-
Yohani 18
1 Loko aheti kuhlaya mazritu lawa, Yesu ahuma ni vadondzrisiwa vakwe vatsremakanya ximfulana xa Kidroni, lomu afaka ku ni xizramba, atlhasa anhingena kone ni vadondzrisiwa vakwe.
2 Kutani Yuda, lweyi afaka ajula kumudlayisa, na yene afa awutiva mbangu lowo, hikusa Yesu afa atalisa kutlhangana kone ni vadondzrisiwa vakwe.
3 Kutani Yuda ateka ntlawa wa masocha ni valaviseli lavatsrongo va vaprista lavakulu ni va vafarisi, vabuya na vatameli svisa ni mimotsre ni matlhazri.
4 Kutani Yesu, hi kutiva hinkwasvu lesvi afaka svijula kumuyencekela, ahumelela amahlweni, aku ku vone: “N’wijula mani?”
5 Vamuhlamula, vaku: “Yesu wa le Nazareta.” Yesu aku ku vone: “Hi mine.” Kutani Yuda, lweyi angamunyikela, na yene afa ayimi navu.
6 Kutani, loko Yesu aku ku vone: “Hi mine”, vatlhelela ntsrhaku vawa ahansi.
7 Kutani atlhela avavutisa, aku: “N’wijula mani?” Vaku ku yene: “Yesu wa le Nazareta.”
8 Yesu ahlamula, aku: “Ndzrin’wibzelile ndzriku hi mine. Kutani loko n’wijula mine, tsrhikani lava vafamba.”
9 Lesvo sviyenceki akuva kuhetiseka lesvi angasvihlaya, aku: “Ku lava undzrinyikiki vone, anga kone ni mun’we wa vone angandzrilahlekela.”
10 Kutani Simoni Petrosi, lweyi afaka a ni lipanga, adzrihlomula aba nandzra wa muprista lwenkulu, amutsrema ndleve ya xinene. Kutani vito dzra nandzra wa kone afa ali Malkusi.
11 Kutani Yesu aku ku Petrosi: “Beka lipanga ankotlotweni wa dzrone. Xana andzrifanelanga kunwa xinwelo lexi Tatana andzrinyikiki xone?”
12 Kutani masocha ni ndzruna ya masocha ni valaviseli lavatsrongo va vayuda vakhoma Yesu vamutsrimba.
13 Vamuyisa ku Anasi kusungula, hikuva afa ali tatana wa nsati wa Kayafasi, lweyi afaka ali muprista lwenkulu alembeni ledzro.
14 Kayafasi wa kone hi lweyi angalaya vayuda lesvaku afa vatapfuneka loko mhunu mun’we afela tiko.
15 Kutani Simoni Petrosi afa alandzrelela Yesu na a ni mudondzrisiwa mun’wana. Kutani lesvi mudondzrisiwa lwemun’wana afaka ativana ni muprista lwenkulu, na yene anhingeni na Yesu amutini wa muprista lwenkulu,
16 kambe Petrosi afa ayimi ahandle anyangweni. Kutani mudondzrisiwa lwemun’wana, lweyi afaka ativana ni muprista lwenkulu, ahuma ayakanela ni nhwanyana wa xitizri lweyi afaka avonelela nyangwa, agama anhingenisa Petrosi.
17 Kutani nhwanyana wa xitizri lweyi afaka avonelela nyangwa aku ku Petrosi: “Ahi wene mun’we wa vadondzrisiwa va lwe wanuna?” Aku: “Ahi mine.”
18 Kutani malandzra ni valaviseli lavatsrongo afa vayimi amatlhelweni ka mbawula leyi afaka vayitlhavikile, hikusa afa kutitimeta nakone afa vali kazri vawozra. Petrosi na yene afa ayimi navu awozra.
19 Kutani muprista lwenkulu athethisela Yesu hi vadondzrisiwa vakwe ni dondzro yakwe.
20 Yesu amuhlamula, aku: “Ndzrikaneli ni misava alivaleni. Minkama hinkwayu ndzridondzrisi asinagogeni ni le tempeleni, lomu vayuda hinkwavu vatlhanganaka kone, nakone andzrihlayanga nchumu axihundleni.
21 Undzrivutisela yini? Vutisa lavayingeliki lesvi ndzringavabzela. Hi lavayani. Vasvitiva lesvi ndzrisvihlayiki.”
22 Kutani loko ahlayi lesvo, mun’we wa valaviseli lavatsrongo lweyi afaka ayimi atlhelweni aba vuso bza Yesu hi mpama, aku: “Hi svosvi uhlamulisaka xisvone muprista lwenkulu?”
23 Yesu amuhlamula, aku: “Loko ndzrivulavuli kubiha, hlaya lesvaku vubihi bza kone hi bzini; kambe loko ndzrivulavuli svone, undzribela yini?”
24 Kutani Anasi amuzrumela na atsrimbiwile ku Kayafasi, muprista lwenkulu.
25 Ankama lowo, Simoni Petrosi afa ayimi kolahaya awozra ndzrilo. Kutani van’we vaku ku yene: “Ahi wene mun’we wa vadondzrisiwa vakwe?” Ayala, aku: “Ahi mine.”
26 Mun’we wa malandzra ya muprista lwenkulu, lweyi afaka ali xaka dzra lweyi Petrosi angamutsrema ndleve, aku: “Andzrikuvonanga wene na uli naye axizrambeni?”
27 Kutani Petrosi atlhela ayala. Kunge kungani nkuku woyimba.
28 Kutani vahumexa Yesu ku Kayafasi vamuyisa amutini wa vuhosi. Ankama lowo, kutani afa wuli mpundzru. Kambe vone avanhingenanga amutini wa vuhosi, akuva vangatinyamisi lesvaku vatakota kuda Paxkwa.
29 Kutani Pilatu ahuma ayakanela na vone, aku: “N’wikhala ha yini hi lwe wanuna?”
30 Vamuhlamula, vaku: “Loko lwe wanuna afa ange mubihi, inha hingamutisanga ku wene.”
31 Kutani Pilatu aku ku vone: “Mutekani n’wine n’wiyamuyavanyisa hi kulandzra nawu wenu.” Vayuda vaku ku yene: “Nawu awuhipfumeleli kudlaya mhunu.”
32 Lesvi sviyenceki akuva kuhetiseka zritu ledzri Yesu adzrihlayiki kukomba mafela lawa afaka atafa ha wone.
33 Kutani Pilatu atlhela anhingena amutini wa vuhosi avitana Yesu, aku ku yene: “U hosi ya vayuda wene?”
34 Yesu ahlamula, aku: “Lesvi usvihlayaka svisukela kwaku kumbe i van’wana vangakubzela ha mine?”
35 Pilatu ahlamula, aku: “Ndzrova muyuda mine? Tiko dzrenu ni vaprista lavakulu hi vone vangakutisa kwanga. Weyenca yini?”
36 Yesu ahlamula, aku: “Mfumu wanga ahi wa misava leyi. Loko mfumu wanga afa wova wa misava leyi, malandzra yanga inhaka mandzrilwelile lesvaku ndzringanyiketiwi ku vayuda. Kambe ke, mfumu wanga ahi wa lomu.”
37 Kutani Pilatu aku ku yene: “Sviliki u hosi ka?” Yesu ahlamula, aku: “Hi wene uhlayaka ha bzaku lesvaku ndzri hosi. Ndzripsaleliwi svosvo, nakone ndzribuyeli svosvo la misaveni, akuva ndzritabekela xihlayelamfuzri vumboni. Mani na mani lwayimaka ni xihlayelamfuzri ayingiseta zritu dzranga.”
38 Pilatu aku ku yene: “Xihlayelamfuzri i yini?” Loko ahlayi lesvo, atlhela ahuma ayakanela ni vayuda, aku ku vone: “Andzrikumi nandzru ku yene.
39 Kambe n’wine n’wi ni xihena xa kuva ndzrin’wintsrhunxela mun’we hi Paxkwa. Kutani ke, n’wasvijula kuva ndzrin’wintsrhunxela Hosi ya vayuda?”
40 Kutani vatlhela vabandlukana vaku: “Lweyo ahimujuli; hijula Barabasi!” Barabasi wa kone afa ali xigevenga.