BRX

1   Kambe moya wusvibeka alivaleni lesvaku aminkameni ya vugamu, van’we vatahuma alipfumelweni, vayingiseta vhanu lavahleveliwaka hi mimoya ya madzrimi ni tidondzro ta mademona,

2   hi kola ka vukanganyisi bza vhanu lavavulavulaka madzrimi, lava lipfalu dzravu dzrihisiwiki hi nsimbi akuva vangahatwi nchumu.

3   Vatsimbisa kutekana vatlhela valeleta vhanu lesvaku vangadi svakuda lesvi Xikwembu Nkulukumba asvitumbuluxiki akuva svidiwa hi kukhensa hi lavanga ni lipfumelo ni lavativaka xihlayelamfuzri.

4   Hikusa hinkwasvu lesvitumbuluxiwiki ha Xikwembu Nkulukumba i svinene, mfuzri aku na nchumu lowufanelaka kudzreliwa loko wuyamukeliwa hi kukhensa,

5   hikusa wuxwengisiwa hi zritu dzra Xikwembu Nkulukumba ni xikhongoto.

6   Loko ulayisa xilesvi vamakwezru, utava mutizreli lwenene wa Kriste Yesu, lwawundliwiki hi mazritu ya lipfumelo ni ya dondzro leyinene leyi ubuyaka na uyilandzra hi le kusuhi.

7   Kambe dzrela svihitana lesvinyamisaka minchumu ya kuxwenga, sva kufana ni lesvithiwaka hi svikoxana sva xisati. Amatsrhan’wini ya lesvo, titolovete kuhanya hi kuchava Xikwembu Nkulukumba.

8   Hikusa kutoloveta mizri svapfuna kutsrongonyana, kambe kuhanya hi kuchava Xikwembu Nkulukumba svipfuna aminchun’wini hinkwayu, hikuva svinyikana xidumbiso xa kuva ni vutomi bza nkama wa svosvi ni bza lowutaka.

9   Mazritu lawo madumbeka nakone mafaneliwa hi kukholwiwa svinene.

10   Kunene, hi yo mhaka yoleyo hikumekaka na hitizra hi ntamu hiva hitikazrata svinene, hikusa hibeki kulavisela kwezru ku Xikwembu Nkulukumba lwahanyaka, lwanga Muhuluxi wa vhanu va matsrhamela hinkwawu, ngopfungopfu lava kudumbeka.

11   Valelete minchumu leyi utlhela uvadondzrisa.

12   Ungatsrhike mhunu akuyeyisa hilesvi unga mumpsha. Amatsrhan’wini ya lesvo, bekela vapfumeli xikombiso lexinene ku mavulavulela, mahanyela, lizrandzru, lipfumelo ni kubasa.

13   Na ndzringasitlhasa, tihite akudondzreleni ka vhanu Matsralwa, akutsratsriyeni ni le kudondzriseni.

14   Ungayilolohele nyiko leyi unga nayu, leyi unganyikiwa yone hi vuprofeta, loko huvo ya vakulu yikutlhanteki mavoko.

15   Yanakanyisisa hi minchumu leyi; ukhomeka ha yone, lesvaku kuya kwaku amahlweni kuvoneka amahlweni ka vhanu hinkwavu.

16   Tilavisise ha hombe ni madondzrisela yaku. Tiyisela ku minchumu leyi, hikusa hi kuyenca lesvi, utatihuluxa, uhuluxa ni lavakuyingisetaka.