BRX

1   Zritu ledzri dzradumbeka, ledzriliki: Loko mhunu anavela kuva mulaviseli, anavela ntizro lowunene.

2   Xilesvo, mulaviseli afanela kuva lwangasolekikiki, ava nuna wa nsati mun’we ntsena, ava lwatikhomaka, ava ni miyanakanyu lemitizraka ha hombe, ava lwabekisekiki, azrandzra kuyamukela vayeni, akota kudondzrisa,

3   angavi lwazrandzraka bzala, angavi wa kubanana, kambe ava mhunu wa kunabzala, angazrandzri timholova, angazrandzri mali,

4   ava lwazrangelaka ha hombe ndangu wakwe hi ntshima, lwanga ni vana lavatibekaka hansi hi xinthunzi hinkwaxu,

5   (hikusa loko mhunu angasvitivi kuzrangela ndangu wakwe hi ntshima, xana atadzribekisisa kuyini bandla dzra Xikwembu Nkulukumba?),

6   angavi lweyi angandzruluka mukriste svosvinyana, kuyencela lesvaku angachuki atikukumuxa awela kuyavanyisiweni loku Diyavulosi angakukuma.

7   Handle ka lesvo, afanela kutiviwa hi minchumu leminene hi vhanu va le handle, akuva angachuki awela tinganeni ni le ntlhan’wini wa Diyavulosi.

8   Hi ndlela leyifanaka, vatizreli vafanela kuva vhanu lavanga ni xinthunzi, vangahembi, vangazrandzri kunwa ngopfu bzala, vangavi lavazrandzraka mali ya kuyikuma hi kukanganyisa,

9   vava lavativaka kubekisa xihundla xa lipfumelo hi lipfalu ledzribasiki.

10   Nangweso, avazrange hi kukambiwa, antsrhaku vayenciwa vatizreli, loko kunge na nchumu lowu vasoliwaka ha wone.

11   Na vone vavasati vafanela kuva lavanga ni xinthunzi, vangazrandzri kuhleva, vatikhoma, vadumbeka atimhakeni hinkwatu.

12   Mutizreli kujuleka ava nuna wa nsati mun’we ntsena, azrangela ha hombe vanakwe ni ndangu wakwe hi ntshima.

13   Hikusa lavayenciki ha hombe ntizro wa mutizreli vatinyika ndhuma leyinene nakone vakota kuvulavula na vangatilumalumi hi lipfumelo ledzringa ku Kriste Yesu.

14   Ndzrikutsralela timhaka leti na ndzridumba lesvaku ndzritakubuyela kunge kungani,

15   kambe loko ndzrichuka ndzrihlwela, utativa lesvi ufanelaka kuhanyisa xisvone andlwini ya Xikwembu Nkulukumba, dzringa bandla dzra Xikwembu Nkulukumba lwahanyaka, nsika ni xiseketelo xa xihlayelamfuzri.

16   Nakone mpela, xihundla lexi xa vutomi bza kuchava Xikwembu Nkulukumba i xikulu: ‘Ahumeleli hi tlhelo dzra nyama, ahlayiwa lwalulamiki hi tlhelo dzra moya, avoniwa hi tintsrumi, ahuweleliwa amatikweni, apfumeliwa amisaveni, ayamukeliwa hi kuphatima.’