BRX

1   Agama avahambela xifananiso xa kukomba ndlela leyi svijulekaka ha yone kuva vakhongota minkama hinkwayu na vangakazrali,

2   aku: “Adoropeni dzra kukazri afa ku ni muyavanyisi lweyi afaka angamuchavi Xikwembu Nkulukumba, nambi hi mhunu afa ange na mhaka na yene.

3   Nakone adoropeni dzra kone afa ku ni mun’we wa mufelwa lweyi afaka ahamba amuyela, ayaku: ‘Ndzrilamulele ku nala wanga.’

4   Kutani kuhele nkamanyana na angasvijuli, kambe antsrhaku hi le ndzreni ka mbilu ati: ‘Andzrimuchavi Xikwembu Nkulukumba, ni mhunu andzri na mhaka na yene,

5   kambe lesvi lwewa mufelwa atsrhamaka hi kundzrikazrata, ndzritamulwela akuva atatsrhika kubuyetela atatandzrisvawula.’”

6   Kutani Hosi yiku: “Yingelani lesvi lwewa muyavanyisi asvihlayiki, nambilesvi abihiki!

7   Kutani ke, xana Xikwembu Nkulukumba angaka angalweli vahlawuliwa vakwe lavamudzrilelaka nhlikanhi ni vusiku, na avalehisela mbilu?

8   Ndzrin’wibzela lesvaku atahangwesa avalwela. Nambitanu, loko N’wana wa Mhunu atlhasa, xana kunenenene atadzrikuma lipfumelo ledzro la misaveni?”

9   Atlhela ahambela xifananiso lexi van’we lava afaka vativona na valulamile, vavona vhanu van’wana na vange va nchumu, aku:

10   “Vhanu vabizri vatlhantukeli tempeleni vayakhongota. Mun’we afa ali mufarisi kasi lwemun’wana afa ali muhakelisi wa tinemba.

11   Mufarisi atlhasa ayima akhongota, ahlaya lesvi hi le mbilwini: ‘We Xikwembu Nkulukumba, ndzrakukhensa lesvi ndzringafanikiki ni vhanu lavan’wana vayivi, vabihi, vayenci va vumbuye — kumbe nambi muhakelisi lweyi wa tinemba.

12   Ndzrititsrona svakuda kubizri hi vhiki; ndzrihumexa vukhume bza minchumu yanga hinkwayu, hi kuya hi lesvi ndzrimikumisaka xisvone.’

13   Kambe lwewa muhakelisi wa tinemba atlhasa ayima hi le kule, angasvijuli nambi kutlakuxela mahlo atilweni, kambe atibetetela xifuva, aku: ‘We Xikwembu Nkulukumba, ndzritwele vuzrombe mine mudohi.’

14   Ndzrin’wibzela lesvaku muhakelisi lweyi wa tinemba amuki akaya kwakwe na ahlayiwi mululami kutlula mufarisi lwiyani. Hikuva mani na mani lwatitlakuxaka atatsrongahatiwa, kambe lweyi atitsrongahataka atatlakuxiwa.”

15   Kutani vamubuyisela svivanana akuva asvikhumba, kambe loko vadondzrisiwa vasvivona, vavakhwavela.

16   Kambe Yesu avitana svivanana sviya ku yene, aku: “Tsrhiketani svivanana svibuya ku mine. N’wingasvisiveleni, hikusa Mfumu wa Xikwembu Nkulukumba i wa lavafanaka na svone.

17   Ndzrihlayela mfuzri ndzrili ku n’wine: Lweyi akaka angayamukeli Mfumu wa Xikwembu Nkulukumba kufana ni xin’wanana angaka anganhingeni ku wone.”

18   Kutani mun’we wa hosana amuvutisa, aku: “Mudondzrisi Lwenene, ndzrifanela kuyenca yini akuva ndzrikuma vutomi lebzingahelikiki?”

19   Yesu aku ku yene: “Undzrivitanela yini “lwenene”? Anga kone lwenene handle ka mun’we ntsena, anga Xikwembu Nkulukumba.

20   Wasvitiva svileleto lesviliki: ‘Ungambuyete, ungadlaye, ungayive, unganyikele vumboni bza madzrimi, kombisa xichavu ku tatana waku ni mamana waku.’”

21   Kutani aku: “Hinkwasvu lesvi ndzrisvilandzri kusukela vumpsheni bzanga.”

22   Loko amuyingelile, Yesu aku ku yene, “Kambe kahasali nchumu wun’we ku wene: Xavisa hinkwasvu lesvi unga nasvu uphakela svisiwana, utava ni vukosi amatilweni; ubuya undzrilandzra.”

23   Kutiloko ayingela lesvo, axukuvala ngopfu svinene, hikusa afa ali xipfundzri lexikulu.

24   Kutani loko Yesu amuvona, aku: “Svitavabindzrela sva kunhansi lavanga ni timali kunhingena amfun’wini wa Xikwembu Nkulukumba!

25   Hikuva svanabzala kuva kamela dzrinhingena hi mbhovo wa ximazri kutlula kuva mhunu lwanga xipfundzri anhingena amfun’wini wa Xikwembu Nkulukumba.”

26   Kutani lavasviyingeliki vaku: “Svone, hi mani lwangahulukaka?”

27   Aku: “Lesvingakotekikiki ku vhanu svakoteka ku Xikwembu Nkulukumba.”

28   Kambe Petrosi aku: “Lavisa, hine hitsrhiki svezru hikulandzra.”

29   Aku ku vone: “Ndzrihlayela mfuzri ndzrili ku n’wine: Anga kone lweyi atsrhikiki yindlu kumbe nsati, kumbe vamakwavu, kumbe vapsele, kumbe vana hi mhaka ya Mfumu wa Xikwembu Nkulukumba,

30   lwangatikikuma kunyingi minchumu leyo hi kuhindzrahindzra ankameni wa svosvi, atlhela akuma vutomi lebzingahelikiki amisaveni lemitaka.”

31   Agama ateka lava khume na vabizri hi tlhelo, aku ku vone: “Lavisani, svosvi hitlhantukela Yerusalema, kutani kutahetiseka hinkwasvu lesvitsraliwiki hi vaprofeta mayelanu ni N’wana wa Mhunu.

32   Hikusa atanyiketiwa ku vhanu va matiko, vatlanga hi yene, vamuxanisa, vamuthukela mazri.

33   Loko vaheti kumuba hi ntshilana, vatamudlaya, kambe atapfuka hi siku dzra vuzrazru.”

34   Kambe avasvikumanga ni kutsrongo lesvi afaka ajula kuvabzela svone, hikusa afa vafihleliwi ntlhamuxelo wa svone; xilesvo avakotanga vasvitwisisa lesvihlayiwiki.

35   Kutani ankama lowu Yesu atsrhindzrekelaka Yeriko, afa ku ni mhunu mun’we lwangavonikiki lweyi afaka atsrhami xitaratwini akombela zimole.

36   Kutani loko ayingeli vhanu va vanyingi na vahundzra, avutisa lesvaku koyenceka yini.

37   Vamubzela, vaku: “Kohundzra Yesu, wa Nazareta!”

38   Kutani atlakuxa zritu, aku: “Yesu, N’wana Davhida, ndzritwele vuzrombe!”

39   Kutani lava afaka vali mahlweni vamukhwavela, vaku: “Miyela!” Kambe ayengetela kubandlukana, aku: “N’wana Davhida, ndzritwele vuzrombe!”

40   Kutani Yesu ayima, aleleta lesvaku vamubuyisa ku yene. Loko atsrhindzrekelile, Yesu amuvutisa, aku:

41   “Ujula lesvaku ndzrikuyencela yini?” Aku: “Hosi, ndzrikombela kutlhela ndzrivona.”

42   Kutani Yesu ku yene: “Tlhela uvona! Lipfumelo dzraku dzrikuhanyisile.”

43   Kutani atekela kutlhela avona, asungula kumulandzra, na adzrumisa Xikwembu Nkulukumba. Na vone vhanu hinkwavu, loko vasvivona, vadzrumisa Xikwembu Nkulukumba.