-
Yohani 3
1 Kutani afa ku ni mun’we wanuna lweyi afaka ali xizro xa vafarisi lweyi afaka avitaniwa Nikodema. Afa ali mun’we wa vazrangeli va vayuda.
2 Ayeli Yesu ni vusiku, aku ku yene: “Rabbi, hasvitiva lesvaku u mudondzrisi lwazrumiwiki ha Xikwembu Nkulukumba, hikusa anga kone lweyi angakotaka kuyenca mahlolana lawa umayencaka na Xikwembu Nkulukumba ange naye.”
3 Yesu amuhlamula, aku: “Ndzrihlayela mfuzri ndzrili ku wene: Loko mhunu angapsaliwi dzra vubizri, angaka angawuvoni Mfumu wa Xikwembu Nkulukumba.”
4 Nikodema aku ku yene: “Xana mhunu angapsalisiwa kuyini na ali nkulu? Svili angatlhela anhingena akhuzrini dzra mamana wakwe, atlhela apsaliwa?”
5 Yesu ahlamula, aku: “Ndzrihlayela mfuzri ndzrili ku wene: Loko mhunu angapsaliwi hi mati ni moya, angaka anganhingeni amfun’wini wa Xikwembu Nkulukumba.
6 Lesvipsaliwiki hi nyama i nyama, ni lesvipsaliwiki hi moya i moya.
7 Ungahlamale hilesvi ndzrikubzeliki ndzriku: Kujuleka n’wipsaliwa dzra vubizri.
8 Moya wuhunga wuya lomu wukujulaka, kutani uyingela mpfumawulu wa wone, kambe awukutivi lomu wubuyaka hi kone ni lomu wuyaka kone. Svi xitanu ku mani na mani lwapsaliwiki hi moya.”
9 Nikodema amuhlamula, aku: “Svingakotekisa kuyini svolesvo?”
10 Yesu ahlamula, aku: “U mudondzrisi wa Yisrayele nakuve awutitivi timhaka leti?
11 Ndzrihlayela mfuzri ndzrili ku wene: Hine hikanela lesvi hisvitivaka, hitlhela hibekela vumboni minchumu leyi himivoniki; kambe n’wine an’wiyamukelanga vumboni bzezru.
12 Lesvi ndzrikubzeliki minchumu ya la misaveni kambe ungakholwi, utamikholwisa kuyini loko ndzrokubzela minchumu ya le tilweni?
13 Nangweso, aku na mhunu lwasamiki atlhantukela atilweni handle ka lweyi axikiki hi le tilweni, anga N’wana wa Mhunu.
14 Nakone svanga hesvi Moxe ahayekiki nyoka amananga, na ye N’wana wa Mhunu kujuleka ahayekisiwa xisvosvo,
15 lesvaku mani na mani lwapfumelaka ku yene akuma vutomi lebzingahelikiki.
16 “Hikuva Xikwembu Nkulukumba azrandzri misava sva kunhasi, lakakuva anyikela N’wanakwe lwapsaliwiki vusvakwe, akuva mani na mani lwapfumelaka ku yene angasuvi, kambe ava ni vutomi lebzingahelikiki.
17 Hikuva Xikwembu Nkulukumba angazrumelanga N’wanakwe amisaveni akuva ayavanyisa misava, kambe lesvaku misava mihuluxiwa ha yene.
18 Lweyi apfumelaka ku yene angayavanyisiwi. Lweyi angapfumelikiki ku yene kutani ayavanyisiwile, hikusa angapfumelanga ku vito dzra N’wana wa Xikwembu Nkulukumba lwapsaliwiki vusvakwe.
19 Kutani xivangelo xa kuyavanyisiwa loku hi lexi: Hi lesvaku livaningo dzritile amisaveni, kambe vhanu vazrandzri munyama amatsrhan’wini ya livaningo, hikuva mintizro yavu mibihile.
20 Hikuva lweyi ayencaka minchumu ya kubiha awadzrinyenya livaningo mfuzri angabuyi alivaningweni, akuva mintizro yakwe mingatisoliwa.
21 Kambe lweyi ahanyaka hi kulandzra xihlayelamfuzri abuya alivaningweni, akuva svitavoneka lesvaku mintizro yakwe miyenciwa hi kutwanana ni kuzrandzra ka Xikwembu Nkulukumba.”
22 Antsrhaku ka lesvi, Yesu ni vadondzrisiwa vakwe vanhingeni atikweni dzra Yudeya, lomu ahetiki nkamanyana navu, ava ababatisa.
23 Kambe Yohani na yene afa ababatisa le Ayenoni kusuhi na Salimi, hikusa kone mati afa mali manyingi, kutani vhanu afa vayetetela vayababatisiwa;
24 hikuva Yohani afa angasipetiwa abohelweni.
25 Kutani kupfuka mholova amakazri ka vadondzrisiwa va Yohani ni muyuda mun’we hi mhaka ya mukhuva wa kutibasisa.
26 Lesvi vabuyeliki Yohani, vaku ku yene: “Rabbi, phela mhunu lweyi afaka ali na wene halahaya ka Yordani, lweyi umubekeliki vumboni, ababatisa vhanu nakone hinkwavu vayetetela ku yene.”
27 Yohani ahlamula, aku: “Mhunu angeyamukeli nchumu ni wa wun’we na anganyikiwanga wone kusukela atilweni.
28 N’wine ha bzenu n’wi timboni tanga ta lesvaku ndzriti: ‘Ahi mine Kriste, kambe ndzrezrumiwa amahlweni kwakwe.’
29 Lweyi anga ni mutekiwa i muteki. Kambe nakulobze wa muteki, loko ayima amuyingela, atsrhava ngopfu svinene hi mhaka ya zritu dzra muteki. Xilesvo kutsrhava kwanga kuhelelile.
30 Yene afanela kuyengeteleka, kambe mine ndzrifanela kupumbeka.”
31 Lweyi abuyaka hi le henhla atlula hinkwavu. Lweyi abuyaka hi la misaveni abuya hi la misaveni nakone avulavula sva la misaveni. Lweyi abuyaka hi le tilweni atlula hinkwavu.
32 Akanela hi minchumu leyi ekemivona ni kumiyingela, kambe aku na mhunu ayamukelaka vumboni bzakwe.
33 Lweyi ayamukeliki vumboni atiyisi lesvaku Xikwembu Nkulukumba a ni xihlayelamfuzri.
34 Hikuva lweyi Xikwembu Nkulukumba amuzrumiki avulavula mazritu ya Xikwembu Nkulukumba, hikuva angafeleli loko ahanana moya wakwe.
35 Tatana azrandzra N’wanakwe nakone abeki minchumu hinkwayu avokweni dzrakwe.
36 Lweyi apfumelaka ku N’wana a ni vutomi lebzingahelikiki; lweyi ayalaka kuyingiseta N’wana angatibzivona vutomi, kambe mahlundzru ya Xikwembu Nkulukumba matsrhama ahenhla kwakwe.