-
2 Vatesalonika 3
1 Hi vugamu, vamakwezru, hikombelelani hi svikhongoto, akuva zritu dzra Yehovha dzrikota kuhangalaka hi kuhangwesa dzritlhela dzriphatimisiwa, svanga hesvi svinga xisvone ni le ku n’wine,
2 ni kuva hikota kuhuluxiwa amavokweni ya vhanu va kufelana mona ni lava kubiha, hikusa ahi hinkwavu vanga ni lipfumelo.
3 Kambe Hosi yadumbeka, nakone yitan’witiyisa yiva yin’wimpfenkela ku Lwemfani.
4 Nakone hi ni kudumba amahlweni ka Hosi mayelanu na n’wine, lesvaku lesvi hin’wileletaka svone n’wasvilandzra nakone n’witaya amahlweni n’wisvilandzra.
5 Afa hinavela lesvaku Hosi yingakongomisa timbilu tenu alizrandzrwini dzra kuzrandzra Xikwembu Nkulukumba ni le kutiyiseleni hi mhaka ya Kriste.
6 Kutani, vamakwezru, hin’wileleta lesvi hi vito dzra Hosi yezru Yesu Kriste: Tsrhindzrekani kule ni makwezru wini na wini lwanga ni mahanyela ya xiyeyisu, lwangalandzrikiki mukhuva lowu n’wiwukumiki ku hine.
7 Hikusa n’wine hi ntshima n’wasvitiva lesvi n’wifaneliki kuhitekelelisa xisvone, hikusa ahavanga na mahanyela ya xiyeyisu amakazri kwenu,
8 nakone ahidanga svakuda sva mhunu mahala, kambe, hi kutizra hi nkhinkhi ni kutihita, afa hitizra vusiku ni nhlikanhi akuva hingabindzriseli mhunu ni mun’we amakazri kwenu,
9 na svingahlayi svone lesvaku ahi nayu mfanelo, kambe hi lesvaku hine hi ntshima afa hijula kun’wibekela xikombiso akuva n’witahitekelela.
10 Hikuva, ankama lowu afaka hehe na n’wine, afa hitekisa kun’wileleta, hiku: “Loko mhunu wa kukazri angajuli kutizra, ni kuda angade!”
11 Hikusa hiyingela lesvaku van’we va ni mahanyela ya xiyeyisu amakazri kwenu; avatizri nchumu ni wutsrongo, kambe vatsrhama hi kutinhingenisela ku lesvingavalumbikiki.
12 Kutani vhanu volavo hivaleleta hitlhela hivatsratsriya hi vito dzra Hosi Yesu Kriste lesvaku avatizre na vamiyelile vava vada svakuda lesvi vekesvitizrela.
13 Kambe n’wine, vamakwezru, n’wingakazraleni hi kuyenca lesvinene.
14 Kambe loko mhunu wa kukazri angayingiseti zritu ledzri dzra ka kwezru ledzri hidzrizrumelaka hi papela, mufungani n’wimutsrhiketa vusvakwe, akuva atabiwa hi tingana.
15 Kambe n’wingamuyenceni ingiki i nala, kambe tsrhamani hi kumulaya svanga makwenu.
16 Kutani afa hinavela lesvaku ingiki Hosi ya kuzrula hi ntshima yingan’winyika kuzrula nkama hinkwawu hi tindlela hinkwatu. Hosi ayive na n’wine hinkwenu.
17 Hi lawa madzrungula yanga, mine Pawlu, hi voko dzranga hi ntshima, anga lesvi ndzrifungaka ha svone mapapela yanga hinkwawu. Hi svosvi ndzritsralisaka xisvone.
18 Vumbilu bza Hosi yezru Yesu Kriste abzive na n’wine hinkwenu!