-
Luka 15
1 Kutani vahakelisi va tinemba hinkwavu ni vadohi afa vamutsrhindzrekelela akuva vamuyingiseta.
2 Kutani vafarisi ni vatsrali van’unun’uta, vaku: “Mhunu lweyi ayamukela vadohi ada navu.”
3 Lesvi avahambeliki xifananiso lexi, aku:
4 “I mani amakazri kwenu lweyi loko a ni dzana dzra tihamba, alahlekeliwa hi yin’we, angatikisiya leta ntlhanu ni mune wa makume na ntlhanu na mune anhoveni, alandzra leya kulahleka kukondzra ayikuma?
5 Kutani loko ayikumile, ayipakatsra hi makatla anyonxa.
6 Kutani loko atlhasa akaya, avitana vanghanu ni vayakelani vakwe, aku ku vone: Nyonxani na mine, hikusa ndzriyikumile hamba yanga leyi afaka yilahlekile!’
7 Ndzrin’wibzela lesvaku hi ndlela leyifanaka, kutava ni kutsrhava kukulu atilweni hi mhaka ya mudohi mun’we lweyi atisolaka kutlula hi mhaka ya ntlhanu ni mune wa makume na ntlhanu na mune lava svingavilelekiki akuva vatisola.
8 “Kumbe hi wini wansati lweyi anga ni khume dzra madrakma, lweyi loko olahla drakma dzrin’we, angatikitlhavika motsre akukula yindlu yakwe ajuletela ha hombe kukondzra adzrikuma?
9 Kutani loko adzrikumile, avitana vanghanu ni vayakelani, aku: ‘Nyonxani na mine, hikusa nidzrikumile drakma dzranga ledzri afaka ndzridzrilahlile.’
10 Hi ndlela leyifanaka, ndzrin’wibzela lesvaku tintsrumi ta Xikwembu Nkulukumba tanyonxa hi mhaka ya mhunu mun’we lweyi atisolaka.”
11 Agama aku: “Tatana wa kukazri afa a ni vana vabizri va majaha.
12 Kutani lwentsrongo aku ku tatana wakwe: ‘Tatana, ndzrinyike pfindla ledzri undzribekiseliki dzrone.’ Kutani avayavela minchumu yakwe hi vubizri bzavu.
13 Antsrhaku ka masiku mange mangani, n’wana lwentsrongo alongelela minchumu yakwe hinkwayu aya ku tiko dzra le kule, ayaheta pfindla dzrakwe hi kuhanya vutomi bza kutlanga ni vavasati.
14 Kutani loko aheti hinkwasvu, kuhumelela ndlala leyikulu atikweni ledzro hinkwadzru, asala avusiwaneni.
15 Apatsri ni kusuka ayakhonzha ku mun’we wa vayaki va tiko ledzro, lweyi angamuzrumela kuyabzisa tinguluve takwe.
16 Afa anavela kudlaya ndlala hi makamba lawa afaka madiwa hi tinguluve, kambe kungavi na mhunu wa kumunyika.
17 “Kambe loko nhloko yakwe yisunguli kutizra ha hombe, aku: ‘I manyingi sva kunhansi malandzra mangatholiwa hi tatana wanga lamadaka maxuzra, nakuve mine ndzrofa lomu hi ndlala!
18 Ndzrahasekeleka ndzriya ku tatana wanga ndzriyaku ku yene: “Tatana, ndzridoheli tilo na wene.
19 Andzrahafaneliwi hi kuvitaniwa n’wanaku. Ndzriyence kufana ni mun’we wa malandzra yaku lawa umatholiki.”’
20 Kutani asekeleka aya ku tatana wakwe. Kutani na ehe kule svinene, tatana wakwe amuvona, amutwela vuzrombe, atsrutsruma amuxingazra, amun’quta.
21 Kutani n’wana aku ku yene: ‘Tatana, ndzridoheli tilo na wene. Andzrahafaneliwi hi kuvitaniwa n’wanaku.’
22 Kambe tatana wakwe abzela malandzra yakwe, aku: Kahlulisani n’wihumexa nkhancu lowa hombe wa kone n’wimuyambexa, n’wimubekela ni xitlan’wana avokweni, ni masandhazi aminkondzrweni.
23 Nakone fambani n’wiyateka zrole dzra kunona, n’widzridlaya, hitada hinyonxa,
24 hikusa n’wananga lweyi afa afile kambe kutani awahanya; afa alahlekile, kutani akumiwile.’ Kutani vasungula kutinyonxela.
25 “Ankameni lowo n’wanakwe lwenkulu afa ali amasin’wini; atiki awatsrhindzrekela amutini, oyingela lesvaku kuchayiwa vunanga mfuzri kakiniwa.
26 Kutani avitana mun’we wa malandzra amuvutisa, aku: ‘Kova na yini la kaya?’
27 Kutani nandzra aku ku yene: ‘Hesvaku makwenu atlheleli kaya, kutani tatana waku adlayi zrole dzra kunona hikuva amuyamukeli na ahanya.’
28 Kambe ahlundzruka, ayala kunhingena. Kutani tatana wakwe ahuma ayamutsratsriya.
29 Kutani ahlamula tatana wakwe, aku: ‘Lavisa, malembe lawa hinkwawu ndzrikutizrelile mfuzri andzringisama ndzritlula ni wun’we wa milawu yaku, kambe awungisama undzrinyika nambi ximbutana xa xin’we akuva ndzritikholisa ni vanghanu vanga.
30 Kambe konatlhasa lwewa n’wanaku, lweyi angada minchumu yaku ni tinghwavana, umudlayeli zrole dzra kunona.’
31 Kutani tatana wakwe aku ku yene: ‘N’wananga, wene minkama hinkwayu uvi na mine, nakone hinkwasvu lesvinga svanga i svaku.
32 Kambe svafanela kuva hikulungela hitlhela hinyonxa, hikusa makwenu afa afile kambe atlheli ahanya; afa alahlekile kutani akumiwile.’”