BRX

1   Kutani antsrhakunyana ka lesvo, ayendzra hi doropa ni doropa ni xidoropana ni xidoropana, afamba azrezra madzrungula lamanene ya Mfumu wa Xikwembu Nkulukumba. Nakone lava khume na vabizri afa vali naye,

2   kupatsra ni vavasati va kukazri lava afaka vasusiwi mimoya ya kubiha ni mavabzi, anga Mariya lweyi afaka avitaniwa Madalena, lweyi afaka kuhumi ntlhanu wa mademona na mabizri ku yene;

3   Yowana, nsati wa Chuza, mutameli wa muti wa Heroda; Suzana; ni van’wana vavasati va kutala, lava afaka vavapfunisa hi minchumu yavu.

4   Kutiloko kuhlengeletanile xitsrhungu lexikulu ni vhanu lava afaka vahumetela hi le madoropeni vamubuyela, avulavula hi svifananiso, aku:

5   “Mubzali ahumi ayabzala mbewu yakwe. Kutani ankama lowu abzalaka, yin’we mbewu yiwela andleleni kutani yikandzreteliwa, ni tinyanyana ta tilo tiyida.

6   Kutani yin’wana yiwela amazribzeni, kutani loko yiku yamila, yibuna hi kupfumala ntsrhongo.

7   Yin’wana yiwela makazri ka mitwa, kutani mitwa lemikuliki na yone miyikamalata yifa.

8   Kambe yin’wana yiwela amisaveni leminene, kutani loko yimilile, yipsala mihandzru kadzana.” Loko aheta kuhlaya lesvi, atlakuxa zritu, aku: “Lweyi anga ni tindleve ta kuyingela aayingele!”

9   Kutani vadondzrisiwa vakwe vamuvutisa, vaku: “Xana xifaniso lexi xijula kuhlaya lesvaku yini?”

10   Aku: “N’wine n’winyikiwi kutwisisa svihundla sva Mfumu wa Xikwembu Nkulukumba, kambe ku lavan’wana kutizra svifaniso, kuyencela lesvaku nambi valanguta, vangavoni, ni loko vasviyingela, vangasvitwisisi.

11   Kutani xifaniso lexo xijula kuhlaya lesvi: Mbewu i zritu dzra Xikwembu Nkulukumba.

12   Mbewu leyiwelaka andleleni hi lava vayingelaka, kutani Diyavulosi abuya avasusela zritu atimbilwini tavu kuyencela lesvaku vangapfumeli vava vahuluxiwa.

13   Kutani leyiwelaka amaribzeni hi lava loko vatwa zritu, vadzriyamukelaka hi kutsrhava, kambe vangadzimi mitsru. Vapfumela hi nkamanyana ntsena, kambe loko kutlhasa nkama wa ndzringo, vawa.

14   Kutani leyingawela makazri ka mitwa, hi lava vayingeliki, kambe hi mhaka ya kutsrhama hi kupimisa hi svikazratu sva vutomi, vukosi ni kutikholisa hi vutomi, vakamalateliwa, vangakoti kupsala mihandzru ya kuwupfa.

15   Kasi loko kuli leyiweliki amisaveni leminene, hi lava loko vayingela zritu hi mbilu ya kuxonga ni ya yinene, vagamaka vayibekisa vatlhela vapsala mihandzru hi kutiyisela.

16   “Anga kone lweyi loko atlhaviki motsre, awufuneketaka hi xibza kumbe awubekaka ahansi ka mubede, kambe awubeka ka kuhayeka motsre lesvaku lava vanhingenaka vakota kuvona livaningo.

17   Hikusa aku na nchumu lowufihliwiki lowungatikibekiwa alivaleni, kumbe xihundla ni xin’we lexikalaka xingatitibziwa ni kubekiwa alivaleni.

18   Xisvosvo, tivonelani ku ndlela leyi n’wiyingisetaka ha yone, hikusa kutanyikiwa lweyi anga ni xa kukazri, kambe lweyi angeke na nchumu, nambi svosvo apimisaka lesvaku a nasvu, atatekeliwa svone.”

19   Kutani mamana wa Yesu ni vamakwavu vamutela, kambe vahluleka kutlhasa lomu afaka ali kone hi mhaka ya xitsrhungu.

20   Kutani van’we vamubzela, vaku: “Mamana waku ni vamakwenu vayimi hala handle, vajulaka kuvonana na wene.”

21   Kutani Yesu avayangula, aku: “Mamana wanga ni vamakwezru hi lavayingelaka zritu dzra Xikwembu Nkulukumba vatlhela vadzriyenca.”

22   Kati ha dzrin’wana siku, anhingena bzatsrhwini ni vadondzrisiwa vakwe, aku ku vone: “Ahitluleleni hiya halahaya ka tiva.” Kutani vasungula kufambisa bzatsrhu.

23   Kambe ankama lowu vafambisaka bzatsrhu, Yesu akhutsriyela. Kutani kusungula xidzedze xa kuchavisa ativeni, vataleliwa hi mati, vakumeka khombzeni.

24   Kutani vayamupfuxa, vaku: “Mudondzrisi, hafa!” Kutani apfuka akhwavela moya ni mavimbi ya mati, svimiyela, kutani kuzrula kukuzwee.

25   Agama aku ku vone: “Kasi lipfumelo dzrenu dzri kwini?” Kambe lesvi afaka vatali hi kuchava ni kuhlamala, vabzelana lesvi: “Kasi hi mani lweyi, lweyi wa kuva nambi svidzedze ni mati oyenca hi kusvileleta, sviva svimuyingiseta?”

26   Kutani vayatlhasa vayima amugangeni wa vageraseni, lowu afaka wulavisani na Galileya.

27   Loko Yesu akandzretela misava, atlhangavetiwa hi mhunu wa doropa ledzro lweyi afaka ali ni mademona. Aheti nkama wa kuleha na angayambali mpahla, nakone afa angatsrhami andlwini, kambe afa atsrhama amaxizreni.

28   Loko avona Yesu, abandlukana, awa hansi amahlweni kwakwe, kutani atlakuxa zritu, aku: “Ujula yini kwanga, wene Yesu, N’wana wa Xikwembu Nkulukumba wa le Henhlahenhla? Ndzrakukombela, ungandzrixanise.”

29   (Hikusa Yesu afa aleleti moya lowunyamiki lesvaku wuhuma ku mhunu lweyo. Minkama ya kutala afa anhingeniwi hi moya lowo, kutani vhanu vamutsrimbelela hi timpencana ni tinghomondho akuva angasuki, kambe athinya hinkwasvu lesvi afaka vamutsrimba ha svone, demona dzrigama dzrimukomba kuya amananga.)

30   Yesu adzrivutisa, aku: “U mani vito?” Dzriku: “Butsrhu”, hikusa afa anhingeniwi hi mademona manyingi.

31   Kutani mamukombela lesvaku angamahlongoli amayisa Xidziveni.

32   Afa ku ni ntlhambi lowukulu wa tinguluve leti afaka tida anhaveni, kutani mademona mamukombela kumapfumelela kuyanhingena atingulubzeni; amapfumelela.

33   Kutani mademona mahuma ku mhunu wa kone mayanhingena atingulubzeni, kutani hinkwatu ka tone titsrutsrumela aligingizrini, tipela tiveni, tifa hi kunwela mati.

34   Kambe loko vabzisi vavoni lesvingayenceka, vatsrutsruma vayadzrungulela vhanu adoropeni ni le ntlhaveni.

35   Kutani vhanu lavo vahuma vatatavona lesviyencekiki. Loko vayela Yesu, vakuma mhunu lweyi mademona mahumiki ku yene na ayambali mpahla, mfuzri na nhloko yakwe yitizra ha hombe, na atsrhami hi le kusuhi ni minkondzro ya Yesu; kutani vachava.

36   Kutani lavasvivoniki, vavadzrungulela lesvi mhunu lweyi afaka a ni mademona ahanyisiwisiki xisvone.

37   Kutani kubuya vhanu va vanyingi hi le mugangeni wa le kusuhi ni vageraseni vatatakombela akuva Yesu asuka amugangeni wavu, hikuva afa vakhomiwi hi nchavu lowukulu. Lesvi atlheliki anhingena bzatsrhwini, afamba.

38   Kutani mhunu lweyi mademona mahumiki ku yene amukombela kufamba naye, kambe amutlhelisa, aku:

39   “Muka akaya kwaku, uyadzrungula hinkwasvu lesvi Xikwembu Nkulukumba akuyenceliki svone.” Kutani afamba, ayahuwelela adoropeni hinkwadzru lesvi Yesu angamuyencela svone.

40   Kutani loko Yesu atlhela, xitsrhungu ximuhoyozela, hikusa hinkwavu afa vamujula hi khale.

41   Kambe hi nkama lowo kotlhasa mun’we wanuna lwavitaniwaka Yayiru, lweyi afaka ali muzrangeli wa sinagoga. Awela minkondzrweni ya Yesu asungula kumukombela kufamba naye akaya kwakwe,

42   hikuva xin’hwanyatana xakwe, xa kusuhi ni khume dzra malembe na mabizri, lexi afaka epsala xone ntsena, afa xili kusuhi ni kufa. Kutani ankama lowu Yesu afambaka, svitsrhungu svimukamalatela.

43   Kutani afa ku ni mun’we wansati lweyi afaka a ni khume dzra malembe na mabizri na atsrhama hi kuhumela ngati, lweyi vadahi hinkwavu vangahluleka kumudaha.

44   Loko abuya hi ntsrhaku ka Yesu, akhumba vugamu bza nkhancu wakwe, ngati yakwe leyi afaka yitsrhama hi kuhumela yitsrema hi nkama wolowo.

45   Kutani Yesu aku: “Hi mani lwandzrikhumbiki?” Kambe hinkwavu vaku: “Mine ahi mine.” Kutani Petrosi aku: “N’wahosi, i svitsrhungu lesvinga matlhelweni kwaku svikukamalatelaka.”

46   Kambe Yesu aku: “Ku ni mhunu lwandzrikhumbiki, hikusa ndzrasvitiva lesvaku kuhumi ntamu kwanga.”

47   Loko wansati lweyo asvivona lesvaku vamutsrumbulile, abuya na azruzrumela, awela hansi amahlweni kwakwe, ahlaya amahlweni ka vhanu hinkwavu leximuyenciki amukhumba ni lesvi adahisiwiki xisvone hi nkama wolowo.

48   Kambe Yesu aku ku yene: “N’wananga, lipfumelo dzraku dzrikuhanyisile. Famba hi kuzrula.”

49   Ati na ahavulavula, kotlhasa mun’we wa madoda ya muzrangeli wa sinagoga, aku: “N’wanaku afile; ungahamunyike ntizro Mudondzrisi.”

50   Kambe loko Yesu asviyingelile, amuyangula, aku: “Ungachave, ntsena vana ni lipfumelo. N’wanaku atahanya.”

51   Loko atlhasi akaya ka kone, angatsrhikanga mhunu anhingena handle ka Petrosi, Yohani, Yakobe, ni tatana ni mamana wa xin’hwanyatana.

52   Kutani vhanu hinkwavu afa vali kazri vadzrila, vaba nkosi hi mhaka ya n’wana lweyo. Kutani aku: “N’wingadzrileni, hikusa angafanga kambe eyetlela.”

53   Kutani vamuhleka, hikuva afa vasvitiva lesvaku n’wana lwiya afa afile.

54   Kambe amukhoma hi voko, amuvitana, aku: “Wene wa ntsrongwana, pfuka!”

55   Kutani moya wakwe wutlhela, apfuka hi nkama wolowo. Yesu avazruma kumunyika svakuda.

56   Kutani vapsele va lwewa nhwanyana vangahatikoti hi kutsrhava, kambe avaleleta lesvaku vangabzeli mhunu lesviyencekiki.