BRX

1   Katiloko Yesu alavisa, avona svipfundzri na svipetetela svihananu sva svone amabokisini ya vukosi bza tempele.

2   Agama avona mun’we wa mufelwa wa xisiwana na apeta minkinyenta mibizri.

3   Kutani aku: “Ndzrihlayela mfuzri ndzrili ku n’wine: Lwewa mufelwa wa xisawana apeti svinyingi kutlula lava hinkwavu.

4   Hikusa lava hinkwavu vapeti svihananu ku lesvi vasvipambuliki ku lesvingavatalela, kambe lwewa mufelwa, andzreni ka vusiwana bzakwe, apeti hinkwasvu lesvi afaka adumba kuhanya hi svone.”

5   Kutani loko van’we vavulavula hi tempele, hi ndlela leyi dzringaxongiseliwa ha yone hi mazribze ya kudula ni hi minchumu leminganyikiwa Xikwembu Nkulukumba, aku:

6   “Mayelanu ni lesvi n’wisvivonaka, mata masiku lawa kungatikisala zribze ahenhla ka zribze na dzringahohlotiwanga.”

7   Kutani vamuvutisa, vaku: “Mudondzrisi, xana lesvi svitayenceka dzrini, nakone xitava xini xikombiso xa lesvaku svijula kuhumelela?”

8   Aku: “Tivonelani lesvaku n’wingalahlekisiwi, hikusa vanyingi vatabuya hi vito dzranga, vaku ‘Hi mine’ kumbe ‘Nkama wutsrhindzrekelile.’ N’wingavalandzreni.

9   Nakone loko n’wiyingela madzrungula ya tiyimpi ni madzolonga, n’wingatsremekeni nhlana; hikusa lesvo svifanela kuzranga sviyenceka, kambe vugamu bzingatitekela kutlhasa.”

10   Agama aku ku vone: “Tiko dzrin’we dzritapfukela tiko dzrin’wana, ni mfumu wun’we wutapfukela wun’wana.

11   Nakone kutava ni kutsrekatsreka lokukulu ka misava, ni tindlala ni mintungu ku mimbangu ya kuhambanahambana; kutatlhela kuva ni svivoniso lesvichavisaka atilweni ni svikombiso lesvikulu.

12   “Kambe na lesvo hinkwasvu svingasihumelela, vhanu vatan’wikhoma van’wixanisa, van’winyiketa amasinagogeni ni le mabohelweni, van’wiyisa ku tihosi ni vafumi hi mhaka ya vito dzranga.

13   Lesvi svitan’wipfuna kunyikela vumboni.

14   Xisvosvo, atimbilwini tenu, tibzelani lesvaku akujuleki kululamisela mazritu ya kumahlaya akuva n’witilwela loko n’withethisiwa,

15   hikusa ndzritan’winyika mazritu ni vutlhazri lesvi valala venu hinkwavu vangatikikota kulwa na svone kumbe kusvihlamula.

16   Nakone n’witadlayisiwa hi vapsele venu, nambi hi vamakwenu ni maxaka ni vanghanu; mfuzri van’we va n’wine vatavadlaya,

17   nakone n’witavengiwa hi vhanu hinkwavu hi mhaka ya vito dzranga.

18   Kambe nambi nsisi wun’we lowunga tinhlokweni tenu wungaka wungalovi.

19   N’witahuluxa vutomi bzenu hi kutiyisela kwenu.

20   “Kambe, loko n’wivona Yerusalema na atsrandzriyeliwi hi masocha lamadzimiki minxaxa, svitivani ke, lesvaku kesala kutsrongo akuva ahelisiwa asala hi mazrumbi.

21   Kutani lavanga Yudeya avatsrutsrume vaya atinhaveni, ni lavanga ndzreni kwakwe avasuke, ni lavanga masin’wini vangahatlhele vanhingena andzreni kwakwe,

22   hikuva lawa i masiku ya kudzrihisela akuva kuhetiseka hinkwasvu lesvitsraliwiki.

23   Va ni khombo dzrikulu sva kunhasi vavasati lavanga ni tinyimba ni lavayan’wisaka amasikwini lawo! Hikusa kutava ni kukazrateka lokukulu atikweni ni mahlundzru ahenhla ka tiko ledzri.

24   Kutani vatatsremiwa hi lipanga vafa, vatlhela vakhomiwa vayisiwa amatikweni hinkwawu; kutani Yerusalema atakandzreteliwa hi matiko kuko kutlhangana minkama lemibekisiwiki ya vamatiko.

25   “Nakone kutava ni svikombiso adambzini, ni le hwetini, ni le tinyeletini; kutani matiko matatalataleka amisaveni, mangaxitivi ni xa kuxiyenca hi mhaka ya kudzruma ka lwandle ni kulebza ka mavimbi ya dzrone.

26   Vhanu vatatitivala hi kuchava ni kulavisela lesvitakayenceka amisaveni, hikusa mintamu ya matilo mitatsrekatsrekisiwa.

27   Kutani hi nkama lowo vatavona N’wana wa Mhunu na abuya hi tlavi, na a ni ntamu ni kuphatima lokukulu.

28   Kutani loko minchumu leyi misungula kuyenceka, wololokani, n’witlakuxa tinhloko tenu, hikuva kuhuluxiwa kwenu ku kusuhi.”

29   Agama avahambela xifananiso xifaniso, aku: “Lavisani nkuwa ni mizri hinkwayu.

30   Loko misungula kuhluka makamba, n’witekela kusvivona n’witlhela n’wisvitiva lesvaku malanga ma kusuhi.

31   Hi ndlela leyifanaka, na n’wine, loko n’wivona minchumu leyi mihumelela, svitivani lesvaku Mfumu wa Xikwembu Nkulukumba wu kusuhi.

32   Ndzrihlayela mfuzri ndzrili ku n’wine: Lixaka ledzri dzringaka dzringaheli na kungasihumelela lesvi hinkwasvu.

33   Tilo ni misava svitanyamalala, kambe mazritu yanga mangaka manganyamalali.

34   “Kambe tivonelani lesvaku timbilu tenu tingachuki tibindzriwa hi kuda ni kunwa kutlula mpimu, ni kuhlatiyela hi sva vutomi, kutani siku ledzro dzrin’wichuketa,

35   kufana ni ntlhamu. Hikusa dzritawela hinkwavu lavahanyaka amisaveni hinkwayu.

36   Xilesvo, tsrhamani na n’wivonelela, na n’wihamba svikhongoto nkama hinkwawu akuva n’wikuma ntamu wa kuhuluka ku minchumu leyi hinkwayu lemifanelaka kuyenceka, ni kuyima amahlweni ka N’wana wa Mhunu.”

37   Kutani kusukela amixweni kuya amadambzeni afa ahamba adondzrisa atempeleni, asuka avusikwini ayatsrhama anhaveni leyivitaniwaka Nhava ya Minhlwazri.

38   Kutani vhanu hinkwavu afa vahamba vamuyela atempeleni na wehe mixo svinene akuva vayamuyingela.