone hi kukulandzrelela, van’we vawongekile vahuma alipfumelweni, nakone vatitlhaveteli hi svivavu.
11 Nambitanu, wene mhunu wa Xikwembu Nkulukumba, tsrutsruma minchumu leyo; nakone landzrelela vululami, vutomi bza kuchava Xikwembu Nkulukumba, lipfumelo, lizrandzru, kutiyisela ni kunabzala.
12 Lwana yimpi leyinene ya kulwela lipfumelo. Khoma svitiya avuton’wini lebzingahelikiki lebzi uvitaneliwiki bzone uva utihlayela ha bzaku lesvaku wapfumela amahlweni ka timboni letinyingi.
13 Amahlweni ka Xikwembu Nkulukumba, lweyi abekisaka hinkwasvu svihanya, na Kriste Yesu, lweyi, svanga mboni, abekiki vumboni lebzinene alivaleni amahlweni ka Pontiyu Pilatu, ndzrikuzruma lesvi:
14 Bekisa xileleto na unge na bati ni dzritsrongo kumbe nchumu wa kusoliwa ha wone kuyatlhasa ankameni wa kuhumelela ka Hosi yezru Yesu Kriste,
15 lesvi svitakakombekisiwa hi nkama wa kone hi Mufumi wa mun’we ntsena lwatlakukiki ni lwanyonxiki, yene lwanga Hosi ya tihosi ni Mufumi wa vafumi,
16 anga yene ntsena lwakalaka angafi, lwatsrhamaka alivaningweni ledzrikaka dzringatsrhindzrekeleki, lweyi kungeke na mhunu ni mun’we lwasamiki amuvona kumbe lwangamuvonaka. Aadzrumisiwe hilesvi afaneliwaka hi xichavu ni ntamu lowungahelikiki! Amen.
17 Leleta lavanga svipfundzri amisaveni ya svosvi lesvaku vangatitlakuxi nakone vangadumbi vukosi lebzingatiyangakiki, kambe vadumba Xikwembu Nkulukumba, lweyi ahihananaka hi kuhindzrahindzra hinkwasvu lesvi hisvivilelaka akuva hinyonxa.
18 Vabzele lesvaku vatikazratela kuyenca lesvinene, vava lavataliki hi mintizro leminene, vazrandzra kuhanana, vatsrhama na vatilulamiseli kuyavelana minchumu yavu ni van’wana,
19 vatibekela masungulu lamanene ya nkama lowutaka, akuva vatakota kukhomelela ku lesvinga vutomi bza xihlayelamfuzri.
20 Timotewu, bekisa lesvi utamelisiwiki svone, ufambela kule ni mazritu ya kukala mpfumawulu lamanyamisaka lesva kuxwenga, ni kuphikisana ka lesvi vhanu vahembaka vaku i “vutivi”,
21 lebzi hi kujula kutikulisa ha bzone, van’we vahambukiki alipfumelweni. Hinkwenu ndzrin’winavelela vumbilu.